കടല്‍ കയറി ദുരിതത്തിലായവര്‍ക്ക് വിതരണം ചെയ്യാന്‍ നാട്ടുകാരില്‍ നിന്ന് സംഭരിച്ച ഭക്ഷണപ്പൊതികളിലൊന്നില്‍ കരുതല്‍ നിറച്ച കുമ്പളങ്ങിക്കാരിക്ക് അഭിനന്ദനം
കുമ്പളങ്ങിക്കാരി മേരി സെബാസ്റ്റ്യന്‍ കാറ്ററിങ് പണികള്‍ക്ക് പോകുന്നുണ്ട്. കുറേനാള്‍ പണിയില്ലായിരുന്നു. കഴിഞ്ഞമാസം 15 ദിവസം പണി കിട്ടി. അതില്‍ നിന്ന് കുറച്ചു പൈസ ആരെയും അറിയിക്കാതെ ചെല്ലാനത്ത് കടല്‍ കയറി ദുരിതത്തിലായവര്‍ക്കായി കൊടുക്കാന്‍ മനസ്സുകാട്ടിയത് ഇപ്പോ എല്ലാവരും അറിഞ്ഞു എന്നതിന്റെ ' മനോദുഖത്തിലാണ്' മേരി.
ഇന്നലെ ചെല്ലാനത്ത് കടല്‍ കയറി ദുരിതത്തിലായവര്‍ക്ക് വിതരണം ചെയ്യാന്‍ നാട്ടുകാരില്‍ നിന്ന് സംഭരിച്ച ഭക്ഷണപ്പൊതികളിലൊന്ന് തുറന്ന പൊലീസുകാരില്‍ ഒരാളാണ് നൂറു രൂപ കണ്ടതും വിവരം സിഐ പി.എസ്. ഷിജുവിനെ അറിയിച്ചതും. ഷിജുവും കുമ്പളങ്ങിക്കാരനാണ്. സ്വന്തം നാട്ടിലെ വീട്ടമ്മയുടെ ചെയ്തിയില്‍ സന്തോഷം തോന്നിയാണ് അദ്ദേഹം ഇക്കാര്യം ഫെയ്‌സ്ബുക്കിലിട്ടത്. 'ഒരു പഴം കൊടുത്താല്‍ പോലും സമൂഹ മാധ്യമങ്ങളില്‍ പോസ്റ്റിടുന്ന ഇക്കാലത്ത് വാങ്ങുന്നവന്റെ ആത്മാഭിമാനത്തെ മുറിവേല്‍പ്പിക്കാതെ പൊതിച്ചോറില്‍ 100 രൂപ കരുതിയ മനസിനു മുന്നില്‍ നമിക്കുന്നു' എന്നായിരുന്നു പോസ്റ്റ്.
'തണുപ്പല്ലേ, എന്റെ പൊതി കഴിക്കുന്ന കുടുംബത്തിന് രണ്ടു ദിവസം ചായകുടിക്കാന്‍ ഇത് ഇതിരിക്കട്ടെ എന്നു മാത്രമാണ് കരുതിയത്.'- ചെല്ലാനത്ത് കടല്‍ കെടുതിയിലായവര്‍ക്കായി പൊതിച്ചോറില്‍ നൂറു രൂപവച്ച കുമ്പളങ്ങിക്കാരി മേരി സെബാസ്റ്റ്യന്റെ പ്രതികരണം. 'ഇത് ആരെയും അറിയിക്കാതെ വേണമെന്നു കരുതിയെങ്കിലും ഇപ്പോ എല്ലാവരും അറിഞ്ഞു. സിഐ സാറ് വന്നു സമ്മാനം നല്‍കി. സംഗതി വാര്‍ത്തയായതോടെ പള്ളികളില്‍ നിന്ന് ഒരുപാട് അച്ചന്‍മാര്‍ വിളിച്ചു.
മേരി തുടര്‍ന്നു പറയുന്നു, തണുപ്പുകാലമായാല്‍ ഞാന്‍ ഇടയ്ക്ക് ഓരോ ചായ കുടിക്കും. കുമ്പളങ്ങിയില്‍ ദുരിതത്തിലുള്ള ഒരാള്‍ക്കെങ്കിലും ചായകുടിക്കാന്‍ സഹായകമാകുമല്ലോ, ചോറ് പൊതി കെട്ടിക്കഴിഞ്ഞപ്പോള്‍ മോനോടു പറഞ്ഞു ഒരു കപ്പലണ്ടി വാങ്ങാന്‍. അതിലെ കപ്പലണ്ടി എടുത്ത ശേഷം നൂറു രൂപ വച്ച് സെല്ലോടേപ്പ് ഒട്ടിച്ചാണ് ചോറിനൊപ്പം വച്ചത്. അല്ലെങ്കില്‍ നനവ് പടര്‍ന്നാലോ? സംഗതിയറിഞ്ഞ് വാര്‍ത്തക്കാരൊക്കെ എത്തിയപ്പോള്‍ വെള്ളത്തിലൂടെയാണ് വീട്ടിലെത്തിയത്.
കടല്‍ കയറി നില്‍ക്കുമ്പോള്‍ ഞങ്ങളെല്ലാം ഇത് അനുഭവിക്കുന്നതാണ്. കഴിഞ്ഞ തവണ അടുക്കളയിലും മുറികളിലും വെള്ളം കയറി, കോലായില്‍ മാത്രം വെള്ളം കയറിയില്ല. ചെല്ലാനത്ത് രോഗം കൂടി ഉള്ളതിനാല്‍ അവര്‍ ഒരുപാട് കഷ്ടപ്പെടുന്നുണ്ടാകും. പിന്നെ ഞങ്ങള്‍ കുമ്പളങ്ങിക്കാര്‍ ഉള്ളതില്‍ ഒരു പങ്ക് വരുന്നവര്‍ക്കും കൊടുക്കും. അത് ഭക്ഷണമായാലും.'- മേരിയുടെ വാക്കുകള്‍ നിറഞ്ഞ സന്തോഷം.
ഭര്‍ത്താവ് സെബാസ്റ്റ്യന്‍ വള്ളം നിര്‍മിക്കുന്ന പണിയാണ്. ഇപ്പോള്‍ പണിയില്ലാത്ത സമയവും. മക്കളുടെ രണ്ടു പേരുടെയും വിവാഹം കഴിഞ്ഞു. മകന്‍ സെബിന്‍ ഇന്നലെ ഫെയ്‌സ്ബുക്കിലെഴുതി 'എന്റെ അമ്മയെക്കുറിച്ച് നിറയെ അഭിമാനമാണ്' എന്ന്.
https://www.facebook.com/Malayalivartha
