തോട്ടപ്പള്ളി തീരത്ത് വിരിഞ്ഞിറങ്ങിയത് 110 കടലാമ കുഞ്ഞുങ്ങള്!
ഗ്രീന് റൂട്സ് പ്രവര്ത്തകര് തോട്ടപ്പള്ളിയില് സംരക്ഷിച്ച 116 കടലാമ മുട്ടകളില് ഒലിവ് റിഡ്ഡി ഇനത്തില്പ്പെട്ട 110 കുഞ്ഞുങ്ങള് വിരിഞ്ഞു. 48 ദിവസം കൊണ്ടാണ് കടലാമ കുഞ്ഞുങ്ങള് വിരിഞ്ഞിറങ്ങിയത്.
കടുത്തചൂടിനെ ശാസ്ത്രീയമായി പ്രതിരോധിക്കാന് കഴിഞ്ഞതിനാലാണ് ഇത്രയും കുഞ്ഞുങ്ങളെ വിരിയിക്കാന് സാധിച്ചത്. ഇതിനുമുമ്പ് പല്ലനയില് 63 കുഞ്ഞുങ്ങളാണ് വിരിഞ്ഞത്. കഴിഞ്ഞ ഓഗസ്റ്റ് 14-നായിരുന്നു ആദ്യ കൂട് മുട്ടകള് ലഭിച്ചത്. ശക്തമായ മഴയേയും കടലാക്രമണ ഭീഷണിയേയും നേരിട്ട് 106 മുട്ടകളില് നിന്നും 53 കുഞ്ഞുങ്ങളാണ് വിരിഞ്ഞത്. കഴിഞ്ഞ സീസണില് തോട്ടപ്പള്ളി, പല്ലന തീരങ്ങളില് മുട്ടയിടാനെത്തിയത് 11 ഒലിവ് റിഡ്ലി കടലാമകളായിരുന്നെങ്കില് ഇത്തവണ എത്തിയത് മൂന്ന് ആമകള് മാത്രം.
പ്രളയം, തീരം കവര്ന്നത് ഇവയുടെ പ്രജനനത്തെ സാരമായി ബാധിച്ചിട്ടുണ്ട്. മുട്ട വിരിഞ്ഞിറങ്ങുന്ന തീരം എവിടെയാണോ അവിടെ മാത്രമേ കടലാമകള് മുട്ടയിടാനായി തെരഞ്ഞെടുക്കൂ. ലോകത്തെവിടെയായിരുന്നാലും പ്രജനന സമയമാകുമ്പോള് തീരം തേടിയുള്ള ഇവയുടെ യാത്ര തുടങ്ങും. പ്രജനന തീരങ്ങളുടെ നാശം, കടല്ഭിത്തി നിര്മാണം, അനിയന്ത്രിതമായ മണല് ഖനനം, ആഗോളതാപനം എന്നിവ മൂലം ഇവ വംശനാശ ഭീഷണിയിലാണ്. ഓഗസ്റ്റ് മുതല് മാര്ച്ചുവരെയാണ് പ്രജനന സമയം. ഈ സമയങ്ങളില് ട്രോള്നെറ്റുകളിലും കടലില് ഉപേക്ഷിക്കുന്ന വലകളിലും കുടുങ്ങി ചത്ത് തീരത്തടിയുന്ന കടലാമകളുടെ എണ്ണം വളരെയേറെയാണ്.
ഇറച്ചിക്കായി ഇവയെ വേട്ടയാടുന്നതും മുട്ടകള് മനുഷ്യരും കുറുക്കന്, തെരുവുനായ്ക്കള്, കീരി മുതലായവ ആഹാരമാക്കുന്നതും ഇവയുടെ വംശ വര്ധനവിനു വിഘാതമാകുന്നു. മത്സ്യസമ്പത്തിനും കടലിന്റെ സന്തുലിതാവസ്ഥയ്ക്കും ഭീഷണിയാകുന്ന കടല് ചൊറികളുടെ (ജെല്ലിഫിഷ്) വര്ധനവിനെ തടയുന്നതില് കടലാമകള് മുഖ്യപങ്കുവഹിക്കുന്നു.
ലെതര്ബാക്ക് എന്നയിനം കടലാമകള് ഒരു ദിവസം 200 കിലോയോളം ജെല്ലി ഫിഷിനെ ഭക്ഷിക്കും. വംശനാശ ഭീഷണി നേരിടുന്ന ഇവയെ വന്യജീവി നിയമം 1972 പട്ടിക-1 പ്രകാരം വനം വന്യജീവി വകുപ്പ് ആലപ്പുഴ ജില്ല സോഷ്യല് ഫോറസ്ട്രിയുടെ സഹകരണത്തോടെ സംരക്ഷിച്ചു വരുന്നു.
സോഷ്യല് ഫോറസ്ട്രി ആലപ്പുഴ ഡിവിഷന് അസി. കണ്സര്വേറ്റര് ഫെന് ആന്റണി കടലാമക്കുഞ്ഞുങ്ങളെ കടലിലേക്കു വിട്ടുകൊണ്ട് ഉദ്ഘാടനം നിര്വഹിച്ചു. ചെങ്ങന്നൂര് റേഞ്ച് ഓഫീസര് ഗണേശന് ആശംസയും ഗ്രീന് റൂട്സ് പ്രസിഡന്റ് എം.ആര്. ഓമനക്കുട്ടന് അധ്യക്ഷതയും വഹിച്ചു. സജി ജയമോഹന്, റഷീദ് കോയ എന്നിവര് പ്രസംഗിച്ചു.
https://www.facebook.com/Malayalivartha