തെരഞ്ഞെടുപ്പിന് മുമ്പ് രാഷ്ട്രീയ പാര്‍ട്ടികള്‍ പ്രകടന പത്രികകള്‍ പുറത്തിറക്കാറുണ്ട്. വിജയിച്ചു കഴിഞ്ഞാല്‍ ഇതില്‍ മിക്കവയും നടപ്പിലാക്കാറില്ലെങ്കിലും വാഗ്ദാനങ്ങളുടെ പെരുമഴയായിരിക്കും പത്രികയില്‍ ഉണ്ടാകുക.

ദില്ലിയില്‍ സഞ്ജി വിരാസത് പാര്‍ട്ടി പുറത്തിറക്കിയിരിക്കുന്നത് അത്തരത്തില്‍ നെറ്റി ചുളിപ്പിക്കുന്ന ഒരു പ്രകടന പത്രികയാണ്. ജനങ്ങളുടെ കണ്ണ് മഞ്ഞളിക്കുന്ന ഇവരുടെ പ്രഖ്യാപനങ്ങള്‍ക്ക് ഏഴയലത്ത് വരില്ല മറ്റു രാഷ്ട്രീയ പാര്‍ട്ടികളുടെയൊന്നും പ്രഖ്യാപനങ്ങളെന്ന് ഉറപ്പാണ്.

എന്തൊക്കെയാണ് വാഗ്ദാനങ്ങളെന്ന് അറിയണ്ടേ.., പകുതി വിലയ്ക്ക് മദ്യം, ഈദിന് എല്ലാ മുസ്ലീം കുടുംബങ്ങള്‍ക്കും ആട് തുടങ്ങി അമ്പരപ്പിക്കുന്ന പ്രഖ്യാപനങ്ങളാണ് പാര്‍ട്ടി നടത്തിയിരിക്കുന്നത്.

ഇത് കൂടാതെ, പിഎച്ച്ഡി വരെ സൗജന്യ വിദ്യാഭ്യാസം, ദില്ലിയിലെ വിദ്യാര്‍ത്ഥികള്‍ക്ക് മെട്രോ അതല്ലെങ്കില്‍ ബസില്‍ സൗജന്യ യാത്ര, കുടുംബത്തില്‍ പെണ്‍കുട്ടി ജനിച്ചാല്‍ 50,000 രൂപ സര്‍ക്കാര്‍ പാരിതോഷികം.

പെണ്‍കുട്ടികളുടെ വിവാഹത്തിന് 2,50,000രൂപ സഹായം, തൊഴില്‍ രഹിതര്‍ക്ക് മാസം തോറും 10,000 രൂപയുടെ സഹായം, പ്രായമായവര്‍ക്കും വിധവകള്‍ക്കും അംഗപരിമിതര്‍ക്കും 5000 പെന്‍ഷന്‍, തുടങ്ങി നിരവധി വാഗ്ദാനങ്ങളാണ് പാര്‍ട്ടി പ്രകടന പത്രികയില്‍.

ഒപ്പം പ്രൈവറ്റ് ആശുപത്രിയിലെ ചികിത്സയ്ക്ക് പത്തു ലക്ഷം രൂപ വരെ സഹായവും ലഭിക്കുമെന്നും വാഗ്ദാനമുണ്ട്.