മലയാളത്തില്‍ സൂപ്പര്‍ഹിറ്റായ ഒരു ചലച്ചിത്രമുണ്ട്, ഹിറ്റ്‌ലര്‍. അതിലെ നായകകഥാപാത്രത്തിന്റെ പേര് മാധവന്‍കുട്ടി എന്നാണെങ്കിലും അയാളുടെ അഞ്ചു സഹോദരിമാരെ അയാള്‍ സംരക്ഷിക്കുന്ന രീതിയും അവരോട് അപമര്യാദയായി പെരുമാറുന്ന ആണ്‍പിള്ളാരോട് അയാള്‍ ഇടപെടുന്ന രീതിയുമൊക്കെ അയാള്‍ക്കു ഒരു ഇരട്ടപ്പേര് സമ്പാദിച്ചു കൊടുത്തിരുന്നു.

ഹിറ്റ്‌ലര്‍ മാധവന്‍കുട്ടി എന്നൊരു വട്ടപ്പേര് ആളുകള്‍ക്കിടയില്‍ തനിക്കുണ്ടെന്ന് അയാള്‍ക്കറിയുകയും ചെയ്യാം. പക്ഷേ, അയാള്‍ കേള്‍ക്കെ അയാളെ ആ പേരു വിളിക്കാന്‍ ആരും ധൈര്യപ്പെടില്ല. അതു കേട്ടാല്‍ അയാള്‍ക്കു കലികയറുമായിരുന്നു. മമ്മൂട്ടി അഭിനയിച്ച് മനോഹരമാക്കിയതാണ് ആ കഥാപാത്രം.

ഇപ്രകാരം സ്വന്തം വ്യക്തിത്വം നഷ്ടപ്പെടുന്ന സാഹചര്യങ്ങള്‍ ആര്‍ക്കുണ്ടായാലും കലികയറുമെന്ന കാര്യത്തില്‍ തര്‍ക്കമില്ല. അതു കൂടാതെ ചരിത്രത്തില്‍ ക്രൂരതയുടെ പര്യായമായി ചിത്രീകരിക്കപ്പെടുന്ന ഹിറ്റ്‌ലറോട് ഉപമിച്ചാലത്തെ കാര്യം ചിന്തിച്ചാല്‍ മതി.

യു.കെയിലെ സാല്‍ഫോര്‍ഡിലെ സ്റ്റുവര്‍ട്ട് നോയ്ഡ് ഗ്രീക്കു ദ്വീപായ റോഡ്‌സിലേയ്ക്ക് സുഹൃത്തുക്കളുമൊത്ത് ജൂലൈയില്‍ ഒരു യാത്ര പോയാലോ എന്നു ആലോചിച്ചപ്പോഴാണ് പാസ്‌പോര്‍ട്ടിനു വേണ്ടി അപേക്ഷിച്ചത്. മേയ് 22-നാണ് അപേക്ഷ സമര്‍പ്പിച്ചത്. കൃത്യം ഒരാഴ്ച കഴിഞ്ഞപ്പോള്‍ തന്നെ പാസ്‌പോര്‍ട്ട് എത്തി.

സന്തോഷത്തോടെ അതു തുറന്നു പരിശോധിച്ച അയാളുടെ സകല സന്തോഷവും അസ്തമിച്ചു. ക്ലീന്‍ ഷേവു ചെയ്ത ഫോട്ടോയാണ് പാസ്‌പോര്‍ട്ടിനായി നല്‍കിയിരുന്നതെങ്കിലും അതില്‍ പതിപ്പിച്ചിരുന്ന ഫോട്ടോയില്‍ അയാള്‍ക്ക് മീശയുള്ളതായ് ആണ് കാണപ്പെട്ടത്.

ഏറ്റവും വിഷമിപ്പിച്ചത് അതല്ല; അയാളുടെ മുഖത്ത് ആ മീശകൂടി വന്നപ്പോള്‍ സ്റ്റുവര്‍ട്ടിന് ചരിത്രനായകന്‍ ഹിറ്റ്‌ലറുമായി നല്ല സാമ്യം തോന്നി. ഹിറ്റ്‌ലര്‍ക്ക് ഉണ്ടായിരുന്നതു പോലുള്ള മീശയാണ് അയാളുടെ ഫോട്ടോയിലുണ്ടായിരുന്നത്.

ഹിറ്റ്‌ലറെപ്പോലിരിക്കുന്ന ചിത്രമുള്ള പാസ്‌പോര്‍ട്ടുമായി ഇനി അടുത്ത 10 വര്‍ഷം ജീവിക്കണമല്ലോ എന്നായി അയാളുടെ ചിന്ത. ബന്ധുക്കളും സുഹൃത്തുക്കളുമെല്ലാം അയാളുടെ അവസ്ഥ കണ്ട് ചിരിയായി. ഇനി എന്താണു ചെയ്യേണ്ടതെന്നറിയാതെ അയാള്‍ ആ വിവരങ്ങളെല്ലാം കാണിച്ചു ഫേസ്ബുക്കില്‍ പോസ്റ്റിട്ടു. അതിനു വന്ന കമന്റുകള്‍ അതിന് അതീവ ഗൗരവം കൊടുക്കേണ്ട എന്ന തരത്തിലുള്ളതായിരുന്നുവെങ്കിലും സ്റ്റുവര്‍ട്ടിന് ഒരു സമാധാനവും കിട്ടിയില്ല.

ഒടുവില്‍ പാസ്‌പോര്‍ട്ട് ഓഫീസുമായി ബന്ധപ്പെട്ട് കാര്യം പറഞ്ഞു. അവിടത്തെ വനിതാ ഉദ്യോഗസ്ഥ വളരെ സൗഹാര്‍ദ്ദ പൂര്‍ണ്ണമായി ഇടപെട്ടുവെന്നും പാസ്‌പോര്‍ട്ട് തിരികെ അയച്ചു കൊടുത്താല്‍ തെറ്റു തിരുത്തി പുതിയ പാസ്‌പോര്‍ട്ട് നല്‍കാമെന്ന് അവര്‍ അറിയിച്ചുവെന്നും സ്റ്റുവര്‍ട്ട് പറയുന്നു.

യുകെയിലെ പാസ്‌പോര്‍ട്ടുകളെല്ലാം അതീവ ശ്രദ്ധയോടെയാണ് തയ്യാറാക്കുന്നതെന്നും, ഇപ്രകാരമൊരു തെറ്റു വരാന്‍ ഇടയായതെങ്ങനെ എന്ന കാര്യത്തില്‍ വിശദമായ അന്വേഷണം നടത്തുമെന്നും പാസ്‌പോര്‍ട്ട് ഓഫീസ് അധികൃതര്‍ അറിയിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha