ആഹാരം കഴിച്ച ഹോട്ടലില്‍ ബില്ലടയ്ക്കാന്‍ പത്തുരൂപ കുറവായിരുന്നതിനെ തുടര്‍ന്ന് രണ്ടുവയസുകാരി മകളെ ഹോട്ടലില്‍ പണയംവെച്ചു ഒരച്ഛന്‍. ചൈനയിലാണ് ഞെട്ടിക്കുന്ന സംഭവം. ആറു യുവാന്റെ (62 രൂപ) ഊണാണ് ഇയാള്‍ മകളോടൊപ്പം എത്തി കഴിച്ചത്.

ബില്ല് കൊണ്ടുവന്നപ്പോള്‍ ഒരു യുവാന്റെ(10 രൂപ) കുറവുണ്ടായിരുന്നു. പണം നല്‍കാനില്ല, പകരം മകളെ പണയത്തിന് വെയ്ക്കുകയാണെന്ന് പറഞ്ഞ് ഇയാള്‍ ഹോട്ടലില്‍ നിന്ന് ഇറങ്ങി. ഒരു നിമിഷം എന്താണ് സംഭവിക്കുന്നതെന്ന് ഹോട്ടല്‍ ജീവനക്കാര്‍ക്കും മനസിലായില്ല. അച്ഛന്‍ പോകുന്നത് കണ്ട് കുഞ്ഞ് കരഞ്ഞുകൊണ്ട് പിന്നാലെ ഓടി.

എന്നാല്‍ അച്ഛന്‍ കുഞ്ഞിനെ ഹോട്ടലിനുള്ളിലേയ്ക്ക് തള്ളിനീക്കിയിട്ട് പുറത്തേയ്ക്ക് പോകുന്നത് കണ്ട് ഹോട്ടല്‍ ജീവനക്കാര്‍ കുഞ്ഞിനെയെടുത്ത് സമാധാനിപ്പിച്ചു.

കുടിക്കാന്‍ പാല്‍ നല്‍കിയതോടെ കുഞ്ഞ് കരച്ചിലടക്കി. അച്ഛന്‍ വരുന്നത് കാത്തുനില്‍ക്കാതെ ഇവര്‍ കുഞ്ഞിനെ പൊലീസിനെ ഏല്‍പ്പിച്ചു. ഏതാനും മണിക്കൂറുകള്‍ക്ക് ശേഷം ഇയാള്‍ മടങ്ങിയെത്തി രൂപ നല്‍കി.

ഹോട്ടലില്‍ കുഞ്ഞില്ലെന്ന് കണ്ട് ഇയാള്‍ രോഷത്തോടെ ഒച്ചവെച്ചു. പൊലീസില്‍ ഏല്‍പ്പിച്ച വിവരം പറഞ്ഞപ്പോള്‍ വീണ്ടും കുപിതനായി. ഏതായാലും രോഷം അടങ്ങിയ ശേഷം അച്ഛന്‍ തന്നെ പൊലീസിന്റെ പക്കല്‍ നിന്നും കുഞ്ഞിനെ തിരികെ വാങ്ങി. ഹോട്ടല്‍ ദൃശ്യങ്ങളുടെ വിഡിയോ വൈറലാണ്.