വാലന്റൈന്‍സ് ഡേ ഉണ്ടായത് അങ്ങനെയാണ്..!
വാലന്റൈന്‍സ് ഡേ അഥവാ പ്രണയദിനമാണ് ഇന്ന്. പ്രണയത്തിനായി മാറ്റിവച്ച ഒരു ദിനം. ഇതു കേട്ടാല്‍ തോന്നും ഈ ഒരു ദിവസം മാത്രമേ പ്രണയിക്കാവൂ എന്ന്. എന്നാല്‍ പ്രണയത്തിനു നേരവും കാലവും മൂക്കും കണ്ണും ഒന്നും ഇല്ല. ആര്‍ക്കും ആരെയും എപ്പോള്‍ വേണമെങ്കിലും പ്രേമിക്കാം.
ഒരു മനുഷ്യജീവിതത്തില്‍ ഇതെല്ലാം സാധാരണ സംഭവിക്കുന്ന കാര്യങ്ങള്‍ ആണ്. എന്നാല്‍ പ്രേമിച്ചു പ്രേമിച്ച് നിരാശയില്‍ ആണ്ടുപോയിട്ടുള്ളവരും ഇതേത്തുടര്‍ന്ന് ആത്മഹത്യ ചെയ്തവരും ധാരാളമുണ്ട്. കാര്യങ്ങള്‍ എന്തൊക്കെ ആണെങ്കിലും യുവമനസ്സുകള്‍സന്തോഷം കൊണ്ടുനിറയുന്ന ദിനമാണ്, പ്രത്യേകിച്ച് കോളജ് വിദ്യാര്‍ഥികള്‍ക്കും ചെറുപ്പക്കാര്‍ക്കും മനസുതുറന്ന് ആഘോഷിക്കാവുന്ന ഒരു ദിവസം.
മറ്റുള്ള നാടുകളില്‍ വളരെക്കാലം മുമ്പു മുതലേ ഇത് ആഘോഷിച്ചു വരുന്നുണ്ട്. എന്നാല്‍ നമ്മുടെ നാട്ടിലേക്ക് ഈ അടുത്ത കാലത്താണ് ഇതിന്റെ 'ആചാരാനുഷ്ഠാനങ്ങള്‍' എത്തിയത് എന്നുവേണമെങ്കില്‍ പറയാം. പാശ്ചാത്യ രാജ്യങ്ങളില്‍ ഇതിനു സെന്റ് വാലന്‍ന്റൈന്‍സ് ഡേ എന്നാണ് പറയുന്നത്.
പുരാതനകാലത്തെ ഒരു വിശുദ്ധനെ ആദരിക്കുന്ന ഒരു തിരുനാള്‍ ആയി കണക്കാക്കുന്നു. പണ്ടുകാലത്ത് റോമില്‍ പടയാളികള്‍ വിവാഹിതരാകാന്‍ പാടില്ല എന്ന നിയമമുണ്ടായിരുന്നു. എന്നാല്‍ ആ സമയത്ത് വാലന്‍ന്റൈന്‍ വിശുദ്ധന്‍ ആരും അറിയാതെ രഹസ്യമായി പലര്‍ക്കും വിവാഹം നടത്തിക്കൊടുക്കുകയും, പ്രണയിക്കുന്നവരെ തമ്മില്‍ അടുപ്പിക്കുകയും ചെയ്തു. അദ്ദേഹം ചെയ്തത് നല്ല കാര്യമായിരുന്നുവെങ്കിലും നിയമത്തിന്റെ മുമ്പില്‍ അദ്ദേഹം തെറ്റുകാരനായി കണക്കാക്കപ്പെട്ടു. തുടര്‍ന്ന് ജയിലില്‍ അടച്ച അദ്ദേഹത്തെ ഏറെ താമസിക്കാതെ തൂക്കിലേറ്റുകയും ചെയ്തു. അന്ന് അത് പലര്‍ക്കും മനസില്‍ വലിയ വേദനയുളവാക്കിയ കാര്യമായിരുന്നു.
അദ്ദേഹത്തിന്റെ മരണ ദിനമായ ഫെബ്രുവരി 14, പ്രേമത്തിന്റെ ദിവസമായി ആഘോഷിക്കാന്‍ തുടങ്ങിയത് പിന്നീട് പതിനാലാം നൂറ്റാണ്ടിലാണ്. എന്നാല്‍ അത് ഒരു അവധി ദിവസമായി ഒരിടത്തും പ്രഖ്യാപിച്ചിട്ടില്ല. എങ്കിലും ആഘോഷങ്ങള്‍ നടന്നു. അങ്ങനെ 18-ാം നൂറ്റാണ്ടില്‍ ഇത് കുറെക്കൂടെ പരസ്യമായി സമ്മാനങ്ങള്‍ കൈമാറിയും ആഘോഷിക്കാന്‍ തുടങ്ങി. ആദ്യമൊക്കെ പൂക്കള്‍ കൈമാറുമായിരുന്നു. അതും ചുവന്ന റോസാപൂക്കള്‍. സ്‌നേഹത്തിന്റേയും ഹൃദയത്തിന്റേയും തനിനിറം എന്നാണ് കടുംചുവപ്പിനെ വിശേഷിപ്പിച്ചത്.
പിന്നീട് ചോക്ലേറ്റ്‌സ്, ആശംസാ കാര്‍ഡുകള്‍, ഹൃദയത്തിന്റെ ആകൃതിയിലുള്ള കേക്കുകള്‍, ആഭരണങ്ങള്‍ എന്നിങ്ങനെ പലതും സമ്മാനത്തിന്റെ പട്ടികയില്‍ കയറിപ്പറ്റി. യൂറോപ്പില്‍ സെന്റ് വാലന്‍ന്റൈന്‍സ് താക്കോലുകള്‍ തന്റെ കാമുകിക്കോ കാമുകനോ കൊടുക്കും. ഇതുകൊണ്ട് ആ കൊടുക്കുന്ന ആളിന്റെ ഹൃദയം തുറക്കാനുള്ളതാണത്രേ. അങ്ങനെ പലതരം കളിതമാശകള്‍ ഈ വാലന്‍ന്റൈന്‍സ് ദിനത്തില്‍ നടക്കാറുണ്ട്.
https://www.facebook.com/Malayalivartha
