മാര്‍ട്ടിന്‍ ഹോബ്‌സ് എന്ന ആഫ്രിക്കക്കാരന്, ആറു വര്‍ഷം മുമ്പ് ഒരു കിലോമീറ്റര്‍ നീന്തുന്നതിനെപ്പറ്റി ചിന്തിക്കാന്‍ പോലും കഴിയുമായിരുന്നില്ല. എന്നാല്‍ കഴിഞ്ഞ ആഴ്ച തുടര്‍ച്ചയായ 54 ദിവസം നീന്തി രണ്ടു ലോക റിക്കാര്‍ഡുകള്‍ കുറിച്ചിരിക്കുകയാണ് മാര്‍ട്ടിന്‍ ഹോബ്‌സ്.

ഒരു തടാകത്തിലൂടെ തനിച്ച് ഏറ്റവും കൂടുതല്‍ ദൂരം നീന്തിയ വ്യക്തി, ആഫ്രിക്കയിലെ മലാവി തടാകം തനിച്ച് നീന്തിക്കടന്ന വ്യക്തി എന്നീ റിക്കാര്‍ഡുകളാണ് ഈ നാല്‍പ്പത്തഞ്ചുകാരന്‍ സ്വന്തം പേരിലാക്കിയത്. പണ്ടുതൊട്ടേ കായികമേഖലകളോടായിരുന്നു മാര്‍ട്ടിന് താത്പര്യം. ഒരു ബൈക്ക് റൈഡറായിട്ടാണ് അദ്ദേഹം തന്റെ കരിയര്‍ തുടങ്ങിയത്.

എന്നാല്‍ നട്ടെല്ലിന് പരിക്കേറ്റതോടെ അദ്ദേഹത്തിന് ബൈക്കോടിക്കാന്‍ കഴിയാതെയായി. അതോടെയാണ് നീന്തലിലേക്ക് ശ്രദ്ധ കേന്ദ്രീകരിച്ചുതുടങ്ങിയത്. മരിക്കുന്നതിനുമുമ്പ് എന്തെങ്കിലുമൊക്കെ ലോകറിക്കാര്‍ഡുകള്‍ തന്റെ പേരില്‍ കുറിക്കണമെന്ന് അദ്ദേഹം ഉറപ്പിച്ചിരുന്നു.

ആഫ്രിക്കയിലെ മൂന്നാമത്തെ നീളം കൂടിയ നദിയാണ് മലാവി. ധാരാളം മുതലകളുള്ള ഈ തടാകത്തിലൂടെയുള്ള നീന്തല്‍ തികച്ചും സാഹസികമായിരുന്നു. നീന്തലിനിടയില്‍ ഇടയ്ക്കിടെ കൂടെ വന്നുകൊണ്ടിരുന്ന കപ്പലില്‍ കയറി ഭക്ഷണം കഴിച്ചിരുന്നു. രാത്രിയിലെ നീന്തല്‍ പരമാവധി ഒഴിവാക്കിയിരുന്നു. 581 കിലോമീറ്റര്‍ ദൂരമാണ് അദ്ദേഹം താണ്ടിയത്.