ചിത്രം വരയ്ക്കുന്ന കത്രിക
സാധാരണ ബ്രഷും പെന്‍സിലുമൊക്കെ ഉപയോഗിച്ചാണ് ചിത്രങ്ങള്‍ വരയ്ക്കുന്നത്. എന്നാല്‍ കരീബിയന്‍ ദ്വീപായ പ്യൂര്‍ട്ടോ റിക്കയില്‍ കത്രികകൊണ്ട് ചിത്രങ്ങള്‍ വരയ്ക്കുന്ന ഒരാളുണ്ട്. ഒരു ചിത്രകാരനല്ല, ബാര്‍ബറാണ് ഇദ്ദേഹം. ആന്റണി റയസ് എന്നാണ് ഇദ്ദേഹത്തിന്റെ പേര്. തന്റെ കടയില്‍ മുടിവെട്ടാനെത്തുന്നവരുടെ തലയാണ് ഇദ്ദേഹത്തിന്റെ കാന്‍വാസ്.
മുടിവെട്ടാനെത്തുന്നവര്‍ ആവശ്യപ്പെടുന്നതിനനുസരിച്ച് പ്രശസ്തരുടെ രൂപങ്ങളാണ് ഇദ്ദേഹം തലമുടിയില്‍ വെട്ടി ഒരുക്കി നല്‍കുന്നത്. ആവശ്യമെങ്കില്‍ ചിത്രങ്ങള്‍ക്ക് പൂര്‍ണത വരാന്‍ പലതരം ഡൈകളും ഉപയോഗിക്കും.
കഴിഞ്ഞ ദിവസം ഇവിടെ മുടിവെട്ടാന്‍ എത്തിയ ഒരാളുടെ ആവശ്യ പ്രകാരം പ്രശസ്ത ഗായകനും ഗാന രചയിതാവുമായ ലിന്‍ മാനുവല്‍ മിറാന്‍ഡയുടെ ചിത്രം അയാളുടെ തലയില്‍ വെട്ടിക്കൊടുത്തു. അയാള്‍ തന്റെ തലയുടെ ചിത്രങ്ങള്‍ സമൂഹമാധ്യമങ്ങളില്‍ പങ്കുവയ്ക്കുകയും സാക്ഷാല്‍ മിറാന്‍ഡ തന്നെ ഈ ചിത്രങ്ങള്‍ കാണുകയും ചെയ്തു.
തന്റെ ചിത്രം ഇത്ര ഭംഗിയായി തലമുടിയില്‍ തീര്‍ത്ത കലാകാരനെ കാണാന്‍ മിറാന്‍ഡ നേരിട്ടെത്തിയിരുന്നു. കഴിഞ്ഞ 23 വര്‍ഷമായി ആന്റണി ബാര്‍ബറായി ജോലി ചെയ്യുകയാണ്. എന്നാല്‍ ആളുകളുടെ ചിത്രങ്ങള്‍ തലയില്‍ വരച്ചുനല്‍കാന്‍ തുടങ്ങിയിട്ട് അഞ്ചു വര്‍ഷമെ ആയിട്ടുള്ളു.
ബോബ് മാര്‍ലിയുടേതടക്കം നിരവധി പ്രശസ്തരുടെ ജീവന്‍ തുടിക്കുന്ന ചിത്രങ്ങള്‍ ഇദ്ദേഹം പലരുടെയും തലമുടിയില്‍ വെട്ടിയൊരുക്കി നല്‍കിയിട്ടുണ്ട്.
https://www.facebook.com/Malayalivartha
