മലയാളിയുടെ കരവിരുതില് മാര്പാപ്പയുടെ ആദ്യഗള്ഫ് സന്ദര്ശനത്തിന്റെ മുദ്ര ഒരുങ്ങി
ഗള്ഫില് ഫ്രാന്സിസ് മാര്പാപ്പയുടെ സന്ദര്ശനത്തിനു മുദ്രയൊരുക്കിയത് മലയാളി. മാര്പാപ്പയുടെ യുഎഇ സന്ദര്ശനത്തിന്റെ ലോഗോ തയാറാക്കിയത് പ്രവീണ് ഐസക് എന്ന ക്രിയേറ്റീവ് ഡിസൈനറാണ്. ഇതാദ്യമായാണ് മാര്പാപ്പ ഗള്ഫ് രാജ്യങ്ങള് സന്ദര്ശിക്കുന്നത്. ഫെബ്രുവരി മൂന്നു മുതല് അഞ്ചുവരെയാണ് സന്ദര്ശനം.
രണ്ടു മാസം മുമ്പ് വികാരിയാത്ത് ഓഫ് സതേണ് അറേബ്യയുടെ കമ്യൂണിക്കേഷന്സ് ഡയറക്ടര് ഇ.ജെ. ജോണ് ആണ് 'പേപ്പല് വിസിറ്റ് ലോഗോ' തയാറാക്കാന് പ്രവീണിനോട് ആവശ്യപ്പെട്ടത്. സന്ദര്ശന വിവരം തത്കാലം പരസ്യമാക്കരുതെന്ന നിര്ദേശത്തോടെയായിരുന്നു ചുമതലയേല്പിച്ചത്.ഒലിവുചില്ല കൊക്കിലേന്തിയ പ്രാവ്. യുഎഇയുടെ പതാകയുടെ നിറങ്ങള് ചേര്ത്ത തൂവല്. ലളിതവും എന്നാല് അര്ഥസമ്പുഷ്ടവുമാണ് ലോഗോ.
ദുബായില് 11 വര്ഷം സേവനം ചെയ്തിട്ടുള്ള പ്രവീണ്, വികാരിയാത്ത് ഓഫ് സൗദി അറേബ്യയുടെ പ്രേഷിത പ്രവര്ത്തനങ്ങളില് സജീവമായിരുന്നു. ഏഴു വര്ഷം മുമ്പു നാട്ടില് തിരിച്ചെത്തിയെങ്കിലും പ്രവീണ് അവരുമായി ആശയവിനിമയം തുടര്ന്നുപോന്നിരുന്നു. അറേബ്യന് നാടുകളില് സുവിശേഷ പ്രഘോഷണം നടത്തിയ വിശുദ്ധ ഫ്രാന്സീസ് അസീസിയുടെ ഓര്മകളുണര്ത്തിയാണ് മാര്പാപ്പ എത്തുന്നത്.
പാവങ്ങളുടെ പക്ഷം ചേരുന്ന സമാധാന ദൂതനാണു മാര്പാപ്പ. ആ നിലയിലാണു ഒലിവുചില്ല കൊക്കിലേന്തിയ പ്രാവ് എന്ന ആശയം ലോഗോയ്ക്കു നല്കിയത്. ഒലിവിലയ്ക്കു പച്ചനിറം, പ്രാവിനു പേപ്പല് നിറമായ മഞ്ഞ. പോപ്പ് ഫ്രാന്സിസ് എന്ന വാക്കിനു ബ്രൗണ് നിറം നല്കിയത് ഫ്രാന്സിസ്കന് സന്യാസസമൂഹം പിന്തുടരുന്ന നിറമെന്ന നിലയിലാണ്.
ഫ്രാന്സിസ് മാര്പാപ്പയുടെ ചരിത്രപ്രാധാന്യമുള്ള യുഎഇ സന്ദര്ശനത്തിനു ലോഗോ തയാറാക്കാന് അവസരം ലഭിച്ചതു ഭാഗ്യമല്ല, ദൈവാനുഗ്രഹമാണെന്നു പ്രവീണ് പറഞ്ഞു. ലോഗോ തെരഞ്ഞെടുക്കപ്പെട്ടെന്ന വിവരം പത്തു ദിവസത്തിനകം അവര് അറിയിച്ചപ്പോള് സന്തോഷം തോന്നി. ദൈവത്തിന് എന്റെ ഹൃദയത്തിന്റെ ആഴത്തില്നിന്നുള്ള നന്ദി: പ്രവീണ് പറഞ്ഞു.
ഇരുപതു വര്ഷമായി ക്രിയേറ്റീവ് ഡിസൈനറായ പ്രവീണ് ഐസക് പൊന്കുന്നം വാഴൂര് പത്തൊമ്പതാം മൈല് സ്വദേശിയാണ്. വാഴൂര് മൗണ്ട് കാര്മല് ഇടവകാംഗം. ജോയ് ആലുക്കാസ് ഗ്രൂപ്പിന്റെ തൃശൂരിലെ കോര്പറേറ്റ് ഓഫീസില് ഡിജിറ്റല് മീഡിയ മാനേജരാണ്. മികച്ച ഗായകന് കൂടിയായ പ്രവീണ് നിരവധി ഭക്തിഗാന കാസറ്റുകളില് പാടിയിട്ടുണ്ട്. ഭാര്യ: ആന് മരിയ. മക്കള്: തെരേസ്, ജോവന്ന, റോസ്.
https://www.facebook.com/Malayalivartha
