വിവാഹാഭ്യര്‍ത്ഥനയ്ക്ക് പുതുമകള്‍ കൊണ്ടുവരാനും അത് അവിസ്മരണീയമാക്കി മാറ്റാനും ശ്രമിക്കുന്ന അനേകരുണ്ട്. അങ്ങനെ, പുതുമയുള്ളൊരു വഴി തേടിയിരിക്കുകയാണ് യാസുഷി യസ്സന്‍ തകാഹാഷി എന്ന ജപ്പാനിലെ ടോകിയോ സ്വദേശി.

ആറ് മാസമെടുത്ത യാത്രയിലൂടെയാണ് യസ്സന്‍ തന്റെ കാമുകിയോട് വിവാഹാഭ്യര്‍ത്ഥന നടത്തിയത്. ആ യാത്ര പ്രണയിനിയെ സന്തുഷ്ടയാക്കിയതുകൂടാതെ യസ്സനെ ഗിന്നസ് ലോക റെക്കോര്‍ഡിനും അര്‍ഹനാക്കി. ഏറ്റവും വലിയ ജിപിഎസ് ചിത്രരചന എന്ന ഇനത്തിലാണ് യസ്സന് റെക്കോര്‍ഡ് ലഭിച്ചത്. ഗൂഗിളാണ് ഈ വിവരം ട്വീറ്റ് ചെയ്ത് ലോകത്തെ അറിയിച്ചത്.

2008-ലാണ് യസ്സന്‍ തന്റെ പ്രണയനിയോട് വിവാഹാഭ്യര്‍ത്ഥന നടത്താന്‍ തീരുമാനിക്കുന്നത്. പത്ത് വര്‍ഷങ്ങളായി ജിപിഎസ് ആര്‍ട്ട് നിര്‍മിക്കുന്നയാളാണ് യസ്സന്‍. ഒരിടത്ത് നിന്നും മറ്റൊരിടത്തേക്ക് യാത്രചെയ്ത്, ജിപിഎസ് ഉപകരണത്തിന്റേയും ഗൂഗിള്‍ എര്‍ത്തിന്റേയും സ്ട്രീറ്റ് വ്യൂവിന്റേയും സഹായത്തോടെ ഗൂഗിള്‍ മാപ്പില്‍ ചിത്രങ്ങള്‍ വരയ്ക്കുന്നതിനെയാണ് ജിപിഎസ് ആര്‍ട്ട് എന്ന് പറയുന്നത്.

ഒരു ജി പി എസ് ഉപകരണവുമായി യാത്ര ചെയ്ത് ഉണ്ടാക്കുന്ന വളരെ വലിയ ഡിജിറ്റല്‍ ചിത്രമാണ് ജി പി എസ് ആര്‍ട്ട് . സഞ്ചരിയ്ക്കുന്ന വഴികള്‍ , ഒടുവില്‍ ഗൂഗിള്‍ ഏര്‍ത് പോലുള്ള മാപ്പിംഗ് ടൂളില്‍ അപ്ലോഡ് ചെയ്യുമ്പോള്‍ ഒരു ആകൃതി രൂപപ്പെട്ടിട്ടുണ്ടാവും .ഈ രൂപത്തെയാണ് ജി പി എസ് ആര്‍ട്ട് എന്ന് പറയുന്നത് . യസന്‍ സഞ്ചരിച്ച സ്ഥലങ്ങളുടെ റൂട്ട് അപ്ലോഡ് ചെയ്തപ്പോള്‍ തെളിഞ്ഞു വന്നത് ചില ഇംഗ്ലീഷ് അക്ഷരങ്ങളുടെ ആകൃതിയായിരുന്നു. അവ ചേര്‍ത്ത് വായിയ്ക്കുമ്പോള്‍ , 'മാരി മീ ' എന്ന് വായിയ്ക്കാനാവുമായിരുന്നു

തന്റെ വിവാഹാഭ്യര്‍ത്ഥനയ്ക്കും ഈ രീതി അവലംബിക്കാനാണ് യസ്സന്‍ തീരുമാനിച്ചത്. ജപ്പാനിന്റെ വിവിധ ഭാഗങ്ങളിലൂടെ സഞ്ചരിച്ച് ജപ്പാന്‍ ഭൂപടത്തില്‍ യസ്സന്‍ 'മാരി മീ ' ' എന്ന് എഴുതി.

.ജോലി ഉപേക്ഷിച്ചാണ് തന്റെ ലക്ഷ്യ പൂര്‍ത്തീകരണത്തിനായി യസ്സന്‍ ഇറങ്ങിത്തിരിച്ചത്. ഹൊക്കായ് ഡോയില്‍ തുടങ്ങിയ യാത്ര അവസാനിച്ചത് കാഗോഷിമ തീരത്താണ്. 7000 കിലോമീറ്ററുകള്‍ താണ്ടി ആറ് മാസത്തെ യാത്ര. അങ്ങനെ വളരെ വലിയൊരു വിവാഹാഭ്യര്‍ത്ഥന. ഒപ്പം ഒരു ഹൃദയചിഹ്നവും വരയ്ക്കാന്‍ യസ്സന്‍ മറന്നില്ല.

സ്വാഭാവികമായും ഇത്രയും സ്‌നേഹനിധിയായൊരു കാമുകനെ ഏതെങ്കിലും കാമുകി വിട്ടുകളയുമോ. യസ്സന്റെ പ്രണയാഭ്യര്‍ത്ഥന അദ്ദേഹത്തിന്റെ കാമുകി സ്വീകരിച്ചു.

ഇത് വലിയ സര്‍പ്രൈസ് ആയിരുന്നുവെന്നും ലോകത്ത് ഏറ്റവും മഹത്തരമായ സനേഹം അനുഭവിക്കുന്നുവെന്നും യസ്സന്റെ കാമുകി പറഞ്ഞു.
പത്ത് മണിക്കൂര്‍ മുമ്പാണ് ഗൂഗിള്‍ ഇക്കാര്യം ട്വീറ്റ് ചെയ്തത്. വീഡിയോ ഇതിനോടകം 23000-ല്‍ അധികം ആളുകള്‍ കണ്ടുകഴിഞ്ഞു.