കോവിഡ് പ്രതിസന്ധിക്കിടെയാണ് ഐ.പി.എല്ലിന് യു.എ.ഇയില്‍ നടത്താന്‍ തീരുമാനിക്കുന്നത്. എന്നാല്‍ കോവിഡ് ഭീഷണി അങ്ങനെയൊന്നും ഐ.പി.എല്ലിനെ വിട്ടൊഴിയുമെന്ന് തോന്നുന്നില്ല. കാരണം ഐ.പി.എല്ലിലെ സൂപ്പര്‍ ടീമായ ചെന്നൈ സൂപ്പര്‍ കിംഗ്‌സിനെ തന്നെ കോവിഡ് പിടികൂടിയിരിക്കുകയാണ്. ഐപിഎല്‍ തുടങ്ങാന്‍ ആഴ്ചകള്‍ മാത്രം ബാക്കിയിരിക്കെ ചെന്നൈ സൂപ്പര്‍ കിംഗ്‌സിന് കനത്ത തിരിച്ചടിയാകുകയാണ് കോവിഡ്. ഒരു കളിക്കാരനുള്‍പ്പെടെ ചെന്നൈ സംഘത്തിലെ 13 പേര്‍ക്ക് കോവിഡ് സ്ഥിരീകരിച്ചു. ഇന്ത്യന്‍ ഏകദിന-ടി20 ടീം അംഗമായ വലംകയന്‍ മീഡിയം പേസര്‍ ദീപക് ചാഹറിനാണ് കോവിഡ് സ്ഥിരീകരിച്ചതെന്ന് സ്ഥിതികരിക്കാത്ത വിവരം. ഇതിന് പുറമെ ചെന്നൈ ടീം മാനേജ്‌മെന്റിലെ ഏറ്റവും മുതിര്‍ന്ന വ്യക്തിക്കും അദ്ദേഹത്തിന്റെ ഭാര്യക്കും സോഷ്യല്‍ മീഡിയ ടീമിലെ രണ്ട് പേര്‍ക്കും കൊവിഡ് സ്ഥിരീകരിച്ചിട്ടുണ്ട്.

കോവിഡ് വ്യാപനത്തിന്റെ പശ്ചാത്തലത്തില്‍ യുഎഇയിലേക്ക് മാറ്റിയ ഐപിഎല്ലിനായി ചെന്നൈ താരങ്ങള്‍ ഈ മാസം 21നാണ് യുഎഇയിലെത്തിയത്. ചെന്നൈയില്‍ നിന്നുള്ള ചാര്‍ട്ടേഡ് വിമാനത്തില്‍ ക്യാപ്റ്റന്‍ എം.എസ്. ധോണി ഉള്‍പ്പെടെയുള്ളവര്‍ ഒരുമിച്ചാണ് യുഎഇയിലെത്തിയത്.അടുത്ത മാസം 19 മുതല്‍ നവംബര്‍ 30 വരെയാണ് ഇത്തവണ ഐപിഎല്‍ അരങ്ങേറുക. യുഎഇയിലെത്തിയ ശേഷം ഒന്നാം ദിനവും മൂന്നാം ദിനവും ആറാം ദിനവുമായി മൂന്നു ഘട്ടങ്ങളിലായാണ് ചെന്നൈ താരങ്ങള്‍ക്ക് കോവിഡ് പരിശോധന നടത്തിയത്. ഇന്ത്യയില്‍നിന്ന് യാത്ര തിരിക്കും മുന്‍പും കോവിഡ് പരിശോധന നടത്തിയിരുന്നു. യുഎഇയിലെത്തിയ ശേഷമുള്ള പരിശോധനകളില്‍ ഒന്നിലാണ് ഇന്ത്യന്‍ താരത്തിനും സ്റ്റാഫ് അംഗങ്ങളില്‍ ചിലര്‍ക്കും കോവിഡ് സ്ഥിരീകരിച്ചത്.

കോവിഡ് സ്ഥിരീകരിച്ച പശ്ചാത്തലത്തില്‍ ചെന്നൈ ടീമിന്റെ ക്വാറന്റൈന്‍ കാലാവധി വീണ്ടും നീട്ടിയിട്ടുണ്ട്. ഇന്ന് പരിശീലനത്തിന് ഇറങ്ങാനിരുന്ന തീരുമാനം നേരത്തെ ചെന്നൈ അടുത്ത മാസം ഒന്നിലേക്ക് മാറ്റിയിരുന്നു. ഓഗസ്റ്റ് 21ന് കളിക്കാരും സപ്പോര്‍ട്ട് സ്റ്റാഫും ദുബായില്‍ എത്തിയശേഷം ഒന്ന്, മൂന്ന്, ആറ് ദിവസങ്ങളില്‍ കൊവിഡ് പരിശോധനക്ക് വിധേയരാക്കിയിരുന്നു. ഇതിലാണ് നിരവധി പേര്‍ക്ക് കോവിഡ് സ്ഥിരീകരിച്ചത്. കളിക്കാര്‍ക്കും സപ്പോര്‍ട്ട് സ്റ്റാഫിനും കോവിഡ് സ്ഥിരീകരിച്ചത് ചെന്നൈ ടീമിന്റെ തയാറെടുപ്പുകളെ പ്രതികൂലമായി ബാധിക്കുമെന്നാണ് റിപ്പോര്‍ട്ട്. ദുബായിലെ ഏഴ് ദിവസത്തെ നിര്‍ബന്ധിത ക്വാറന്റൈന്‍ കാലാവധി പൂര്‍ത്തിയാക്കി ചെന്നൈ ഉള്‍പ്പെടെയുള്ള ടീമുകള്‍ ഇന്ന് പരിശീലനത്തിന് ഇറങ്ങാനിരുന്നതായിരുന്നു. ഇതിനിടെയാണ് ചെന്നൈ സംഘത്തിലെ നിരവധി പേര്‍ക്ക് കോവിഡ് സ്ഥിരീകരിച്ചിരിക്കുന്നത്. ഇത് മറ്റ് ടീമുകള്‍ക്കിടയിലും ആശങ്കയുണ്ടാക്കിയിട്ടുണ്ട്.

ബിസിസിഐയുടെ കോവിഡ് പ്രോട്ടോക്കോള്‍ പ്രകാരം കോവിഡ് സ്ഥിരീകരിക്കുന്നവര്‍ ഏഴു ദിവസം കൂടുതലായി ക്വാറന്റീനില്‍ കഴിയണം. തുടര്‍ച്ചയായ പരിശോധനകളില്‍ ഫലം നെഗറ്റീവാണെന്ന് ഉറപ്പാക്കിയശേഷം മാത്രമേ ചെന്നൈ ടീമിന് വീണ്ടും ബയോ സെക്യുര്‍ ബബഌന്റെ ഭാഗമാകാനാകൂ.