റിപ്പബ്ലിക് ദിനത്തില്‍ സിയാച്ചിനിലെ എല്ല് കോച്ചുന്ന തണുപ്പത്ത് ഡ്യൂട്ടി ചെയ്തിരുന്ന സൈനികര്‍ക്ക് ഇന്നലെ ഒരു സര്‍പ്രൈസ് സമ്മാനം കിട്ടി. നല്ല ചൂടന്‍ പിസ! പിസ കമ്പനിയായ ഡോമിനോസാണ് സിയാച്ചിനിലെ സൈനികര്‍ക്ക് ചൂട് പിസയുണ്ടാക്കി എത്തിച്ചത്.

പിസ ബോക്‌സുമായി നില്‍ക്കുന്ന സൈനികരുടെ ചിത്രങ്ങള്‍ ട്വീറ്റ് ചെയ്ത് കൊണ്ട് ഡോമിനോസ് പറഞ്ഞത്, ''കൊടുംതണുപ്പ് സഹിച്ചും രാജ്യത്തിന് വേണ്ടി അശ്രാന്തപരിശ്രമം നടത്തുന്ന, അതിര്‍ത്തി കാക്കുന്ന ധീരജവാന്‍മാര്‍ക്ക് ഞങ്ങളുടെ നന്ദിയുടെ പ്രതീകമാണിത്'' എന്നാണ്.

ലോകത്തെ ഏറ്റവും ഉയരം കൂടിയ യുദ്ധഭൂമിയാണ് സിയാച്ചിന്‍. സമുദ്രനിരപ്പില്‍ നിന്ന് 20,000 അടി ഉയരത്തിലാണ് നില്‍പ്. ശീതകാലത്ത് മൈനസ് 60 ഡിഗ്രി വരെ ഇടിയാറുണ്ട് ഇവിടത്തെ താപനില.

ഡോമിനോസിന്റെ സ്‌നേഹസമ്മാനത്തെ അഭിനന്ദിക്കാന്‍ സോഷ്യല്‍ മീഡിയയും മറന്നില്ല. പിസ എത്തിച്ച കമ്പനിക്ക് നിരവധിപ്പേരാണ് ട്വിറ്ററില്‍ സ്‌നേഹം അറിയിച്ചത്.