മലയാളസിനിമാ പ്രേക്ഷകര്‍ ആദ്യമായി ആന്റണി വര്‍ഗീസ് എന്ന നടനെ കണ്ടത് അങ്കമാലി ഡയറീസ് എന്ന ചിത്രത്തിലാണ്. ചിത്രത്തിലെ കഥാപാത്രമായ പെപ്പെയുടെ പേര് തന്നെ പിന്നീട് അദ്ദേഹത്തിന് ആരാധകര്‍ ചാര്‍ത്തി നല്‍കി. സാധാരണ കുടുംബത്തില്‍ നിന്നും സിനിമയിലേക്കെത്തിയ ആളാണ് താനെന്ന് ആന്റണി മുന്‍പ് പറഞ്ഞിട്ടുണ്ട്.

തൊഴിലാളി ദിനത്തില്‍ അപ്പന്റെ ചിത്രം പങ്കുവെച്ചുള്ള അദ്ദേഹത്തിന്റെ കുറിപ്പും ശ്രദ്ധേയമാകുന്നു.

ആന്റണിയുടെ കുറിപ്പിങ്ങനെ:
''തൊഴിലാളിദിനാശംസകള്‍.... അപ്പനാണ്, ഉച്ചക്ക് ഓട്ടം കഴിഞ്ഞു ചോറുണ്ണാന്‍ വന്നപ്പോള്‍ നിര്‍ബന്ധിപ്പിച്ചു ക്യാമറയ്ക്ക് മുന്നില്‍ പിടിച്ചു നിര്‍ത്തിയതാ....''

'രാവിലെ മുതല്‍ കുറെ തൊഴിലാളി ദിനാശംസകള്‍ കണ്ട്.. പക്ഷെ ഇതാണ് ഒരുപാട് സന്തോഷം തോന്നിയ ഫോട്ടോ' എന്നും ''ഓട്ടപ്പാച്ചിലിനിടെ ചിരിച്ചു നില്‍ക്കുന്ന ഈ അച്ഛന്‍ മാതൃകയാണെന്നും' പലരും കമന്റ് ബോക്‌സില്‍ പറയുന്നു. 'നിങ്ങള് ദുല്‍ഖര്‍ നു പഠിക്കുവാണോ മനുഷ്യാ ? പ്രായമായ മാതാപിതാക്കളെ ജോലിക്ക് വിടാതെ വീട്ടിലിരുത്തിക്കൂടേ' എന്ന് തമാശയായും ചിലര്‍ പറയുന്നു.

പണ്ടൊക്കെ വീടിനടുത്ത് ഒരു ചടങ്ങ് നടന്നാല്‍ തങ്ങളെ വിളിക്കാറില്ലന്നും തങ്ങള്‍ സാധാരണക്കാരായതു കൊണ്ടാകാം അങ്ങനെ സംഭവിക്കുന്നതെന്ന് അമ്മ പറയുമായിരുന്നുവെന്നും ആന്റണി മുന്‍പ് പറഞ്ഞിട്ടുണ്ട്. ഇപ്പോള്‍ പത്തു പതിനഞ്ചു കിലോമീറ്റര്‍ ദൂരെ നിന്നൊക്കെ ആളുകള്‍ കല്യാണവും മാമോദീസയും വീട്ടില്‍ വന്നു വിളിക്കാറുണ്ടെന്നും താരം അടുത്തിടെ പറഞ്ഞിരുന്നു.