ദുബായ് ഡ്യൂട്ടി ഫ്രീ മില്ലെനിയം മില്യനയറിന്റെ ചൊവ്വാഴ്ച നടന്ന നറുക്കെടുപ്പില്‍ 7 കോടി രൂപ (10 ലക്ഷം യുഎസ് ഡോളര്‍) യിലേറെ സമ്മാനം നേടിയത് തലശ്ശേരി സ്വദേശി അരയിലകത്ത് മുഹമ്മദ് അസ്‌ലം(31) ആണ്. അസ്ലം ഒരിക്കലും പ്രതീക്ഷിച്ചിരുന്നില്ല തനിക്കായി കോടികളുടെ മണിമുഴങ്ങുമെന്ന്. അതുകൊണ്ട് തന്നെ കഴിഞ്ഞ മാസം നാട്ടിലേയ്ക്ക് പോയപ്പോള്‍ കൈയില്‍ കരുതിയ ടിക്കറ്റ്, തിരികെ ജോലിസ്ഥലത്തേയ്ക്ക് പറന്നപ്പോള്‍ വീട്ടില്‍ നിന്നെടുത്തുകൊണ്ട് വരുന്ന കാര്യം ഓര്‍മ്മയില്‍ വന്നില്ല.

ഉമ്മയുടെ മുന്‍പില്‍ വച്ച് ഉപ്പയുടെ കൈയിലായിരുന്നു ടിക്കറ്റ് നല്‍കിയത്. ആ സമയം ഒരു കാര്യം മാത്രം ആവശ്യപ്പെട്ടിരുന്നു. സമ്മാനം നേടാനായി പ്രാര്‍ഥിക്കണേ എന്ന്. ആ പ്രാര്‍ഥന ഫലിച്ചെന്ന് അസ്‌ലം പറയുന്നു.ഷാര്‍ജയില്‍ താമസിക്കുന്ന മുഹമ്മദ് അസ്‌ലം കഴിഞ്ഞ കുറേ വര്‍ഷങ്ങളായി ഷാര്‍ജ എമിറേറ്റ്‌സ് നാഷനല്‍ ഫാക്ടറി ഫോര്‍ പ്ലാസ്റ്റിക് ഇന്‍ഡസ്ട്രിയില്‍ അക്കൗണ്ടന്റാണ്. ദുബായിലെ ഐറിഷ് വില്ലേജില്‍ നിന്നാണ് നറുക്കെടുപ്പില്‍ പങ്കെടുക്കാനുള്ള ടിക്കറ്റ് വാങ്ങിയത്.

സമ്മാന വിവരം പറഞ്ഞ് അധികൃതരില്‍ നിന്ന് ഫോണ്‍ ലഭിച്ചപ്പോള്‍ വിശ്വസിക്കാനേ തോന്നിയില്ല. പിന്നീട് സംഗതി ശരിയാണെന്ന് ഉറപ്പായതോടെ ഏറെ സന്തോഷം തോന്നി. ഉടന്‍ തന്നെ നാട്ടിലേയ്ക്ക് ഫോണ്‍ വിളിച്ച് ടിക്കറ്റ് അവിടെ ഭദ്രമായുണ്ടെന്ന് ഉറപ്പുവരുത്തി. തുടര്‍ന്ന് ബന്ധുക്കളുടെയും സുഹൃത്തുക്കളുടെയും അഭിനന്ദനപ്രവാഹമായിരുന്നു. ഇതു സ്വീകരിച്ച് വൈകീട്ടോടെ ക്ഷീണിച്ചുപോയെന്ന് മുഹമ്മദ് അസ്‌ലം പറയുന്നു. നാട്ടില്‍ മറന്ന ടിക്കറ്റ് എടുത്തുകൊണ്ടുവരാനായി ഇദ്ദേഹം നാളെ യാത്ര തിരിക്കും.

കോടികള്‍ കൊണ്ട് എന്തു ചെയ്യണമെന്ന് തീരുമാനിച്ചിട്ടില്ല. എന്നാല്‍ പിതാവിന് എന്തെങ്കിലും വിലപിടിപ്പുള്ള സമ്മാനം നല്‍കണമെന്നും കുടുംബത്തെയെല്ലാവരെയും യുഎഇയിലേയ്ക്ക് സന്ദര്‍ശനത്തിനായി കൊണ്ടുവരണമെന്നും ആഗ്രഹമുണ്ട്. കഴിഞ്ഞ കുറേ വര്‍ഷങ്ങളായി കൂട്ടുകാരോടൊപ്പമായിരുന്നു മുഹമ്മദ് അസ്‌ലം ടിക്കറ്റെടുത്തിരുന്നത്. എന്നാല്‍ ഇത്തവണ ഒറ്റയ്ക്ക് തന്നെ വാങ്ങിക്കുകയായിരുന്നു.

ദുബായ് ഡ്യൂട്ടി ഫ്രീ നറുക്കെടുപ്പില്‍ ജേതാവാകുന്ന 139-ാമത്തെ ഇന്ത്യക്കാരനാണ് ഇദ്ദേഹം. ഇതേ നറുക്കെടുപ്പില്‍ മലയാളിയായ ജോണ്‍ കുര്യന്‍(56) ഓഡി ആര്‍8 ആര്‍ഡബ്ല്യുഎസ് വി10 കൂപെ കാര്‍ സ്വന്തമാക്കി. പുതുവത്സരത്തില്‍ നാട്ടിലേയ്ക്ക് പോകുമ്പോഴായിരുന്നു ഇദ്ദേഹം ടിക്കറ്റെടുത്തത്. കൂടാതെ, കാസര്‍കോട് ബങ്കര മഞ്ചേരം സ്വദേശി അബ്ദുല്ല(55)യ്ക്ക് ബിഎംഡബ്ല്യു ആര്‍9 കാറും സമ്മാനം ലഭിച്ചിരുന്നു.