തലമുടി സ്ത്രീകള്‍ക്ക് ഒരു അലങ്കാരമാണ്. തന്റെ കരവിരുത് സ്വന്തം തലമുടിയില്‍ പ്രകടമാക്കി ലോകശ്രദ്ധ ആകര്‍ഷിച്ചിരിക്കുകയാണ് ലെയ്റ്റിറ്റിയ കെ എന്ന വെസ്റ്റ് ആഫ്രിക്കന്‍ യുവതി.

മനുഷ്യരെയും മൃഗങ്ങളെയും വാദ്യോപകരണങ്ങളെയും എന്തിന് ചെറിയൊരു സൈക്കിള്‍പോലും തന്റെ മുടികൊണ്ട് നെയ്‌തെടുത്തിരിക്കുകയാണ് ഈ ഇരുപത്തിരണ്ട്കാരി.

സ്വന്തം തലയില്‍ പല രൂപങ്ങള്‍ വിരിയിച്ചെടുക്കുവാന്‍ നീണ്ട മണിക്കൂറുകളുടെ പരിശ്രമമാണ് കെ-യ്ക്ക് വേണ്ടിവരുന്നത്. തന്റെ ചുരുളന്‍ മുടി തികയാതെ വരുമ്പോള്‍ കൃത്രിമ മുടിയും കമ്പളിയും നൂലുമൊക്കെ ഉപയോഗിക്കും. പിന്നിയ മുടിക്കിടയില്‍ നൂല്‍ക്കമ്പികള്‍ തിരുകിയാണ് പല രൂപങ്ങള്‍ ഉണ്ടാക്കുന്നത്.

ഇങ്ങനെ ചെയ്യുന്നതുകൊണ്ട് എന്താണ് നേട്ടമെന്നു ചോദിച്ചാല്‍ കെ തന്റെ ഇന്‍സ്റ്റഗ്രാം അക്കൗണ്ട് കാണിച്ചു തരും. ആയിരക്കണക്കിന് ആളുകളാണ് കെയുടെ തലമുടിയിലെ കല കാണാന്‍ അവളെ ഇന്‍സ്റ്റഗ്രാമില്‍ ഫോളോ ചെയ്യുന്നത്.

കോളനിവത്കരണത്തിനു മുമ്പ് ആഫ്രിക്കയിലെ ഗോത്രവര്‍ഗങ്ങളില്‍പ്പെട്ട ആളുകള്‍ പിന്തുടര്‍ന്ന ഹെയര്‍ സ്‌റ്റൈലുകളാണ് തനിക്ക് പ്രചോദനകരമായതെന്ന് കെ പറയുന്നു.