കിലോയ്ക്ക് ഒരു ലക്ഷം വിലയുള്ള ,ഡാര്ജിലിംഗ് മലനിരകളിലെ അപൂര്വ ചായ!
ജൈവവൈവിധ്യ സമ്പന്നമാണ് ഡാര്ജിലിംഗിലെ മലനിരകള്. ഈ ഹിമാലയ താഴ്വരയിലെ കാഴ്ചകള് സഞ്ചാരികളുടെ മനംകുളിര്പ്പിക്കുന്നവയാണ്. സമുദ്രനിരപ്പില്നിന്നും 2200 മീറ്റര് ഉയരത്തില് സ്ഥിതി ചെയ്യുന്ന ഈ മലനിരകളില് ഉത്പാദിപ്പിക്കുന്ന തേയില ലോകപ്രശസ്തമാണ്.
വിക്ടോറിയന് കാലത്തെ ഓര്മിപ്പിക്കുന്ന കെട്ടിടങ്ങള് നിറഞ്ഞ ടൗണില്നിന്ന് 33 കിലോമീറ്റര് വടക്കോട്ടു സഞ്ചരിച്ചാല് ലോകത്തിലെ ഏറ്റവും പഴയ തേയില ഫാക്ടറികളില് ഒന്നു കാണാം. മകൈബരി എന്ന എസ്റ്റേറ്റിലാണ് ഈ ഫാക്ടറി സ്ഥിതി ചെയ്യുന്നത്.ലോകത്തിലെ തന്നെ ഏറ്റവും വിലകൂടിയ തേയിലപ്പൊടി ഉത്പാദിപ്പിക്കുന്ന സ്ഥലമാണിത്. സില്വര് ടിപ്സ് ഇംപീരിയല് എന്നാണ് ആ തേയിലപ്പൊടിയുടെ പേര്. മകൈബരി എസ്റ്റേറ്റിലെ ഒരു പ്രത്യേക ഭാഗത്ത് നട്ടുവളര്ത്തുന്ന തേയിലച്ചെടിയുടെ ഇല പാകമായതിനുശേഷം വെളുത്തവാവ് ദിവസം നുള്ളിയെടുത്താണ് ഈ ചായപ്പൊടി തയാറാക്കുന്നത്. കിലോയ്ക്ക് ഒരു ലക്ഷം രൂപയ്ക്ക് മുകളില്വരെ ഈ ചായപ്പൊടിക്ക് വില ലഭിക്കാറുണ്ട്.
1859-ലാണ് മകൈബരി ഫാക്ടറി തുടങ്ങുന്നത്. ഡാര്ജിലിംഗിലെ ഏറ്റവും പഴയ തേയില ത്തോട്ടമാണ്. ലോകത്തിലെ ആദ്യ ബയോഡൈനാമിക് തേയിലത്തോട്ടവും ഇതുതന്നെ. സാധരണ കൃഷി സ്ഥലങ്ങള് ഭൂമിയിലേക്ക് നോക്കി വിളവെടുപ്പു സമയം തീരുമാനിക്കുമ്പോള് ഇവിടെ കൊളുന്തു നുള്ളാനുള്ള സമയം കണ്ടെത്തുന്നതിനായി തൊഴിലാളികള് ആകാശത്തിലേക്ക് നോക്കുന്നു. മാര്ച്ച് മുതല് ഒക്ടോബര് വരെയുള്ള മാസങ്ങളിലെ വെളുത്തവാവ് ദിവസമാണ് ഇവിടത്തെ തേയിലകളുടെ കൊളുന്ത് നുള്ളുന്നത്.മാര്ച്ച് മാസത്തിലെ ആദ്യ വെളുത്തവാവ് ദിവസമാണ് ആ വര്ഷത്തെ ആദ്യ വിളവെടുപ്പ് നടക്കുന്നത്.
സമുദ്രത്തില് വേലിയേറ്റ സമയമാണിത്. ഈ സമയത്ത് തേയിലച്ചെടികളില് ജലാംശം കുറവായിരിക്കുമത്രെ. ഈ സമയത്ത് അന്തരീക്ഷത്തില് ഓക്സിജന്റെ അളവ് കൂടുതലായിരിക്കുമെന്നാണ് ഇവിടത്തെ തൊഴിലാളികള് പറയുന്നത്. ഇത് തേയില കൊളുന്തുകളെ കൂടുതല് തരളിതമാക്കും. അന്നേ ദിവസം സൂര്യന് അസ്തമിച്ചു തുടങ്ങുമ്പോള് എസ്റ്റേറ്റിലെ തൊഴിലാളികളെല്ലാവരും ഒന്നിച്ചുകൂടും. പൂര്ണചന്ദ്രന്റെ നിലാവിലുള്ള അന്നത്തെ കൊളുന്തു നുള്ളല് ഇവര്ക്ക് ഒരു ആഘോഷം മാത്രമല്ല ആത്മീയ അനുഭവംകൂടിയാണ്.
ഒരു സീസണില് നാലോ അഞ്ചോ തവണയാണ് സില്വര് ടിപ്സ് ഇംപീരിയലിന്റെ കൊളുന്തുനുള്ളല് നടക്കുന്നത്. കൊളുന്തു നുള്ളുന്ന ദിവസം സന്ധ്യയില് മകൈബരി എസ്റ്റേറ്റിലെ തൊഴിലാളികള് പരമ്പരാഗത ബംഗാളി വസ്ത്രങ്ങളും ധരിച്ച് എസ്റ്റേറ്റിലെത്തും. പുരുഷന്മാര് ഡ്രംസ് മുഴക്കുമ്പോള് സ്ത്രീകള് ഉച്ചത്തില് മന്ത്രങ്ങള് ചൊല്ലും. സംരക്ഷണത്തിനും സൗഭാഗ്യങ്ങള്ക്കും വേണ്ടിയുള്ളതാണ് ഈ മന്ത്രങ്ങള്. കൊളുന്തുനുള്ളുന്ന തൊഴിലാളികള്ക്കൊപ്പം അവരുടെ കുടുംബാംഗങ്ങളും പുറത്തുനിന്നുള്ള കാഴ്ചക്കാരുമൊക്കെ ഇവിടെ ഉണ്ടാകും. അവര് മൃഗങ്ങളുടെ കൊഴുപ്പ് ഒഴിച്ച് കത്തിക്കുന്ന വിളക്കുകള് കൈകളിലേന്തിയിരിക്കും. കൊളുന്തുനുള്ളുന്നവര്ക്ക് പ്രകാശം നല്കാന് മാത്രമല്ല, ഇവിടത്തെ താഴ്വരകളില് യഥേഷ്ടം വിഹരിക്കുന്ന കാട്ടുമൃഗങ്ങളില്നിന്ന് തൊഴിലാളികളെ രക്ഷിക്കാനും ഈ വിളക്കുകള് സഹായിക്കുന്നു.
കൊളുന്തുനുള്ളാന് തുടങ്ങിയാല്പ്പിന്നെ തൊഴിലാളികള്ക്ക് മറ്റൊന്നിനെക്കുറിച്ചും ചിന്തയില്ല. സൂര്യന് ഉദിക്കുന്നതിന് മുമ്പുതന്നെ കൊളുന്തു നുള്ളി ഫാക്ടറിയില് എത്തിച്ച് ചായപ്പൊടി നിര്മാണത്തിന്റെ ആദ്യഘട്ടം ആരംഭിക്കും. 200 കിലോ കൊളുന്തില്നിന്ന് 50 കിലോ ചായപ്പൊടി ഉണ്ടാക്കാം എന്നാണ് കണക്ക്. ഒരു സീസണില് 200 കിലോയ്ക്ക് മുകളില് കൊളുന്ത് ശേഖരിക്കാന് കഴിയാറില്ല. അതുകൊണ്ടുതന്നെയാണ് ഇവയ്ക്ക് ഇത്ര വില.കഴിഞ്ഞ 159 വര്ഷമായി ഇവിടത്തെ ബാനര്ജി കുടുംബത്തിന്റെ ഉടമസ്ഥതയിലായിരുന്നു ഈ എസ്റ്റേറ്റ്. കഴിഞ്ഞ വര്ഷം അവസാനത്തില് ഇപ്പോഴത്തെ അവകാശിയായ രാജ ബാനര്ജി എസ്റ്റേറ്റിന്റെ ഉടമസ്ഥാവകാശം ഇവിടത്തെ 600 തൊഴിലാളികള്ക്കായി വീതിച്ചു നല്കി.
https://www.facebook.com/Malayalivartha