താറാവും മൂങ്ങയുമൊക്കെ കൂട്ടുകാരാകുന്നത് കഥകളില്‍ മാത്രം കേട്ടിട്ടുള്ള കാര്യമാണ്. എന്നാല്‍ അമേരിക്കയിലെ ഫ്‌ളോറിഡയില്‍ ഇത്തരമൊരു സംഭവം നടന്നിരിക്കുകയാണ്. ഫോട്ടോഗ്രാഫറായ ലവ്‌റി വൂള്‍ഫിന്റെ വീടിനുപിന്നിലാണ് ഇത്തരമൊരു കാഴ്ച അരങ്ങേറിയത്.

ഇവരുടെ വീടിന്റെ പിന്‍ഭാഗത്ത് പക്ഷികള്‍ക്ക് കൂടൊരുക്കുന്നതിനായി ചെറിയൊരു പെട്ടി സ്ഥാപിച്ചിരുന്നു. കഴിഞ്ഞ ഒരു മാസമായി ഈ ബോക്്്‌സിനുള്ളില്‍ ഒരു മൂങ്ങ താമസിക്കുന്നുണ്ട്. ഇക്കഴിഞ്ഞ ദിവസം വൈകുന്നേരം ചെറുതായി മഴപെയ്യാന്‍ തുടങ്ങിയ സമയത്ത് ഈ മൂങ്ങ തന്റെ കൂടിന്റെ വാതിക്കല്‍ വന്നിരിക്കുന്നത് ലവ്‌റ ശ്രദ്ധിച്ചു. കുറച്ചു കഴിഞ്ഞപ്പോള്‍ കൂട്ടിനകത്തുനിന്ന് മറ്റൊരു തലയും പുറത്തേക്ക് വന്നു.

മൂങ്ങയുടെ കുഞ്ഞായിരിക്കും എന്ന് ലവ്‌റ കരുതി, എന്നാല്‍ അതിന്റെ ഒരു ഫോട്ടോ എടുത്തുകളയാം എന്നു തീരുമാനിച്ചു. കാമറ എടുത്ത് സൂം ചെയ്തപ്പോള്‍ ലവ്‌റ ശരിക്കും ഞെട്ടി. മൂങ്ങയുടെ അടുത്തിരുന്ന് പുറത്തെ കാഴ്ചകാണുന്നത് ഒരു താറാവിന്‍ കുഞ്ഞായിരുന്നു.

ഇരപിടയനായ മൂങ്ങ ഭക്ഷണത്തിനായാണോ താറാവിന്‍ കുഞ്ഞിനെ പിടിച്ചുകൊണ്ടുവന്നത് എന്നായി ലവ്‌റയുടെ സംശയം. അവര്‍ ഉടന്‍, പക്ഷികളെക്കുറിച്ച് പഠനം നടത്തുന്ന തന്റെ സുഹൃത്തിനെ വിളിച്ച് കാര്യം പറഞ്ഞു. മൂങ്ങ, താറാവിന്‍ കുഞ്ഞിനെ റാഞ്ചിക്കൊണ്ട് വന്നതാകാന്‍ സാധ്യതയുണ്ടെന്നും താറാവിന്‍ കുഞ്ഞിനെ രക്ഷിക്കാന്‍ പറ്റുമെങ്കില്‍ അങ്ങനെ ചെയ്യണമെന്നും സുഹൃത്ത് ലവ്‌റയോട് പറഞ്ഞു.

സുഹൃത്തിന്റെ വാക്കുകേട്ട് താറാവിന്‍കുഞ്ഞിനെ രക്ഷിക്കാന്‍ ചെന്ന ലവ്‌റ വീണ്ടും ഞെട്ടി. മഴ കഴിഞ്ഞപ്പോള്‍ താറാവിന്‍കുഞ്ഞ് മൂങ്ങയുടെ കൂട്ടില്‍നിന്ന് ഇറങ്ങി അടുത്തുള്ള നദിയിലേക്ക് പോയി. മൂങ്ങയാകട്ടെ ഇതൊക്കെ കണ്ട് കൂട്ടില്‍ത്തന്നെ ഇരുന്നു. ഏതായാലും ലവ്‌റ പകര്‍ത്തിയ ചിത്രങ്ങള്‍ ഇപ്പോള്‍ ഇന്റര്‍നെറ്റില്‍ വൈറലാവുകയാണ്.