റാഞ്ചി ടെസ്റ്റിന്റെ രണ്ടാം ദിനം ഒരു താരം ഇന്ത്യന്‍ ആരാധകര്‍ക്ക് അപ്രതീക്ഷിത ബാറ്റിങ് വിരുന്നൊരുക്കി. ആ താരം ആരാണെന്നോ? ബാറ്റിങ്ങില്‍ കാര്യമായ അവകാശവാദം ഒന്നും ഇല്ലാതെയിരുന്ന ഉമേഷ് യാദവ്! വെറും 10 പന്തുകള്‍ മാത്രമേ നീണ്ടുള്ളൂവെങ്കിലും ഉമേഷിന്റെ ബാറ്റില്‍നിന്ന് റാഞ്ചിയില്‍ പിറന്നത് അഞ്ചു പടുകൂറ്റന്‍ സിക്‌സുകള്‍!

ഇന്ത്യന്‍ നിരയില്‍ 'ബാറ്റു പിടിക്കാന്‍' അറിയാവുന്ന അവസാന ജോഡിയായ രവീന്ദ്ര ജഡേജ-രവിചന്ദ്രന്‍ അശ്വിന്‍ സഖ്യം 14 റണ്‍സിന്റെ ഇടവേളയില്‍ മടങ്ങിയതോടെ ഇന്ത്യയെ എത്രയും വേഗം ചുരുട്ടിക്കെട്ടാമെന്ന് ദക്ഷിണാഫ്രിക്ക കരുതിയിരിക്കുമ്പോഴാണ് ഇന്ത്യന്‍ ഇന്നിങ്‌സിലെ 113-ാം ഓവറില്‍ ഉമേഷ് യാദവ് ക്രീസിലെത്തിയത്.

നേരിട്ട ആദ്യ രണ്ടു പന്തുകള്‍ ജോര്‍ജ് ലിന്‍ഡെയെ സിക്‌സടിച്ചാണ് ഉമേഷ് തുടങ്ങിയത്. ലിന്‍ഡെയുടെ തൊട്ടടുത്ത ഓവറില്‍ 3 തവണകൂടി ബൗണ്ടറിക്കു മുകളിലൂടെ പറത്തി. ഒടുവില്‍ ലിന്‍ഡെയുടെ പന്തില്‍ത്തന്നെ പുറത്താകുമ്പോള്‍, 10 പന്തില്‍ 31 റണ്‍സായിരുന്നു ഉമേഷിന്റെ സ്‌കോര്‍. 5 സിക്‌സറുകള്‍. ഒപ്പം ഒരു സിംഗിളും. ടെസ്റ്റ് ചരിത്രത്തിലെ ഏറ്റവും വേഗമേറിയ 30+ സ്‌കോറെന്ന റെക്കോര്‍ഡും ഉമേഷ് യാദവിനു സ്വന്തം. ഉമേഷിന്റെ 'സിക്‌സര്‍ പ്രകടനം' പവലിയനില്‍ ആഘോഷിച്ചു തിമിര്‍ത്ത ഇന്ത്യന്‍ നായകന്‍ വിരാട് കോലിയുടെ വിഡിയോയും സമൂഹമാധ്യമങ്ങളില്‍ വൈറലാണ്.

ടെസ്റ്റ് ക്രിക്കറ്റില്‍ ഒരു ഇന്നിങ്‌സില്‍ ഏറ്റവും ഉയര്‍ന്ന സ്‌ട്രൈക്ക് റേറ്റെന്ന റെക്കോര്‍ഡും റാഞ്ചിയിലെ ജെഎസ്സിഎ രാജ്യാന്തര സ്റ്റേഡിയത്തില്‍ സിക്‌സ് മഴ പെയ്യിച്ച ഉമേഷ് യാദവ് സ്വന്തം പേരിലാക്കി. ന്യൂസീലന്‍ഡ് മുന്‍ നായകന്‍ സ്റ്റീഫന്‍ ഫ്‌ലെമിങ്ങിന്റെ പേരിലുണ്ടായിരുന്ന 15 വര്‍ഷം പഴക്കമുള്ള റെക്കോര്‍ഡാണ് ഉമേഷ് തിരുത്തിയെഴുതിയത്.

2004-ല്‍ ദക്ഷിണാഫ്രിക്കയ്ക്കെതിരെ തന്നെ 11 പന്തില്‍ 31 റണ്‍സ് നേടിയാണ് ഫ്‌ലെമിങ് റെക്കോര്‍ഡ് ബുക്കില്‍ ഇടം പിടിച്ചത്. സ്‌ട്രൈക്ക് റേറ്റ് 281.81. 10 പന്തില്‍നിന്ന് 31 റണ്‍സ് നേടിയതോടെ റെക്കോര്‍ഡ് ഉമേഷ് യാദവിന്റെ പേരിലായി. സ്‌ട്രൈക്ക് റേറ്റ് 310.00 !