ഇതിനേക്കാളും വലിയ ജയം സ്വപ്നങ്ങളില്‍ മാത്രമെന്ന് പറയേണ്ടി വരും. ഒരു ടീമിലെ എല്ലാവരും ഡക്കൗട്ടായ മത്സരത്തില്‍ ബാറ്റിംഗ് ടീം വെറും ഏഴു റണ്‍സിന് പുറത്തായപ്പോള്‍ എതിര്‍ ടീം ജയിച്ചത് 754 റണ്‍സിന്. ആരും അത്ര പെട്ടെന്ന് മറക്കാത്ത ഈ മത്സരം നടന്നത് ഹാരിസ് ഷീല്‍ഡിന് വേണ്ടിയുള്ള ഇന്റര്‍നാഷണല്‍ സ്‌കൂള്‍സ് ക്രിക്കറ്റ് ടൂര്‍ണമെന്റില്‍ ബോറിവാളിയിലെ സ്വാമി വിവേകാനന്ദ ഇന്റര്‍നാഷണല്‍ സ്‌കൂളും അന്ധേരിയിലെ ചില്‍ഡ്രന്‍സ് വെല്‍ഫെയര്‍ സ്‌കൂളും തമ്മിലായിരുന്നു മത്സരം.

ഇന്റര്‍സ്‌കൂള്‍ ക്രിക്കറ്റ് ചരിത്രത്തിലെ ഏറ്റവും വലിയ തോല്‍വിയാണ് ചില്‍ഡ്രന്‍സ് വെല്‍ഫെയര്‍ സ്‌കൂള്‍ നേരിട്ടത്. ആദ്യം ബാറ്റ് ചെയ്ത വിവേകാനന്ദ സ്‌കൂള്‍ 39 ഓവറില്‍ നാലു വിക്കറ്റ് നഷ്ടത്തില്‍ 761 റണ്‍സ് അടിച്ചു. മറുപടി ബാറ്റിംഗിലായിരുന്നു അസാധാരണ ഇന്നിംഗ്‌സ് കണ്ടത്. രണ്ടാമത് ബാറ്റ് ചെയ്ത വെല്‍ഫെയര്‍ സ്‌കൂളിലെ എല്ലാവരും പൂജ്യത്തിന് പുറത്തായപ്പോള്‍ ആകെ കിട്ടിയ ഏഴു റണ്‍സ് എക്‌സ്ട്രായില്‍ നിന്നുമായിരുന്നു. വെറും ആറു ഓവര്‍ കൊണ്ട് കളി കഴിഞ്ഞു. എതിര്‍ ടീമിനെ തകര്‍ത്തത് എസ്‌വിഐഎസിന്റെ പേസര്‍ അലോക് പാലായിരുന്നു. വെറും മൂന്ന് ഓവര്‍ എറിഞ്ഞ പാല്‍ മൂന്ന് റണ്‍സ് കൊടുത്ത ആറ് വിക്കറ്റാണ് വീഴ്ത്തിയത്. നായകന്‍ വാരോട് വാസ് മൂന്നിന് രണ്ടു പേരെ പുറത്താക്കിയപ്പോള്‍ ബാക്കി രണ്ടു പേര്‍ റണ്ണൗട്ടായി.

ആദ്യം ബാറ്റ് ചെയ്ത വിവേകാനന്ദ സ്‌കൂളിലെ മീറ്റ് മായേക്കര്‍ ട്രിപ്പിള്‍ സെഞ്ച്വറി നേടി. 338 റണ്‍സടിച്ച് പുറത്താകാതെ നിന്ന മായേക്കര്‍ 134 പന്തുകളില്‍ 56 ബൗണ്ടറികളും ഏഴ് സിക്‌സറുകളുമാണ് അടിച്ചത്. 95 റണ്‍സുമായി കൃഷ്ണാ പാര്‍ട്ടേയും 67 റണ്‍സുമായി ഇഷാന്‍ റോയിയും മികച്ച ബാറ്റിംഗ് നടത്തി. ഓവര്‍ പൂര്‍ത്തിയാക്കാന്‍ സമയം കൂടുതല്‍ എടുത്തതിനെ തുടര്‍ന്ന ആറ് ഓവര്‍ വെട്ടിക്കുറയ്‌ക്കേണ്ടി വന്നതിന് പിഴയായി 156 റണ്‍സ് കൂടി ചില്‍ഡ്രന്‍സ് ബൗളര്‍മാരില്‍ നിന്നും വിവേകാനന്ദ സ്‌കൂളിന് കിട്ടുകയും ചെയ്തു. നായകന്‍ ആയുഷ് ജേത്വയും രണ്ടു പ്രധാന ബാറ്റ്‌സ്മാന്‍മാരും മുംബൈയുടെ അണ്ടര്‍ 16 ടീമിന്റെ ക്യാമ്പിലേക്ക് പോയതിനാല്‍ അവരില്ലാതെയായിരുന്നു ടീം കളിച്ചത്.