നൂറോളം പൂച്ചകള്ക്ക് ഒരേയൊരു സൈതലവി!
മലപ്പുറം പരപ്പനങ്ങാടി സ്വദേശി മോയങ്ങാട് സൈതലവി ജോലി നോക്കുന്നതും താമസിക്കുന്നതും ദമ്മാമിലും ഖോബാറിലുമായാണ്. സ്വന്തക്കാരേയും ബന്ധുക്കളേയുമൊക്കെ വിട്ട് പ്രവാസജീവിതം നയിക്കുന്നതിനിടയില് അവിടെ സൈതലവിയെ കാത്തിരിക്കാനും കണ്ണുകളും കാതുകളുമുണ്ട്.
ഡ്രൈവറായി ജോലി നോക്കുന്ന ദമ്മാമിലും ഖോബാറിലുമായി സൈതലി പോറ്റി വളര്ത്തുന്നത് തെരുവിലെ 100-ലധികം പൂച്ചകളെയാണ്. അന്നവുമായെത്തുന്ന സൈതലവിയെ നിശ്ചിത സമയത്ത് പൂച്ചകള് കാത്തിരിക്കും. അപൂര്വ സ്നേഹബന്ധത്തിന്റെ അനുഭവമാണ് സൈതലവിയുടേയും അദ്ദേഹത്തെ കാത്തിരിക്കുന്ന പൂച്ചകളുടേയും കഥ.
മൂന്ന് വര്ഷം മുമ്പാണ് ഈ പ്രവാസി പൂച്ചകളുടെ സംരക്ഷണം ഏറ്റെടുക്കുന്നത്. അഖറബിയയില് താമസിക്കുന്ന സമയത്ത് അവിടെ ഒരു സ്വദേശി പൗരന് പരിസരത്തുള്ള പൂച്ചകള്ക്ക് ഭക്ഷണം നല്കുന്നത് സൈതലവി എന്നും ശ്രദ്ധിച്ചിരുന്നു. ഇദ്ദേഹം അവിടെ നിന്ന് താമസം മാറിപ്പോയതോടെ അന്നം നഷ്ടപെട്ട പൂച്ചകളുടെ ദയനീയ സ്ഥിതി സൈതലവിയുടെ കരളലിയിച്ചു. അതോടെ ഈ പൂച്ചകളുടെ സംരക്ഷണം സൈതലി ഏറ്റെടുത്തു.
അടുത്തുള്ള അഫ്ഗാനിയുടെ കടയില് നിന്ന് രാത്രി അധികം വരുന്ന ചിക്കന് കഷ്ണങ്ങള് വാങ്ങി പൂച്ചകളെ തീറ്റിച്ചു. അറിഞ്ഞും പറഞ്ഞും കേട്ടാവണം പുതിയ പുതിയ പൂച്ചകള് ഈ സല്ക്കാരത്തില് പങ്കെടുക്കാന് വന്നുകൊണ്ടിരുന്നു. എല്ലാവരേയും സൈതലവി സന്തോഷത്തോടെ സ്വീകരിച്ചു.
ജോലിയുടെ ഭാഗമായി പോകുന്നിടങ്ങളിലൊക്കെ കാണുന്ന പൂച്ചകള്ക്കായി സൈതലവി അന്നം കരുതിവെച്ചു. പുലര്ച്ചെ മുതല് രാത്രി വരെ പലയിടങ്ങളിലായി ഈ മനുഷ്യന് പോറ്റി വളര്ത്തുന്നത് നൂറിലധികം പൂച്ചകളെയാണ്. അതിരാവിലെ ടയോട്ടയിലെ പച്ചക്കറി മാര്ക്കറ്റില് എത്തുന്ന അന്നദാതാവിനെ കാത്ത് പൂച്ചകള് അവിടെയുമിവിടെയുമൊക്കെയായി കാത്തുനില്ക്കും.
ഏതൊക്കെ വാഹനങ്ങള് വന്നു പോയാലും അവര്ക്ക് ഒരു കുലുക്കവുമുണ്ടാകില്ല. സൈതലവിയുടെ വാനിന്റെ ശബ്ദം പോലും ഈ പൂച്ചകള്ക്ക് തിരിച്ചറിയാം. അത് എത്തുമ്പോഴേക്കും എല്ലാവരും ഓടിയടുക്കും. മക്കളെ വിളിക്കുന്നതുപോലെ മോനൂ എന്നാണ് സൈതലവി പൂച്ചകളേയും വിളിക്കുന്നത്. ഈ വിളികേള്ക്കുമ്പേഴേക്കും എല്ലാവരും അനുസരണയോടെ കാത്തുനില്ക്കും.
https://www.facebook.com/Malayalivartha