ജീവിതപങ്കാളിയെ കണ്ടെത്തുന്നത് അത്ര കഷ്ടപ്പാടുള്ള കാര്യമാണോ എന്ന് ചോദിച്ചാല്‍ ഫെറോ ദ്വീപിലെ പുരുഷന്മാര്‍ ഏകസ്വരത്തില്‍ പറയും സംഗതി അല്‍പം പാടു തന്നെയാണെന്ന്. കേവലം 50,000 മാത്രം ജനസംഖ്യയുള്ള ഫെറോയില്‍ സ്ത്രീകളുടെ എണ്ണത്തിലുണ്ടായ ക്രമാതീതമായ കുറവാണ് ഇവരെക്കൊണ്ട് ഇങ്ങനെ പറയിക്കുന്നത്.

പ്രധാനമന്ത്രി എക്‌സെല്‍ ജൊഹാനസെന്നിന്റെ അഭിപ്രായപ്രകാരം പുരുഷന്മാരേക്കാള്‍ 2000 സ്ത്രീകളുടെ കുറവാണ് ഫെറോയില്‍ ഇന്നുള്ളത്. സ്വന്തം നാട്ടില്‍ സ്ത്രീകളില്ലാതായതോടെ ഇവിടുത്തെ പുരുഷന്മാര്‍ ജീവിതപങ്കാളികളെ കണ്ടെത്തുന്നത് തായ്‌ലന്ഡില്‍ നിന്നും ഫിലപ്പൈന്‍സില്‍ നിന്നുമെല്ലാമാണ്. സാമൂഹ്യ മാധ്യമങ്ങളെയും ഡേറ്റിംഗ് സൈറ്റുകളേയും ആശ്രയിക്കുന്നവരും കുറവല്ല.

തായ്‌ലന്‍ഡ്, ഫിലിപ്പൈന്‍സ് എന്നിവിടങ്ങളില്‍ നിന്നായി ഇപ്പോള്‍ തന്നെ മുന്നോറോളം സ്ത്രീകള്‍ ഫെറോയില്‍ മരുമകളായി എത്തിക്കഴിഞ്ഞു. മുന്നൂറ് എന്ന് കേട്ട് വിലകുറച്ചുകാണണ്ട, 50,000 മാത്രം ജനസംഖ്യയുള്ള ദ്വീപില്‍ 300 അല്‍പം വലിയ സംഖ്യ തന്നെയാണ്.

ഡെന്‍മാര്‍ക്കിന്റെ ഭാഗമാണ് 18 കൊച്ചുകൊച്ചു ദ്വീപുകളുള്ള ഫെറോ. സ്വന്തമായ ഭാഷയും സംസ്‌കാരവും ഭക്ഷണവും മറ്റുള്ളവരില്‍നിന്നും ഇവരെ വേറിട്ട് നിര്‍ത്തുന്നു. ഉപ്പിട്ട ആട്ടിറച്ചി, ഉണങ്ങിയ കോഡ് മത്സ്യം, വല്ലപ്പോഴുമുള്ള തിമിംഗലത്തിന്റെ മാംസം, ബ്ലബ്ബര്‍ എന്നിവയെല്ലാമാണ് ഇവരുടെ പ്രധാന ഭക്ഷണം. ഏഷ്യന്‍ പാചകരീതികളില്‍ ഉപയോഗിക്കുന്ന മസാലകളൊന്നും ഇവരുടെ ഭക്ഷണത്തില്‍ കണ്ടെത്താന്‍ സാധിക്കില്ല.

തൊട്ടടുത്തുള്ള ഐസ്‌ലാന്‍ഡിനോളം തണുപ്പില്ലെങ്കിലും ഇവിടുത്തെ കാലാവസ്ഥയും അല്‍പം വെല്ലുവിളി നിറഞ്ഞതാണ്. അതുകൊണ്ടുതന്നെ ഇവിടേക്ക് വിവാഹം കഴിഞ്ഞെത്തുന്ന പെണ്കുട്ടികള്‍ ആദ്യകാലങ്ങളില്‍ അല്പം കഷ്ടപ്പെടേണ്ടി വരുമെന്ന് ഉറപ്പ്.

എന്റെ കുഞ്ഞ് ജേക്കബ് ഒരു കുഞ്ഞായിരുന്നപ്പോള്‍ കൂടുതല്‍ സമയവും ഞാന്‍ ചെലവഴിച്ചിരുന്നത് വീട്ടില്‍ തന്നെയായിരുന്നു. സംസാരിക്കാന്‍ പോലും ഒരാള്‍ കൂട്ടില്ലാതെ. ഫെറോയില്‍ മരുമകളായെത്തിയ തായ്‌ലന്‍ഡ് സ്വദേശിനി അതായ തന്റെ ആദ്യകാലത്തെ ബുദ്ധിമുട്ടുകള്‍ പങ്കുവെക്കുന്നു. ആറുവര്‍ഷങ്ങള്‍ക്ക് മുമ്പായിരുന്നു ഫെറോ സ്വദേശിയായ ജാനിനെ, അതായ വിവാഹം കഴിക്കുന്നത്. അതായ സുഹൃത്തിനൊപ്പം ഫെറോയില്‍ ബിസിനസ്സ് നടത്തിയിരുന്നു. അങ്ങനെയാണ് അതായയെ ജാന്‍ കണ്ടെത്തുന്നത്.

ഗ്രാമത്തിലുള്ള മുതിര്‍ന്നവര്‍ ഇംഗ്ലീഷ് സംസാരിക്കില്ല. ഞങ്ങളെ പോലെയുള്ള ചെറുപ്പക്കാരെല്ലാം ജോലിയിലായിരിക്കും. ജേക്കബിന് ആദ്യകാലത്ത് കളിക്കാന്‍ പോലും ആരും കൂട്ടുണ്ടായിരുന്നില്ല. ഞാന്‍ തീര്‍ത്തും ഒറ്റക്കായിരുന്നു. ഒരു ഘട്ടത്തില്‍ ഞാന്‍ വിഷാദത്തിലേക്ക് വരെ എത്തിച്ചേര്‍ന്നു.അതായ ഓര്‍ക്കുന്നു.

തുടക്കത്തില്‍ കുറച്ച് ബുദ്ധിമുട്ടുകള്‍ നേരിടേണ്ടി വരുമെങ്കിലും സ്ത്രീകള്‍ക്ക് അവസരങ്ങള്‍ വാഗ്ദാനം ചെയ്യുന്ന നാടാണ് ഇത്. ഫെറോയുടെ തലസ്ഥാനത്ത് ഒരു റസ്‌റ്റോറന്റ് ബിസിനസ് നടത്തുകയാണ് അതായ. അതായയെ പോലെ നിരവധി മരുമക്കള്‍ സന്തോഷത്തോടെ കഴിയുന്നുണ്ട് ഫെറോയില്‍.