അങ്ങാടിക്കുരുവിയെക്കാള്‍ അല്‍പംകൂടി ചെറിയ പക്ഷിയാണ് താലിക്കുരുവി(Grey-breasted Prinia). സദാ ചിലച്ചുകൊണ്ട് ഇലകളിലും ചില്ലകളിലും ചാഞ്ചാടിയും തുള്ളിക്കളിച്ചും വിഹരിക്കുന്ന, അടങ്ങിയിരിക്കാന്‍ ഇഷ്ടമില്ലാത്ത ഒരു കൊച്ചു പക്ഷി. അഞ്ചും ആറും എണ്ണമുള്ള കൂട്ടമായാണു മിക്കവാറും ഇവയെ കാണാനാവുക. ചില കൂട്ടങ്ങളില്‍ ഇരുപതും മുപ്പതുംവരെ പക്ഷികളുണ്ടാകും. ചിലപ്പോഴൊക്കെ ഒറ്റയ്ക്കും രണ്ടെണ്ണത്തെ ഒരുമിച്ചും കാണാം.

താലിക്കുരുവികള്‍ കേരളത്തില്‍ മിക്കയിടത്തുമുണ്ട്. പൊന്തകളിലും കുറ്റിക്കാടുകളിലും മുളങ്കൂട്ടങ്ങളിലും ഇലപൊഴിയും കാടുകളിലും കണ്ടല്‍കാടുകളിലും കൃഷിയിടങ്ങളിലുമെല്ലാം ഇവയെ കാണാം. ഇന്ത്യയില്‍ മിക്കയിടങ്ങളിലും ശ്രീലങ്ക, പാക്കിസ്ഥാന്‍, ബംഗ്ലദേശ്, ഭൂട്ടാന്‍ തുടങ്ങിയ സമീപ രാജ്യങ്ങളിലും താലിക്കുരുവികളും അവയുടെ വ്യത്യസ്ത ഉപവിഭാഗങ്ങളും കാണപ്പെടുന്നുണ്ട്. പശ്ചിമ ഘട്ടത്തില്‍ കാണപ്പെടുന്ന ഉപവിഭാഗത്തിന്റെ മാറില്‍ സന്താനോല്‍പാദന കാലത്തു വീതികൂടിയ ചാരത്താലി പ്രത്യക്ഷപ്പെടും.

വണ്ടുകള്‍, ഉറുമ്പുകള്‍, തുമ്പികള്‍ തുടങ്ങിയ പ്രാണികളും പുഴുക്കളുമാണ് താലിക്കുരുവിയുടെ മുഖ്യാഹാരം. മുരിക്ക്, ചമത തുടങ്ങിയ വൃക്ഷങ്ങളുടെ പൂക്കളില്‍നിന്ന് തേന്‍ ഉണ്ണുന്ന ശീലമുണ്ട്. തേന്‍ നുകരുമ്പോള്‍ കൊക്കിലും മുഖത്തും പൂമ്പൊടി പറ്റിപ്പിടിക്കും. ചിലപ്പോള്‍ പൂമ്പൊടി പറ്റിപ്പിടിച്ചു നെറ്റിത്തടത്തിനു നിറവ്യത്യാസം ഉണ്ടാകാറുണ്ട്. ഇതു പക്ഷിയെ തിരിച്ചറിയുന്നതിനു ബുദ്ധിമുട്ടുണ്ടാക്കിയേക്കാം. ചില പൂമരങ്ങളില്‍ പരാഗണം നടത്താന്‍ താലിക്കുരുവി സഹായിക്കാറുണ്ട്.

പ്രജനന കാലമായാല്‍ ആണ്‍പക്ഷി പെണ്ണിനെ ആകര്‍ഷിക്കാനായി ഉച്ചത്തില്‍ നിര്‍ത്താതെ പാടിക്കൊണ്ടിരിക്കും. വായുവില്‍ കരണംമറിഞ്ഞു പറന്നും പൂവന്‍ പിടയെ വശീകരിക്കാറുണ്ട്. സാധാരണയായി ഒരു കൂട്ടില്‍ മൂന്ന് മുട്ടയിടും. ഇളം വെളുപ്പോ ഇളം നീലയോ നിറത്തിലുള്ള മുട്ടയുടെ പുറംതോടില്‍ ധാരാളം തവിട്ടു പുള്ളികളും അടയാളങ്ങളും കാണാം. വിരളമായി പുള്ളികളില്ലാത്ത മുട്ടയും കാണാറുണ്ട്. കൂടു നിര്‍മാണം പൂര്‍ത്തിയാകുംമുന്‍പേ മുട്ടയിട്ടുതുടങ്ങും. പൂവനും പിടയും അടയിരിക്കാറുണ്ട്. 10-11 ദിവസമാണ് അടയിരിപ്പുകാലം.

കുഞ്ഞുങ്ങള്‍ പറക്കാറായാലും അച്ഛനമ്മമാര്‍ കുറേക്കാലത്തേക്ക് അവയെ ഒപ്പം കൊണ്ടുനടന്നു തീറ്റിപ്പോറ്റും. പക്ഷിയുടെ പുറത്തിന് ഇളംതവിട്ടു കലര്‍ന്ന ചാരനിറമാണ്. അടിഭാഗം വെളുത്തിട്ടും. വെളുത്ത പുരിക അടയാളം കാണാം. വാലില്‍ വെളുപ്പും കറുപ്പും നിറത്തിലുള്ള പട്ടകളുണ്ട്. വാലറ്റത്തിന് വെളുപ്പുനിറമാണ്. കൂടുകൂട്ടുന്ന കാലത്തു മാറില്‍ ചാരത്താലി പ്രത്യക്ഷപ്പെടും. പുരികവര അവ്യക്തമാകും.