തന്നെ ഉപേക്ഷിച്ച് കടന്ന യജമാനനു പിന്നാലെ ഓടുന്ന വളര്‍ത്തുനായ!
വളര്‍ത്തുനായയെ വഴിയരികില്‍ ഉപേക്ഷിച്ചതിനു ശേഷം കാറില്‍ കടന്നു കളഞ്ഞ ഉടമയുടെ പിന്നാലെ നായ ഓടുന്നതിന്റെ ഹൃദയഭേദകമായ ദൃശ്യങ്ങള്‍ ആരുടേയും കണ്ണു നനയിക്കും. കാലിഫോര്‍ണിയയിലെ ബേക്കെര്‍സ് ഫീല്‍ഡിലുള്ള ലേക്ക് മിംഗിലാണ് സംഭവം നടന്നത്.
തന്റെ ശരീരത്തിലേക്ക് ചാടി കയറി കളിച്ചു കൊണ്ടിരിക്കുന്ന നായയെ മാറ്റി വിടുവാന്‍ ശ്രമിക്കുന്ന ഉടമ കുറച്ചു സമയത്തിനു ശേഷം നായയെ തള്ളി മാറ്റിയതിനു ശേഷം കാറില്‍ കയറി ഓടിച്ചു പോകുകയായിരുന്നു.
പരിഭ്രാന്തിയിലായ നായ കാറിനു പിന്നാലെ ഓടിയെങ്കിലും വാഹനം നിര്‍ത്തുവാന്‍ ഉടമ കൂട്ടാക്കിയില്ല. ഉടമയും നായയും നില്‍ക്കുന്നിടത്തു നിന്നും കുറച്ചു മാറി നിര്‍ത്തിയിട്ടിരുന്ന ഒരു കാറിലെ ഡ്രൈവറാണ് ഈ ദൃശ്യങ്ങള്‍ പകര്‍ത്തിയത്.
ഈ സമയം എതിര്‍ വശത്തു നിന്നും വന്ന മറ്റൊരു വാഹനത്തില്‍ ഈ നായ ഇടിക്കുവാന്‍ തുടങ്ങുന്നതും വീഡിയോയില്‍ വ്യക്തമാണ്. സോഷ്യല്‍മീഡിയയില്‍ പങ്കുവച്ചിരിക്കുന്ന വീഡിയോ വൈറലായി മാറുകയാണ്.
ഇതിനെ തുടര്‍ന്ന് കെണ്‍ കൗണ്ടി ആനിമല്‍ സര്‍വീസ് ഈ ഉടമയ്‌ക്കെതിരെ നിയമനടപടി സ്വീകരിച്ചിട്ടുണ്ട്. മാത്രമല്ല ഇയാളെക്കുറിച്ച് അറിയാവുന്നവര്‍ തങ്ങള്‍ക്ക് വിവരം നല്‍കണമെന്നും അഭ്യര്‍ത്ഥിച്ചിട്ടുണ്ട്.
https://www.facebook.com/Malayalivartha
