ആറ് മണിക്കൂര്, റോസമ്മ പൊരിവെയിലില് കാത്തുനിന്ന് രാജീവ് ഗാന്ധിയെ കണ്ടു മടങ്ങി!
വയനാട് പുല്പ്പള്ളി സ്വദേശി ചേറ്റാനിയില് റോസമ്മ, രാജീവിന്റെ മകന് രാഹുല് ഗാന്ധി വയനാട്ടില് മത്സരിക്കുന്നുവെന്ന് കേട്ട അന്നു മുതല് ആവേശത്തിലാണ്.
1986-ല് രാജീവ് ഗാന്ധി വയനാട് ജില്ലയിലെത്തുന്നുണ്ടെന്ന് അറിഞ്ഞ റോസമ്മ ഭര്ത്താവ് ഔസേപ്പിനൊപ്പം ബത്തേരി സെന്റ് മേരീസ് കോളജ് ഗ്രൗണ്ടിലെ പൊരി വെയിലില് കാത്തുനിന്നത് ആറ് മണിക്കൂറാണ്.
രാജീവിനെ കാണുന്നതിനായി രാവിലെ പുറപ്പെട്ട റോസമ്മയും ഔസേപ്പും ഒമ്പതോടെ ബത്തേരിയിലെത്തി. അസഹ്യമായ ചൂട് കാലമായിരുന്നു അതെന്ന് 83-കാരിയായ റോസമ്മ ഓര്ത്തെടുക്കുന്നു.രാജീവിനെ കാണുന്നതിനായി ആയിരങ്ങളായിരുന്നു കോളജ് ഗ്രൗണ്ടില് തടിച്ച് കൂടിയിരുന്നത്. രാവിലെ എത്തുമെന്ന് അറിയിച്ചിരുന്നുവെങ്കിലും വൈകിട്ട് മൂന്നോടെയാണ് രാജീവ് എത്തിയത്.
ഇതിനിടെ ചൂട് അസഹ്യമായതിനാല് തിരിച്ചുപോകാം എന്ന് ഔസേപ്പ് പലതവണ പറഞ്ഞിരുന്നുവെങ്കിലും രാജീവിനെ കാണണമെന്നുള്ള ഇവരുടെ ആഗ്രഹത്തിന് മുന്നില് വഴങ്ങേണ്ടി വന്നു. അന്നും രാജീവിന് വധഭീഷണി ഉണ്ടായിരുന്നതിനാല് കനത്ത സുരക്ഷയാണ് ഒരുക്കിയിരുന്നതെന്ന് റോസമ്മ പറയുന്നു.അന്ന് ഒരു കൈപ്പാടകലെ നിന്ന് രാജീവിനെ കണ്ടാണ് ഇരുവരും മടങ്ങിയത്.
നെഹ്റു കുടുംബത്തിലെ ഇളമുറക്കാരന് ജില്ലയില്നിന്നും ജനവിധി തേടുമ്പോള് എന്തെന്നില്ലാത്ത സന്തോഷത്തിലാണ് റോസമ്മ. രാഹുലും പ്രിയങ്കയും പത്രിക നല്കുന്നതിനായി കഴിഞ്ഞ നാലിന് ജില്ലയിലെത്തിയപ്പോള് കാണണമെന്ന് അതിയായ ആഗ്രഹമുണ്ടായിരുന്നതായി ഈ അമ്മ പറയുന്നു.
രാഹുലും പ്രിയങ്കയും സോണിയയും ജില്ലയില് പ്രചാരണത്തിന് എത്തുമെന്ന് കോണ്ഗ്രസ് നേതൃത്വം പറയുന്നുണ്ടെങ്കിലും തിയതി വ്യക്തമാക്കിയിട്ടില്ല. ഇനിയൊരവസരമുണ്ടായാല് ഇരുവരെയും അടുത്ത് കാണണമെന്നാണ് ഇവരുടെ ആഗ്രഹം.
https://www.facebook.com/Malayalivartha