മുന്തിയ കാറുകളില്‍ താരങ്ങള്‍ ചീറിപ്പാഞ്ഞുപോകുന്നതിനിടെ ഒരു മിന്നായം പോലൊന്നു കണ്ടെന്നൊക്കെ പറയുന്ന കഥകളാണ് നാം കൂടുതലും കേള്‍ക്കാറുള്ളത്. സാധാരണക്കാരെ അവരൊന്നും വണ്ടിയില്‍ കയറ്റിക്കൊണ്ടുപോയതായ കഥകളും ആരും പറഞ്ഞറിഞ്ഞിട്ടുമില്ല.

സ്കൂള്‍ വിട്ടുവരവേ, നടന്നു മടുത്തപ്പോള്‍ ഇനി വരുന്ന വണ്ടിക്കാരനോട് ലിഫ്റ്റ് ചോദിക്കാമെന്ന് രണ്ടു വിദ്യാര്‍ത്ഥികള്‍ തീരുമാനിച്ചു. അപ്പോഴാണ് ഒരു കാര്‍ വരുന്നത് കണ്ടത്. ആരുടെ വണ്ടിയാണെന്ന് അറിയാതെ അവര്‍ കൈ കാണിച്ചു. നിര്‍ത്തിയ കാറിന്റെ പുറകിലത്തെ സീറ്റില്‍ അവര്‍ കയറി. കാറില്‍ ഡ്രൈവര്‍ സീറ്റിലുള്ള ആളെകൂടാതെ മുന്‍നിരയില്‍ മറ്റൊരാള്‍ കൂടി ഇരിക്കുന്നുണ്ട്.

അയാള്‍ കുട്ടികളേയും ഡ്രൈവര്‍ സീറ്റിലിരിക്കുന്ന ആളേയും ചേര്‍ത്ത് ഒരു സെല്‍ഫി എടുത്ത് കുട്ടികളെ കാണിച്ചു. സെല്‍ഫി കണ്ട അവര്‍ ഞെട്ടിപ്പോയി. തങ്ങള്‍ കൈകാണിച്ചപ്പോള്‍ വണ്ടി നിര്‍ത്തി തങ്ങളെ വണ്ടിയില്‍ കയറ്റിയ ആ ഡ്രൈവര്‍ സുരാജ് വെഞ്ഞാറമ്മൂട് ആയിരുന്നുവെന്ന് അറിഞ്ഞ വിദ്യാര്‍ത്ഥികള്‍ക്ക് ഒരേ സമയം ഞെട്ടലും സന്തോഷവും ഉണ്ടായി.

അതേക്കുറിച്ച് യാത്രയില്‍ ഇവര്‍ക്കൊപ്പമുണ്ടായിരുന്ന സുരാജിന്റെ സുഹൃത്ത് ദിലീപിന്റെ ഫെയ്‌സ്ബുക്ക് കുറിപ്പിങ്ങനെ: ഞാനും സുരാജും തിരുവനന്തപുരത്ത് നിന്ന് വെഞ്ഞാറമൂട്ടിലേയ്ക്കുള്ള യാത്രയില്‍ മണ്ണന്തലയില്‍ നിന്ന് രണ്ട് സ്‌കൂള്‍ കുട്ടികള്‍ കാര്‍ കൈകാണിച്ച് നെര്‍ത്തി. വണ്ടിയില്‍ കയറിയ കുട്ടികള്‍ക്ക് ഡ്രൈവറെ വെച്ച് ഒരു സെള്‍ഫി ഞാനെടുത്തുകാണിച്ചപ്പോള്‍ അവരുടെ മുഖത്തെ സന്തോഷം ഞാനറിഞ്ഞു.