ഇപ്പോള്‍ സമൂഹമാധ്യമങ്ങളില്‍ ചര്‍ച്ചയാകുകയാണ് ചീങ്കണ്ണിയും പെരുമ്പാമ്പും തമ്മിലുള്ള ജീവന്‍മരണ പോരാട്ടത്തിന്റെ ദൃശ്യങ്ങള്‍. ഫ്‌ലോറിഡയിലെ എവര്‍ഗ്ലേഡ് നാഷണല്‍ പാര്‍ക്കിലാണ് സംഭവം നടന്നത്. തദേശവാസിയായ റിച്ച് ക്രൂഗറാണ് ദൃശ്യങ്ങള്‍ പകര്‍ത്തി സമൂഹമാധ്യമങ്ങളില്‍ പങ്കുവച്ചത്.

മനുഷ്യനെ വരെ ഒന്നോടെ വിഴുങ്ങാന്‍ കഴിയുന്ന കൂറ്റന്‍ പെരുമ്പാമ്പാണ് ചീങ്കണ്ണിയുമായി പോരാടിയത്. ഏകദേശം പത്തടിയോളം നീളമുണ്ടായിരുന്നു പെരുമ്പാമ്പിന്.കുറച്ചു സമയത്തെ ചെറുത്തു നില്‍പിനു ശേഷം ഒടുവില്‍ പെരുമ്പാമ്പ് അടിയറവ് പറഞ്ഞു. അല്‍പസമയത്തിനകം തന്നെ പെരുമ്പാമ്പിനെ ചീങ്കണ്ണി അകത്താക്കുകയും ചെയ്തു.

ഇതിലെന്താ ഇത്ര പുതുമ എന്നു ചോദിക്കാന്‍ തോന്നുന്നുണ്ടാവും. ഇത്ര ഭീമാകാരനായ ഒരു ചീങ്കണ്ണിയ്ക്ക് ഒരു പെരുമ്പാമ്പിനെ കീഴടക്കാന്‍ നിഷ്പ്രയാസം സാധിക്കുന്ന കാര്യമല്ലേ എന്നാണോ?

എന്നാല്‍ ഇതറിയൂ. എപ്പോഴും വിജയം ചീങ്കണ്ണിക്കായിരിക്കണമെന്നില്ല. കഴിഞ്ഞ വര്‍ഷവും ഇവിടെ സമാനമായ പോരാട്ടം നടന്നിരുന്നു.അന്ന് പത്തടിയോളം നീളമുള്ള ബര്‍മീസ് പൈതണ്‍ നാലടിയോളം നീളമുള്ള ചീങ്കണ്ണിയെ നിഷ്പ്രയാസം കീഴടക്കിയിരുന്നു.

ഒടുവില്‍ പെരുമ്പാമ്പിന്റെ പിടിയില്‍ നിന്ന് ചീങ്കണ്ണിയെ രക്ഷിക്കാന്‍ പാമ്പ് പിടിത്ത വിദഗ്ദ്ധര്‍ വരേണ്ടിവന്നു. അധിനിവേശ ജീവികളായ ബര്‍മീസ് പെരുമ്പാമ്പുകള്‍ അധികമുള്ള ഫ്‌ലോറിഡയില്‍ ഇത്തരം പോരാട്ടങ്ങള്‍ സാധാരണമാണ്.