ഇന്ത്യന്‍ ടീമിലെ ഏറ്റവും വിശ്വസ്തനായ ഓള്‍ റൗണ്ടര്‍. കളിക്കളത്തിനെന്നപോലെ കാന്‍സറിനോടും പൊരുതി വിജയം കൈവരിച്ച് തന്റെ ആത്മവിശ്വാസം കൊണ്ട് വീണ്ടും തിരികെ ടീമിലെത്തിയ താരം. യുവരാജിന് വിശേഷണങ്ങള്‍ വളരെ കൂടുതലാണ്. ഇതാ തന്റെ തിരിച്ചുവരവിനെ കുറിച്ചു. തന്റെ മികച്ച ക്യാപ്റ്റനെ കുറിച്ചു യുവരാജ് സിംഗ് തുറന്നു പറയുകയാണ്. ഇന്ത്യന്‍ ടീമിലേക്ക് തിരിച്ചുവരാന്‍ കാരണക്കാരനായത് വിരാട് കോലിയായിരുന്നുവെന്നാണ് യുവരാജ് സിംഗ് പറഞ്ഞത്. കോലിയുടെ പിന്തുണയില്ലായിരുന്നെങ്കില്‍ ഇന്ത്യന്‍ ടീമില്‍ തിരിച്ചെത്താനാവില്ലായിരുന്നുവെന്നും യുവി ഒരു ദേശീയ ചാനലിന് നല്‍കിയ അഭിമുഖത്തില്‍ പറഞ്ഞു. കോലി തിരിച്ചുകൊണ്ടുവന്നെങ്കിലും 2019ലെ ലോകകപ്പിനുളള ഇന്ത്യന്‍ ടീമില്‍ എനിക്ക് സ്ഥാനമുണ്ടാവില്ലെന്ന യാഥാര്‍ത്ഥ്യം എന്നോട് പറഞ്ഞത് എനിക്ക് എന്റെ കരിയറിനെക്കുറിച്ചുള്ള യഥാര്‍ത്ഥ ചിത്രം നല്‍കിയതും ധോണിയായിരുന്നുവെന്നും യുവരാജ് പറഞ്ഞു.

2019 ലോകകപ്പിന്റെ സമയം യുവരാജ് ക്രിക്കറ്റില്‍ നിന്ന് വിട്ടുനില്‍ക്കുന്ന സമയമായിരുന്നു. എന്നാല്‍ 2015ലെ ലോകകപ്പ് ടീമില്‍ നിന്ന് അദ്ദേഹത്തെ ഒഴിവാക്കിയത് ഏറെ ചര്‍ച്ചയായിരുന്നു. 2015 ലോകകപ്പിന് മുമ്പ് യുവരാജ് ആഭ്യന്തര ക്രിക്കറ്റില്‍ സെഞ്ച്വറി നേടിയെങ്കിലും ലോകകപ്പ് ടീമില്‍ ഇടം ലഭിച്ചില്ല. 2019ലെ ലോകകപ്പ് ടീമിലേക്ക് എന്നെ സെലക്ടര്‍മാര്‍ പരിഗണിക്കില്ലെന്ന് ധോണി പറഞ്ഞിരുന്നു. അദ്ദേഹത്തിന് ആവുന്നതുപോലെയൊക്കെ അക്കാര്യം എനിക്ക് വ്യക്തമാക്കി തന്നു. 2011 ലോകകപ്പ് വരെ ധോണിക്ക് എനിക്ക് വിശ്വാസമുണ്ടായിരുന്നു. എന്നോട് ഇടക്കിടെ പറയുമായിരുന്നു, നീയാണ് എന്റെ പ്രധാന കളിക്കാരനെന്ന്. പക്ഷെ അസുഖബാധിതനായി ക്രിക്കറ്റില്‍ നിന്ന് പുറത്തായശേഷം തിരിച്ചുവന്നപ്പോള്‍ കളിയാകെ മാറിയിരുന്നു.

ടീമിലും ഒരുപാട് മാറ്റങ്ങളുണ്ടായി. 2015ലെ ലോകകപ്പ് ടീമില്‍ ഇടം ലഭിക്കാത്തതിനെക്കുറിച്ച് ആരെയും വ്യക്തിപരമായി കുറ്റപ്പെടുത്താനാവില്ല. ഒരു ക്യാപ്റ്റന് എല്ലാവരെയും തൃപ്തിപ്പെടുത്തി തീരുമാനം എടുക്കാനാവില്ലല്ലോ. അന്തിമമായി ടീമിന്റെ വിജയമാണല്ലോ പ്രധാനം. തന്റെ 17 വര്‍ഷത്തെ അന്താരാഷ്ട്ര കരിയറില്‍ വിവിധ ക്യാപ്റ്റന്‍മാരുടെ കീഴില്‍ കളിച്ചപ്പോള്‍ 2011ല്‍ ധോണിക്ക് കീഴിലാണ് ലോകകപ്പ് നേടിയതെന്നും താന്‍ ടൂര്‍ണമെന്റിലെ താരമായതെന്നും യുവരാജ് പറഞ്ഞു. എന്നാല്‍ ധോണിക്ക് കീഴില്‍ ലോകകപ്പ് നേടിയിട്ടുണ്ടെങ്കിലും ലോകകപ്പിലെ താരമായിട്ടുണ്ടെങ്കിലും ക്യാപ്റ്റനെന്ന നിലയില്‍ സൗരവ് ഗാംഗുലിക്ക് കീഴിലാണ് തനിക്ക് കൂടുതല്‍ നല്ല ഓര്‍മകളുള്ളതെന്നും യുവി പറഞ്ഞു. 2000 ല്‍ 18 ആം വയസ്സില്‍ അരങ്ങേറ്റം കുറിച്ച യുവരാജ് 2017 ലാണ് ഇന്ത്യയ്ക്കായി അവസാന മത്സരം കളിച്ചത്.