തെക്കന് പസഫിക് സമുദ്രത്തില് നിന്ന് ഉയര്ന്നുവന്ന 'അദ്ഭുത' ദ്വീപിനെ കണ്ടുപിടിച്ചത് നാസയുടെ സാറ്റലൈറ്റ് കണ്ണ്
അധികകാലമായിട്ടില്ല ഭൂമിയില് സാറ്റലൈറ്റ്-കണ്ണെത്താവുന്നിടത്തോളം ഭാഗങ്ങളിലെല്ലാം നാസയുടെ 'മാപ്പിങ്' ആരംഭിച്ചിട്ട് . അങ്ങനെ ഒരു പ്രദേശത്തിന്റെ തന്നെ ചിത്രങ്ങള് തുടരെത്തുടരെയെടുക്കാന് തുടങ്ങിയതിനു ശേഷം ഇതാദ്യമായി അവര്ക്കു മുന്നില് ഒരു 'അദ്ഭുത ദ്വീപ്' ഉയര്ന്നു വന്നു. തെക്കന് പസഫിക് സമുദ്രത്തില് 2014 ഡിസംബറിനും 2015 ജനുവരിക്കും ഇടയിലായിരുന്നു അത്. ടോംഗോയ്ക്കു സമീപം ഹുംഗ ടോംഗ, ഹുംഗ ഹാപയ് എന്നിങ്ങനെ രണ്ടു ദ്വീപുകള് നേരത്തേയുണ്ട്. ഇവയ്ക്കു നടുവിലെ അഗ്നിപര്വതം പൊട്ടിയാണ് പുതിയ ദ്വീപ് ഉയര്ന്നു വന്നത്.
അഗ്നിപര്വതത്തിലെ ചാരവും മറ്റും കുമിഞ്ഞുകൂടിയുണ്ടാകുന്ന ദ്വീപുകള് സാധാരണഗതിയില് തിരയടിയില്പ്പെട്ട് വൈകാതെ നശിച്ചു പോവുകയാണ് പതിവ്. എന്നാല് ചെടികളും പക്ഷികളുമെല്ലാമായി ആ ദ്വീപില് ഒരു ആവാസവ്യവസ്ഥ തന്നെ രൂപപ്പെട്ടിരിക്കുന്നുവെന്ന് തുടര്ച്ചയായ സാറ്റലൈറ്റ് നിരീക്ഷണത്തില് നാസ തിരിച്ചറിഞ്ഞു. ആറു മുതല് 30 വര്ഷം വരെ അതു കടലില് നിലനില്ക്കാനുള്ള സാധ്യതയും നാസ കഴിഞ്ഞ വര്ഷം പുറത്തിറക്കിയ റിപ്പോര്ട്ടില് വ്യക്തമാക്കി. ഡ്രോണ്, സാറ്റലൈറ്റ് ചിത്രങ്ങള് പരിശോധിച്ചതില് നിന്നായിരുന്നു അത്. അതിനു പിന്നാലെ 2017 ഒക്ടോബറില് നാസയുടെ ഗോദര്ദ് സ്പെയ്സ് ഫ്ലൈറ്റ് സെന്ററിലെ ഒരു കൂട്ടം ഗവേഷകര് ദ്വീപിലെത്തി. ദ്വീപില് കാലുകുത്തുന്ന ആദ്യത്തെ സംഘമായിരുന്നു അത്. അവരെ അവിടെ കാത്തിരുന്നതാകട്ടെ ശരിക്കും അദ്ഭുതപ്പെടുത്തുന്ന കാഴ്ചകളും.
കടല്ച്ചെടികള് നിറഞ്ഞു കഴിഞ്ഞിരുന്നു ദ്വീപില്. സമീപത്തെ രണ്ടു ദ്വീപുകളില് നിന്നായിരിക്കും വിത്തുകള് എത്തിയതെന്നു കരുതുന്നു. പക്ഷിക്കാഷ്ഠവും മറ്റും സമൃദ്ധമായതോടെ ചെടികള്ക്കുള്ള വളവും ലഭിച്ചു. കടല്പ്പക്ഷികളും ഒരിനം മൂങ്ങയും ദ്വീപിലെ അന്തേവാസികളായി മാറിയിരുന്നു.
ഏറ്റവും അദ്ഭുതപ്പെടുത്തിയത് ദ്വീപിലെ മണ്ണായിരുന്നു. പരിശോധനയില് അത് അഗ്നിപര്വതത്തില് നിന്നുള്ള ചാരമല്ലെന്നു വ്യക്തമായി. പശിമയുള്ള ചെളിക്ക് സമാനമായിരുന്നു ദ്വീപിലെ മണ്ണ്. ഇളംകറുപ്പ് നിറമായിരുന്നു അതിന്. പലയിടത്തും ചരല്പോലെ കറുത്ത നിറത്തിലുള്ള വസ്തുക്കളുമുണ്ടായിരുന്നു. ഭൂമിയില് ഇന്നേവരെ കാണാത്ത തരം മണ്ണില് ചെടികള് വളരുന്നതാണ് ഗവേഷകരെ ഏറെ അമ്പരപ്പിച്ചത്.
മണ്ണിനെപ്പറ്റി കൂടുതല് ഗവേഷണത്തിനൊരുങ്ങുകയാണ് അവര്. കോടിക്കണക്കിനു വര്ഷങ്ങള്ക്കു മുന്പു ചൊവ്വാഗ്രഹത്തിലും വെള്ളമുണ്ടായിരുന്നെന്നാണ് കണക്കാക്കുന്നത്. അന്നു വന്തോതില് അഗ്നിപര്വതങ്ങളും അവിടെയുണ്ടായിരുന്നു. ഇവ രണ്ടും എങ്ങനെ പ്രവര്ത്തിച്ചിരുന്നുവെന്ന് അറിയാനും 'ഹുംഗ ടോംഗ' ദ്വീപ് സഹായിക്കുമെന്നാണു നാസയുടെ പ്രതീക്ഷ.
കഴിഞ്ഞ വര്ഷത്തെ നാസയുടെ റിപ്പോര്ട്ടില് നിന്നു വ്യത്യസ്തമായി ദ്വീപില് പലയിടത്തും ശോഷണവും ശ്രദ്ധയില്പ്പെട്ടിട്ടുണ്ട്. തിരയടി ശക്തമായ തെക്കന് ഭാഗത്താണ് ഏറെ ഭീഷണി. മഴയും പ്രശ്നം സൃഷ്ടിക്കുന്നുണ്ട്. വിചാരിച്ചതിലും വേഗത്തില് ദ്വീപ് എങ്ങാനും ഇല്ലാതാകും മുന്പ് പഠനവും പൂര്ത്തിയാക്കാനാണ് നാസയുടെ ശ്രമം. അതിസൂക്ഷ്മ ജിപിഎസ് സംവിധാനവും ഡ്രോണും ഉപയോഗിച്ച് ദ്വീപിന്റെ 3ഡി മാപ്പിങ് നടക്കുകയാണിപ്പോള്.
https://www.facebook.com/Malayalivartha