നോര്ത്ത് കാരലൈന, പോളന് പോകലിപ്സേ പ്രതിഭാസത്തിന്റെ പിടിയില്
ജെര്മി ഗില്ക്രിസ്റ്റ് എന്ന ഫൊട്ടോഗ്രാഫര് ഏതാനും ദിവസങ്ങള്ക്കു മുന്പാണ് നോര്ത്ത് കരലൈനയിലെ ദര്ഹാമിന്റെ ഒരു ചിത്രം ഇന്സ്റ്റഗ്രാമില് പങ്കുവച്ചത്. തുടര്ന്ന് ഒരു ചോദ്യവും ജെര്മി ഗില്ക്രിസ്റ്റ് തന്റെ ഫോളോവേഴ്സിനോട് ചോദിച്ചു. തന്റെ ചിത്രത്തിന് ഇളം പച്ച നിറം നല്കിയിരിക്കുന്ന ഫില്ട്ടര് ഏതാണെന്നറിയാമോ എന്നതായിരുന്നു ആ ചോദ്യം.
പലരും ക്യാമറയിലും ഇന്സ്റ്റഗ്രാമിലുമുള്ള പല ഫില്ട്ടറുകളുടെയും പേരു പറഞ്ഞു. പക്ഷേ ഒടുവില് യഥാര്ത്ഥ ഉത്തരം ജെര്മി ഗില്ക്രിസ്റ്റ് തന്നെയാണ് പറഞ്ഞത്.'പോളന് പോകലിപ്സ്' എന്നതായിരുന്നു ഗില്ക്രിസ്റ്റിന്റെ ഉത്തരം.
ഈ ഫില്ട്ടര് ഏതെങ്കിലും ആപ്പിലോ ക്യാമറയിലോ ഉള്ളതല്ല, മറിച്ച് വായുവിലുള്ളതാണ്. നോര്ത്ത് കാരലൈനയില് അനുഭവപ്പെടുന്ന വലിയൊരു വായുമലിനീകരണ പ്രശ്നം ഉയര്ത്തിക്കാട്ടുകയാണ് ജെര്മി ഗില്ക്രിസ്റ്റ് തന്റെ പോസ്റ്റിലൂടെ ചെയ്തത്. ജെര്മി ഗില്ക്രിസ്റ്റ് മാത്രമല്ല നിരവധി പരിസ്ഥിതി പ്രവര്ത്തകരും ഗവേഷകരുമെല്ലാം ഇപ്പോള് മനുഷ്യരുടെ മരണത്തിനു പോലും കാരണമായേക്കാവുന്ന 'പോളന്' (പരാഗരേണുക്കള്) എന്ന മലിനവസ്തുവിനെക്കുറിച്ച് മുന്നറിയിപ്പുകള് നല്കുന്നുണ്ട്.
മറ്റ് ഒട്ടനവധി വായുമലിനീകരണ വസ്തുക്കളില് നിന്ന് വിഭിന്നമായി പോളന് പോകലിപ്സിനു കാരണമാകുന്നത് പ്രകൃതി ദത്തമായ പൊടികള് തന്നെയാണ്. വിത്തുല്പാദിപ്പിക്കുന്ന മരങ്ങളില് നിന്നും സസ്യങ്ങളില് നിന്നുമാണ് 'പോളന്'(പൂമ്പൊടി) എന്ന പദാര്ഥം വായുവിലേക്കെത്തുന്നത്. വിത്തുകള് കാറ്റിനൊപ്പം വിവിധ സ്ഥലങ്ങളിലേക്കു പരാഗണം ചെയ്യാന് സഹായിക്കുന്നതാണ് ഈ 'പോളന്'പദാര്ഥങ്ങള്. മരങ്ങള് മാത്രമല്ല പുല്ലുകളും ചെടികളുമെല്ലാം ഈ 'പോളന്' ഉല്പാദിപ്പിക്കാറുണ്ട്.
സാധാരണഗതിയില് പ്രകൃതിയില് കാണപ്പെടുന്നതാണെങ്കിലും ശക്തമായ കാറ്റും മനുഷ്യരുടെ ഇടപെടലുകളും 'പോളന്'സാന്നിധ്യം വായുവില് കുത്തനെ ഉയരുന്നതിനു കാരണമാകാറുണ്ട്. 'പോളന്' മനുഷ്യരില് സൃഷ്ടിക്കുന്ന അലര്ജിയാണ് അതിനെ അപകടകാരിയാക്കുന്നതും. അനുകൂലമായ കാലാവസ്ഥ കൂടിയാണെങ്കില് ആളുകളില് അലര്ജി വര്ധിക്കുന്നതിനും ശ്വാസകോശസംബന്ധമായ രോഗങ്ങള് മൂര്ച്ഛിച്ച് ആളുകള് മരിക്കുന്നതിന് വരെ 'പോളന്' കാരണമാകാറുണ്ട്.
https://www.facebook.com/Malayalivartha