ബംഗ്ലദേശിനെതിരായ ട്വന്റി-20 പരമ്പരയില് സഞ്ജു സാംസണെ ഉള്പ്പെടുത്തി
ബംഗ്ലാദേശ്-ഇന്ത്യ ട്വന്റി-20 പരമ്പരയ്ക്കുള്ള ടീമീല് മലയാളി താരം സഞ്ജുവിനെ ബാറ്റ്സ്മാനായി ഉള്പ്പെടുത്തി. ഋഷഭ് പന്താണ് വിക്കറ്റ് കീപ്പര്.
വിരാട് കോലിയുടെ അഭാവത്തില് രോഹിത് ശര്മയാണ് ടീമിനെ നയിക്കുന്നത്. സമീപകാലത്ത് പരിമിത ഓവര് മത്സരങ്ങളില് ഉജ്വല പ്രകടനവുമായി പ്രതിഭ തെളിയിച്ചതോടെയാണ് സഞ്ജു സാംസണ് ഇന്ത്യന് ടീമിലേക്കുള്ള വഴി തുറന്നത്.
വിജയ് ഹസാരെ ട്രോഫിയില് ഇരട്ട സെഞ്ചുറി കുറിച്ച പ്രകടനത്തോടെ സഞ്ജു ദേശീയ ക്രിക്കറ്റില് സാന്നിധ്യമറിയിച്ചു കഴിഞ്ഞിരുന്നു. ഗൗതം ഗംഭീര് ഉള്പ്പെടെയുള്ള താരങ്ങള് സഞ്ജുവിന് അവസരം നല്കണമെന്ന പരസ്യ പ്രസ്താവനകളുമായി രംഗത്തെത്തുകയും ചെയ്തിരുന്നു. നവംബര് 11-ന് ആരംഭിക്കുന്ന ബംഗ്ലദേശിന്റെ ഇന്ത്യന് പര്യടനത്തില് മൂന്നു ട്വന്റി20 മത്സരങ്ങളും രണ്ടു ടെസ്റ്റുകളുമാണുള്ളത്.
ട്വന്റി20യില് ഇനിയും ഫോമിലേക്കുയരാത്ത യുവ വിക്കറ്റ് കീപ്പര് ഋഷഭ് പന്തിനു പകരമാണ് സഞ്ജുവിന് സാധ്യത കല്പ്പിക്കപ്പെട്ടതെങ്കിലും രണ്ടുപേരേയും ടീമില് ഉള്പ്പെടുത്തിയിട്ടുണ്ട്. സൂചനയുണ്ടായിരുന്നതു പോലെ ഏകദിന ലോകകപ്പിനുശേഷം തുടര്ച്ചയായി കളിക്കുന്ന ക്യാപ്റ്റന് വിരാട് കോലിക്ക് ട്വന്റി20 പരമ്പരയില്നിന്ന് വിശ്രമം അനുവദിച്ചു. പുറത്തിനേറ്റ പരുക്കിനെ തുടര്ന്നു ശസ്ത്രക്രിയ കഴിഞ്ഞ് വിശ്രമിക്കുന്ന ഹാര്ദിക് പാണ്ഡ്യയ്ക്ക് പകരം മുംബൈ താരം ശിവം ദുബെയെയും ടീമില് ഉള്പ്പെടുത്തിയിട്ടുണ്ട്.
https://www.facebook.com/Malayalivartha