ടീം വിട്ട തീരുമാനത്തില്‍ സുരേഷ് റെയ്‌ന ഖേദിക്കേണ്ടി വരുമെന്ന് പറഞ്ഞത് താന്‍ പറഞ്ഞ കാര്യങ്ങള്‍ വളച്ചൊടിച്ചതാണെന്ന് ശ്രീനിവാസന്‍
ഐപിഎല്‍-നായി യുഎഇയിലെത്തി ദുബായില്‍ ക്വാറന്റീനില്‍ കഴിയുന്നതിനായി ഒരുക്കിയ സൗകര്യങ്ങളില്‍ അതൃപ്തി പ്രകടിപ്പിച്ച് ടീം മാനേജ്‌മെന്റുമായി ഉരസി നാട്ടിലേക്ക് മടങ്ങിയ സുരേഷ് റെയ്‌നയ്ക്കെതിരെ ഞായറാഴ്ച നടത്തിയ വിമര്‍ശനങ്ങളില്‍നിന്ന് മലക്കംമറിഞ്ഞ് ചെന്നൈ സൂപ്പര്‍ കിങ്‌സ് ഉടമ എന്‍.ശ്രീനിവാസന്‍. ഞായറാഴ്ച ശ്രീനിവാസന്‍ പറഞ്ഞത് ടീം വിട്ട തീരുമാനത്തില്‍ സുരേഷ് റെയ്‌ന ഖേദിക്കേണ്ടി വരുമെന്നാണ്.
ചെന്നൈ സൂപ്പര്‍ കിങ്‌സ് സുരേഷ് റെയ്‌നയ്ക്കൊപ്പം ഉറച്ചുനില്‍ക്കുമെന്നാണ് അദ്ദേഹത്തിന്റെ പുതിയ പ്രസ്താവന. താന്‍ മുന്‍പു പറഞ്ഞ കാര്യങ്ങള്‍ വളച്ചൊടിച്ച് വിവാദമാക്കിയതാണെന്നും ശ്രീനിവാസന്‍ വിശദീകരിച്ചു.
റെയ്‌ന ഇന്ത്യയിലേക്ക് മടങ്ങിയതിനു പിന്നാലെ റെയ്‌നയ്ക്കെതിരെ രൂക്ഷ വിമര്‍ശനവുമായി ശ്രീനിവാസന്‍ രംഗത്തെത്തുകയും ചെയ്തു. ഇതോടെ, റെയ്‌നയും ടീം മാനേജ്‌മെന്റും തമ്മിലുള്ള അഭിപ്രായ ഭിന്നത മറനീക്കി പുറത്തുവന്നു. അതേസമയം, ഐപിഎല്ലിന്റെ ആരംഭം മുതല്‍ ചെന്നൈ സൂപ്പര്‍ കിങ്‌സിനായി വിയര്‍പ്പൊഴുക്കിയ റെയ്‌നയെ ടീം ഉടമ തള്ളിപ്പറഞ്ഞത് ആരാധകരുടെ രൂക്ഷ വിമര്‍ശനത്തിന് കാരണമായിരുന്നു. ഇതിനു പിന്നാലെയാണ് ശ്രീനിവാസന്‍ നിലപാട് മയപ്പെടുത്തിയത്.
2008ലെ പ്രഥമ ഐപിഎല്‍ സീസണിനു മുന്നോടിയായി താരലേലത്തില്‍ ചെന്നൈ സൂപ്പര്‍ കിങ്‌സ് ടീമിലെത്തിച്ചതുമുതല്‍ ആരാധകരുടെ പ്രിയപ്പെട്ട 'ചിന്ന തല'യാണ് സുരേഷ് റെയ്‌ന. ഐപിഎല്ലില്‍ ഇന്ത്യന്‍ നായകന്‍ വിരാട് കോലി കഴിഞ്ഞാല്‍ കൂടുതല്‍ റണ്‍സ് നേടിയ താരവും റെയ്‌നയാണ്. ഇതില്‍ ഭൂരിഭാഗം റണ്‍സും ചെന്നൈയ്ക്കു വേണ്ടി നേടിയതാണ്.
ഐപിഎല്ലില്‍ 189 ഇന്നിങ്‌സുകളില്‍നിന്ന് 38 അര്‍ധസെഞ്ചുറികള്‍ സഹിതം 137.14 സ്‌ട്രൈക്ക് റേറ്റില്‍ 5368 റണ്‍സാണ് റെയ്‌നയുടെ സമ്പാദ്യം. ഐപിഎല്ലില്‍ 193 മത്സരങ്ങള്‍ കളിച്ച റെയ്‌നയുടെ പേരിലാണ് കൂടുതല്‍ മത്സരങ്ങള്‍ കളിച്ചതിന്റെ റെക്കോര്‍ഡും. രണ്ടാം സ്ഥാനത്തുള്ള ചെന്നൈ നായകന്‍ മഹേന്ദ്രസിങ് ധോണിയേക്കാള്‍ മൂന്നു കളികള്‍ കൂടുതല്‍ റെയ്‌ന കളിച്ചിട്ടുണ്ട്. ഇടക്കാലത്ത് ഒത്തുകളി വിവാദത്തെ തുടര്‍ന്ന് ചെന്നൈ സൂപ്പര്‍ കിങ്‌സിന് രണ്ടു വര്‍ഷത്തെ വിലക്ക് ഏര്‍പ്പെടുത്തിയപ്പോള്‍ ഗുജറാത്ത് ലയണ്‍സിനു വേണ്ടിയും കളിച്ചു.
താന്‍ പറഞ്ഞ കാര്യങ്ങള്‍ സന്ദര്‍ഭത്തില്‍നിന്ന് അടര്‍ത്തിമാറ്റി വിവാദം സൃഷ്ടിച്ചതാണെന്ന ശ്രീനിവാസന്റെ ആരോപണം ' ടൈംസ് ഓഫ് ഇന്ത്യ' പ്രതിനിധിയുമായി സംസാരിക്കുമ്പോഴാണ് പുറത്തുവന്നത്. 'ഐപിഎല്ലിന്റെ ആരംഭം മുതല്‍ ഇതുവരെ ചെന്നൈ സൂപ്പര്‍ കിങ്‌സിന് റെയ്‌ന നല്‍കിയ സംഭാവനകള്‍ നിസീമമാണെ'ന്ന് അദ്ദേഹം വ്യക്തമാക്കി. 'ഇപ്പോള്‍ റെയ്‌ന കടന്നുപോകുന്ന പ്രത്യേക സാഹചര്യത്തില്‍ അദ്ദേഹത്തിന് വേണ്ട സ്വകാര്യത നല്‍കുകയാണ് ചെയ്യേണ്ടതെ'ന്നും ശ്രീനിവാസന്‍ ചൂണ്ടിക്കാട്ടി.
'ചെന്നൈ സൂപ്പര്‍ കിങ്‌സ് എക്കാലവും സുരേഷ് റെയ്‌നയ്ക്കൊപ്പം ഉറച്ചുനില്‍ക്കും. ഈ വേദനയുടെ ഘട്ടത്തില്‍ അദ്ദേഹത്തിന് ഞങ്ങള്‍ എല്ലാ പിന്തുണയും നല്‍കും' - ശ്രീനിവാസന്‍ പറഞ്ഞു. 'ഈ കളിക്കാരെല്ലാം ഒരു കുടുംബം പോലെ കഴിയുന്നവരാണ്. ഒരു പതിറ്റാണ്ടിലധികമായി അവര്‍ ഒരു കുടുംബമായിട്ട്. കളിക്കാരെല്ലാം പ്രഥമ സ്ഥാനം ആഗ്രഹിക്കുന്നവരാണെന്ന് ഞാന്‍ പറഞ്ഞത് മോശം അര്‍ഥത്തിലല്ല. സംഗീത നാടകത്തിലെ മുഖ്യ ഗായികയോടാണ് ഞാന്‍ അവരെ താരതമ്യപ്പെടുത്തിയത്. അതുപോലെ കളത്തില്‍ ഏറ്റവും മുന്നില്‍ നില്‍ക്കേണ്ടവരല്ലേ അവര്‍' - വിവാദമായ പ്രസ്താവന വിശദീകരിച്ച് ശ്രീനിവാസന്‍ പറഞ്ഞു.
ഐപിഎല്ലിനിടെ നാട്ടിലേക്ക് മടങ്ങാനുള്ള തീരുമാനത്തില്‍ റെയ്‌ന ഖേദിക്കേണ്ടി വരും എന്നുള്‍പ്പെടെ നടത്തിയ രൂക്ഷമായ പരാമര്‍ശങ്ങളില്‍നിന്നാണ് ശ്രീനിവാസന്‍ പിന്നോട്ടുപോയത്.
https://www.facebook.com/Malayalivartha
