കലണ്ടര്‍ ശില്പികള്‍ക്ക് ക്രിസ്തു വര്‍ഷം കണക്കാക്കിയതില്‍ തെറ്റ് പറ്റിയിട്ടുണ്ടെന്നും നാം ഇപ്പോള്‍ 2019-ലല്ല 2023-ലാണെന്നും കുവൈത്തി ഗോളശാസ്ത്രജ്ഞന്‍ ഡോ.സാലിഹ് അല്‍ ഉജൈരി അവകാശപ്പെടുന്നു.

സൗദിയിലെ അല്‍ ഖസീം യൂണിവേഴ്‌സിറ്റി ജിയോഗ്രഫി വിഭാഗം അധ്യാപകന്‍ ഡോ. അബ്ദുല്ല അല്‍ മുസ്‌നദ് ഇതിനെ പിന്തുണക്കുകയും ചെയ്യുന്നു. ഏഴാം നൂറ്റാണ്ടിലെ കലണ്ടര്‍ ശില്പികള്‍ക്ക് ക്രിസ്തുവിന്റെ ജനനം കണക്കാക്കിയതില്‍ തെറ്റ് പറ്റിയിരുന്നെങ്കിലും അവര്‍ അത് തിരുത്താനും തങ്ങളുടെ പ്രഖ്യാപനത്തില്‍ നിന്ന് പിന്മാറാനും തയാറായില്ല എന്നാണ് ഡോ. സാലിഹ് അല്‍ ഉജൈരിയുടെ പക്ഷം. മൂന്നു വര്‍ഷം പിന്നിലായാണ് അവര്‍ കലണ്ടര്‍ കണക്കാക്കിയത്.

തെറ്റ് ബോധ്യപ്പെട്ടപ്പോള്‍ അതുവരെ കലണ്ടര്‍ ഉപയോഗിച്ചവര്‍ ആശയക്കുഴപ്പത്തിലാവും എന്ന ന്യായത്തില്‍ തിരുത്താതിരിക്കുകയാണുണ്ടായതത്രേ. വര്‍ഷത്തിലെ മാസങ്ങളുടെ കണക്കിലും തെറ്റുണ്ട്. മാര്‍ച്ച് ആയിരുന്നു വര്‍ഷത്തിലെ ആദ്യമാസമായി കണക്കാക്കിയിരുന്നത്. പിന്നീടത് യേശുവിന്റെ ജനന മാസമായ ഡിസംബറിന് ശേഷമുള്ള ജനുവരിയില്‍ തുടക്കമായി മാറ്റി നിശ്ചയിക്കുകയായിരുന്നു എന്നും ഡോ. സാലിഹ് അല്‍ ഉജൈരി പറയുന്നു.

സെപ്റ്റംബര്‍ എന്ന വാക്കിന് ഏഴ് എന്നാണ് അര്‍ഥം, ഒമ്പതല്ല. ഒക്ടോബര്‍ എട്ടും നവംബര്‍ ഒമ്പതും ഡിസംബര്‍ പത്തും എന്ന് അര്‍ഥങ്ങള്‍ വരുന്ന പദങ്ങളാണെന്നും അദ്ദേഹം വിശദീകരിക്കുന്നു. ക്രിസ്തു വര്‍ഷം കണക്കൊപ്പിക്കാന്‍ പത്ത് ദിവസത്തെ കുറവ് വരുത്തിയിട്ടുമുണ്ട്. അതനുസരിച്ചു 2019 ഫെബ്രു. ഏഴ് എന്ന് നാം കലണ്ടറില്‍ കാണുന്ന ദിവസം യഥാര്‍ഥത്തില്‍ 2023 ജനുവരി 28 ആണെന്നും ഡോ. സാലിഹ് അല്‍ ഉജൈരി അവകാശപ്പെടുന്നു.