തക്കാളി മോഷണം പോയി എന്നു പറഞ്ഞുകേട്ടാല്‍ 'കള്ളം പറ്റിക്കല്ലേ' എന്നു പറയല്ലേ. കാരണം മുംബൈയ്ക്കടുത്ത് ദഹിസറിലെ ചന്തയില്‍ നിന്ന് 60,000 രൂപയുടെ തക്കാളിയാണ് കഴിഞ്ഞദിവസം മോഷണംപോയത്. അഞ്ചെട്ടുമാസംമുമ്പ് കിലോഗ്രാമിന് പത്തുരൂപപോലും കിട്ടാതിരുന്ന തക്കാളിക്ക് ഇപ്പോള്‍ നൂറു രൂപയ്ക്കടുത്താണ് വില.

നവി മുംബൈയിലെ എ.പി.എം.സി. മാര്‍ക്കറ്റില്‍ നിന്ന് ചൊവ്വാഴ്ച രാത്രി ദഹിസറിലെ ശാന്തിനഗറിലിറക്കിയ വിലപിടിച്ച തക്കാളിയാണ് പിറ്റേന്ന് മോഷണം പോയതെന്ന് വ്യാപാരിയായ ശാന്തിലാല്‍ ശ്രീവാസ്തവ പറഞ്ഞു. ചൊവ്വാഴ്ച രാത്രി 30 കൂട തക്കാളിയാണ് ശാന്തിലാല്‍ ഇറക്കിയത്. രാത്രിവരുന്ന ലോഡ് കടയ്ക്കുപുറത്ത് ഇറക്കിവെയ്ക്കുകയാണ് പതിവ്.

അകത്ത് എലിശല്യമുണ്ടെന്നതാണ് കാരണം. ബുധനാഴ്ച രാവിലെ നോക്കിയപ്പോള്‍ ചൊവ്വാഴ്ച ഇറക്കിയ തക്കാളി അപ്രത്യക്ഷമായിരുന്നു. ഒരുകൂട തക്കാളിക്ക് 2000 രൂപയാണിപ്പോള്‍ വില. 60,000 രൂപയുടെ തക്കാളിയാണ് ഒറ്റ രാത്രികൊണ്ട് നഷ്ടമായത്. വര്‍ഷങ്ങളായി ഇവിടെ പച്ചക്കറി വ്യാപാരം നടത്തുന്ന തനിക്ക് ആദ്യമായാണ് ഇത്തരമൊരു അനുഭവമെന്ന് ശാന്തിലാല്‍ പറയുന്നു.

ചന്തയിലും പരിസരങ്ങളിലും സി.സി.ടി.വി.യൊന്നും ഇല്ലാത്തതുകൊണ്ട് മോഷ്ടാക്കളെപ്പറ്റി സൂചനയൊന്നും കിട്ടിയിട്ടില്ലെന്ന് പോലീസ് പറഞ്ഞു. ഇവിടത്തെ കയറ്റിറക്കുതൊഴിലാളികളെയും രാത്രി ഈ പ്രദേശങ്ങളില്‍ കിടന്നുറങ്ങുന്നവരെയും പോലീസ് ചോദ്യംചെയ്യുന്നുണ്ട്.