മനുഷ്യരെ മറ്റ് മൃഗങ്ങളില്‍ നിന്ന് വ്യത്യസ്തരാക്കുന്ന ഒട്ടേറെ ഘടകങ്ങളുണ്ട്. കുളിച്ച് വൃത്തിയായി നടക്കുന്നത് അതിലൊന്നാണ്. എന്നാല്‍, കുളിച്ച് കുട്ടപ്പന്മാരാകുന്നത് മനുഷ്യര്‍ മാത്രമല്ലെന്ന് തെളിയിക്കുകയാണ് ഈ വീഡിയോ ദൃശ്യം. ബാത്ത്‌റൂമിലെ സിങ്കിലിറങ്ങിനിന്ന് സോപ്പുപയോഗിച്ച് ശരീരമൊക്കെ കഴുകി വൃത്തിയാക്കുന്നത് ഒരു എലിയാണ്. രണ്ടുകാലില്‍ നിന്ന് മനുഷ്യര്‍ കുളിക്കുന്നതുപോലെ തന്നെയാണ് ആശാന്റെയും നീരാട്ട്.

പെറുവിലെ അങ്കാഷിലെ ഹുറാസ് നഗരത്തിലെ വീട്ടില്‍നിന്ന് ചിത്രീകരിച്ചതാണ് ഈ വീഡിയോയെന്നാണ് കരുതപ്പെടുന്നത്. രണ്ടുകാലില്‍ നിവര്‍ന്നുനിന്ന്, കൈകൊണ്ട് മുഖവും തലയും ശരീരവും കക്ഷവുമൊക്കെ സോപ്പുപയോഗിച്ച് കഴുകുന്നത് ദൃശ്യത്തില്‍ നല്ലവണ്ണം വ്യക്തമാണ്. ഡിജെയായ ഹോസെ കൊറയയാണ് ഈ വീഡിയോ ചിത്രീകരിച്ചതെന്ന് കരുതുന്നു. താന്‍ കുളിക്കാനായി കയറിയപ്പോഴാണ് കുളിമുറിയില്‍ അത്ഭുതപ്പെടുത്തുന്ന ഈ ദൃശ്യം കണ്ടതെന്നാണ് ഹോസെ പറയുന്നത്.

മനുഷ്യര്‍ കുളിക്കുന്നതുപോലെ തന്നെയായിരുന്നു എലിയുടെ കുളിയെന്ന് അദ്ദേഹം പറയുന്നു. 30 സെക്കന്‍ഡോളം എടുത്ത് വൃത്തിയായെന്ന് ഉറപ്പുവരുന്നതുവരെ കുളി നീണ്ടുനിന്നുവെന്നും കൊറയ പറയുന്നു. മൃഗങ്ങളെ സ്‌നേഹിക്കുന്നയാളാണ് താനെന്നും, കുളി കഴിഞ്ഞ് സ്വസ്ഥമായി തിരിച്ചുപോകുന്നതുവരെ താന്‍ കാത്തുനിന്നുവെന്നും കൊറയ പറഞ്ഞു.

ഓണ്‍ലൈനില്‍ കൊറയ പോസ്റ്റ് ചെയ്ത വീഡിയോ അനുദിനം വൈറലായിക്കൊണ്ടിരിക്കുകയാണ്. 3.7 കോടിയോളം പേരാണ് രണ്ടുദിവസംകൊണ്ട് ഈ വീഡിയോ കണ്ടത്. റെഡ്ഡിറ്റില്‍ പോസ്റ്റ് ചെയ്ത വീഡിയോ ഇത്രയും ജനപ്രീതി കൈവരിക്കുമെന്ന് കരുതിയിരുന്നില്ലെന്ന് അദ്ദേഹം പറഞ്ഞു. ചിലര്‍ക്ക് ഇത് യഥാര്‍ഥ എലി തന്നെയാണോ എന്ന കാര്യത്തില്‍ ഇനിയും വിശ്വാസം വന്നിട്ടില്ല.

വളര്‍ത്തുന്ന എലിയാകാം ഇതെന്നും അല്ലെങ്കില്‍, റിമോട്ട് പോലുള്ള എന്തെങ്കിലും കൊണ്ട് നിയന്ത്രിക്കുന്ന എലിയെപ്പോലെ തന്നെയിരിക്കുന്ന കളിപ്പാട്ടമാകാമിതെന്നും സംശയിക്കുന്നവരുണ്ട്. എലിക്ക് വാലില്ലെന്ന വാദമുയര്‍ത്തുന്നവരുമുണ്ട്. ഇതൊരു തമാശ വീഡിയോയായി മാത്രം കണ്ടാല്‍ മതിയെന്നായിരുന്നു വാലില്ലെന്ന വാദം ഉയര്‍ത്തിയവരോട് കൊറയയുടെ മറുപടി.