സിബിഎസ്ഇ പരീക്ഷയില്‍ മാര്‍ക്ക് 500-ല്‍ 499 ; ആ ഒരു മാര്‍ക്ക് നഷ്ടപ്പെട്ടതിന്റെ കാരണം അറിയാമെന്ന് ഒന്നാം റാങ്കുകാരി
സിബിഎസ്ഇ പ്ലസ് ടു പരീക്ഷാഫലം വന്നപ്പോള്‍ തിളങ്ങിയത് പെണ്‍ കുട്ടികളാണ്. ഗാസിയാബാദിലെ ഡല്‍ഹി പബ്ലിക് സ്‌കൂളിലെ വിദ്യാര്‍ഥിനി ഹന്‍സിക ശുക്ലയാണ് ഒന്നാം റാങ്ക് നേടിയത് . ഇംഗ്ലീഷ് ഒഴികെ ബാക്കി എല്ലാ വിഷയങ്ങള്‍ക്കും നൂറില്‍ നൂറ് നേടിയ ഹന്‍സികയുടെ മാര്‍ക്ക് അഞ്ഞൂറില്‍ 499.
ഒരു മാര്‍ക്ക് നഷ്ടപ്പെട്ടതിന്റെ കാരണം എന്താണെന്ന് ഹന്‍സികയ്ക്ക് മനസ്സിലായി. സോഷ്യല്‍ മീഡിയ ആണ് ഈ നഷ്ടത്തിന് കാരണമത്രേ. സ്വന്തമായി ഫെയ്‌സ്ബുക്ക് അക്കൗണ്ട് ഉണ്ട് ഹന്‍സികക്ക്. ''ഓണ്‍ലൈന്‍ ചാറ്റിങ്ങിനും മറ്റ് ഗെയിംസിനും സമയം കളഞ്ഞില്ലായിരുന്നെങ്കില്‍ എനിക്കാ ഒരു മാര്‍ക്ക് നഷ്ടപ്പെടില്ലായിരുന്നു''- ഹന്‍സിക പറഞ്ഞു.
ലേഡി ശ്രീരാം കോളേജില്‍ സൈക്കോളജി പഠിക്കണമെന്നാണ് ഇനി ആഗ്രഹം. സ്വപ്നം സിവില്‍ സര്‍വീസ് ആണ്. ഐ.എ.എസ് അല്ലെങ്കില്‍ ഐ.എഫ്.എസ് എന്ന ലക്ഷ്യം കൈവരിച്ച് രാജ്യത്തെ സേവിക്കാനാണ് താല്‍പര്യം എന്നും ഹന്‍സിക പറയുന്നു.
ട്യൂഷനോ മറ്റൊരുവിധ ക്ലാസിനും പോകാതെ സ്വന്തം പരിശ്രമം കൊണ്ട് നേടിയെടുത്ത വിജയത്തില്‍ 17-കാരിയായ ഹന്‍സികക്ക് നന്ദി പറയാനുള്ളത് തന്റെ മാതാപിതാക്കളോടും അധ്യാപകരോടുമാണ്. ഹന്‍സികയുടെ പിതാവ് രാജ്യസഭാ സെക്രട്ടറിയേറ്റ് ജീവനക്കാരനും മാതാവ് ഡല്‍ഹി കോളേജ് അധ്യാപികയുമാണ്.
https://www.facebook.com/Malayalivartha
