വിദേശത്തു നിന്നും എത്തിയ യാത്രക്കാരുടെ ലഗേജുകള്‍ ഇറക്കാനും കയറ്റാനും സഹായിച്ച കെ എസ്സ് ആര്‍ ടി സിയിലെ വൈറലായ വീഡിയോയിലെ കണ്ടക്ടറെ കാണേണ്ടേ? .കോട്ടക്കല്‍ കോട്ടൂര്‍ സ്വദേശിയായ ഫൈസല്‍ കറുത്തേടത്താണ് നവമാധ്യമങ്ങള്‍ താരമാക്കിയ കണ്ടക്ടര്‍. എട്ടുവര്‍ഷമായി കെ.എസ്.ആര്‍.ടി.സിയില്‍ കണ്ടക്ടറായി ജോലി ചെയ്യുന്നു. വൈറലായ വീഡിയോയുടെ കഥ ഉണ്ടായത് കഴിഞ്ഞ ശനിയാഴ്ചയാണ്.നെടുമ്പാശ്ശേരിയില്‍ നിന്നും പട്ടാമ്പി മലപ്പുറം വഴി കോഴിക്കോട്ടേക്കുള്ള ലോ ഫ്‌ളോര്‍ ബസിലായിരുന്നു അന്ന് ഡ്യൂട്ടി, ഭൂരിഭാഗവും പ്രവാസി മലയാളികളാണ് ബസില്‍. ഇവരുടെ ഇരട്ടിയലധികമുണ്ട് ലഗേജുകള്‍.

യാത്രക്കാര്‍ക്കൊപ്പം ഇവ കയറ്റാനും ഇറക്കാനും ഫൈസലും ഒപ്പം കൂടി. പട്ടാമ്പിയിലെത്തിയപ്പോള്‍ അഞ്ചോളം യാത്രക്കാര്‍ ഒരുമിച്ചിറങ്ങി.ഒപ്പം കണ്ടക്ടറും.ഓരോ ബാഗുകളും ചോദിച്ചറിഞ്ഞ് ഇറക്കുന്ന വീഡിയോ മറ്റൊരു യാത്രക്കാരന്‍ മൊബെലില്‍ പകര്‍ത്തി ഫെയ്‌സ് ബുക്കിലിട്ടു. കെ.എസ്.ആര്‍.ടി.സി കാണണം ഈ കണ്ടക്ടറുടെ ആത്മാര്‍ത്ഥത എന്ന അടിക്കുറിപ്പോടെയായിരുന്നു പ്രചരണം. ഇതോടെ സമൂഹമാധ്യമം ഇതേറ്റെടുക്കുകയായിരുന്നു.

സംഭവം വൈറലായതൊന്നും ഫൈസല്‍ അറിഞ്ഞിരുന്നില്ല. കൂട്ടുകാര്‍ വിളിച്ചപ്പോഴാണ് അറിയുന്നത്. ഭൂരിഭാഗം കണ്ടക്ടര്‍മാരും ചെയ്യുന്ന പ്രവൃത്തിയേ താനും ചെയ്തിട്ടുള്ളുവെന്നാണ് ഫൈസല്‍ പറയുന്നത്.കെ.എസ്.ആര്‍.ടി.സി-യെ കരകയറ്റാന്‍ എല്ലാവരും ശ്രമിക്കണമെന്നാണ് ഇദ് ദേഹം പറയുന്നത്. എം പാനല്‍ നിയമനറദ്ദാക്കല്‍ മൂലം ഉറ്റ സുഹൃത്തുക്കളെ നഷ്ടപ്പെട്ടതായും ഫൈസല്‍ പറഞു. പെരുങ്കുളം താഹിര്‍ കുട്ടി ഖദീജ എന്നിവരുടെ മകനാണ് .സഹോദരങ്ങളായ ജലീല്‍ കറുത്തേടത്ത് മഞ്ചേരി എസ്.ഐയും, സഫീര്‍ അസ്ലം മലപ്പുറം സ്‌റ്റേഷനിലെ സി.പി ഒ യുമാണ്. ഹഫ്‌സത്താണ് ഭാര്യ. അജ്മല്‍ മഹമൂദ് ഏക മകനാണ്.മറ്റു കണ്ടക്ടര്‍മാര്‍ക്ക് മാതൃക കാണിച്ച ഫൈസല്‍ കറുത്തേടത്തിന്റെ പ്രവൃത്തിക്ക് അഭിനന്ദന പ്രവാഹമാണ്.