കണ്ണൂരില്‍ വിവിപാറ്റ് മെഷീന്‍ തുറക്കുന്നതിനിടെ അതനുള്ളില്‍ പാമ്പിനെ കണ്ട തെരഞ്ഞെടുപ്പ് ഉദ്യോഗസ്ഥര്‍ ഞെട്ടി. മയ്യില്‍ പഞ്ചായത്തിലെ കണ്ടങ്കൈ എല്‍പി സകൂളിലെ 165-ാം ബൂത്തിലാണ് സംഭവം. വോട്ടെടുപ്പ് അല്‍പ്പസമയം നിര്‍ത്തിവെച്ച് പാമ്പിനെ കൊന്നു. അതിനു ശേഷമാണ് വോട്ടെടുപ്പ് പുനരാരംഭിച്ചത്.

വോട്ടിങ് യന്ത്രങ്ങളിലും സാമഗ്രികളിലും വെള്ളം വീണ് മലപ്പുറം നഗരസഭ മുണ്ടുപറമ്പിലെ രണ്ടു ബൂത്തുകളില്‍ പോളിങ് വൈകി. മാറാക്കര പഞ്ചായത്തിലെ ചെറുപറമ്പ് ജിഎല്‍പി സ്‌കൂളിന്റെ മേല്‍ക്കൂര കാറ്റില്‍ പറന്നു പോയി. ഇവിടെ ബൂത്തുകള്‍ മാറി ക്രമീകരിക്കേണ്ടി വന്നു. മലപ്പുറം ജില്ലയിലെ 3 നിയമസഭാ മണ്ഡലങ്ങളില്‍ ഏതാണ്ടു പൂര്‍ണമായും വൈദ്യുതി നിലച്ചു.

മലയോരമേഖലയിലെ ചെറിയ റോഡുകളില്‍ മരം വീണു ഗതാഗതം മുടങ്ങി. ആലപ്പുഴ ജില്ലകളില്‍ പലയിടത്തും കനത്ത നാശമുണ്ട്. അരൂരില്‍ മരങ്ങള്‍ ദേശീയ പാതയിലേക്ക് വീണ് രാത്രി ഗതാഗതം തടസപ്പെട്ടു.

ഇന്നും ഇടിമിന്നലോടു കൂടിയ മഴക്ക് സാധ്യതയുണ്ടെന്ന് കാലാവസ്ഥാനിരീക്ഷണകേന്ദ്രത്തിന്റെ മുന്നറിയിപ്പുണ്ട്. മണിക്കൂറില്‍ 50 കിലോമീറ്റര്‍ വരെ വേഗതയുള്ള കാറ്റും ഉണ്ടാകാം. മറ്റന്നാളോടെ കന്യാകുമാരിക്ക് സമീപം ന്യൂനമര്‍ദം രൂപപ്പെടാന്‍ ഇടയുണ്ടെന്നും കാലാവസ്ഥാ കേന്ദ്രം അറിയിച്ചു.