ഇന്ത്യ-ഓസ്ട്രേലിയ ക്രിക്കറ്റ് പരമ്പരയ്ക്ക് ഡേ-നൈറ്റ് ഏകദിന പേരാട്ടത്തോടെ ഇന്നു തുടക്കം
കോവിഡ് മഹാമാരിയുടെ പശ്ചാത്തലത്തില് ഒന്പതു മാസങ്ങള്ക്കു ശേഷം് ടീം ഇന്ത്യ ഇന്ന് കളത്തിലിറങ്ങുന്നു. ഇന്ത്യ-ഓസ്ട്രേലിയ ക്രിക്കറ്റ് പരമ്പരയ്ക്ക് ഡേ-നൈറ്റ് ഏകദിന പേരാട്ടത്തോടെ ഇന്നു സിഡ്നിയില് തുടക്കം. ഇന്ത്യന് സമയം രാവിലെ 9.30 മുതലാണ് മത്സരം.
29-ന് ഇതേ വേദിയില് തന്നെയാണ് മൂന്നു കളികളടങ്ങിയ ഏകദിന പരമ്പരയിലെ രണ്ടാം ഏകദിനം നടക്കുക. അവസാന മത്സരം കാന്ബറയിലെ മനൂക ഓവലിലാണ്. ട്വന്റി20 പരമ്പരയിലെ ആദ്യ മത്സരങ്ങള് ഇവിടെയാണ്. നാലു ടെസ്റ്റുകളുടെ ബോര്ഡര്-ഗാവസ്കര് ട്രോഫി ഡിസംബര് 17-ന് തുടങ്ങും.
സിഡ്നിയില് ടീം ഇന്ത്യയുടെ റെക്കോഡ് മോശമാണ്. ഇന്ത്യ ഇവിടെ രണ്ടു ജയം മാത്രം നേടിയപ്പോള് ഓസ്ട്രേലിയ 14 ജയങ്ങള് സ്വന്തമാക്കി. എന്നാല് ഇന്ത്യ അവസാനം ഓസ്ട്രേലിയയില് കളിച്ച നാലില് മൂന്നു മത്സരങ്ങളും ജയിക്കാന് കഴിഞ്ഞു എന്ന അനുകൂല ഘടകവുമുണ്ട്. കഴിഞ്ഞ തവണത്തെ ഓസ്ട്രേലിയന് പര്യടനത്തില് വിരാട് കോഹ്ലിയും സംഘവും ഏകദിന, ടെസ്റ്റ് പരമ്പരകള് സ്വന്തമാക്കിയിരുന്നു. ട്വന്റി20 പരമ്പര സമനിലയായി. കഴിഞ്ഞ പരമ്പരയിലെ നേട്ടം ആവര്ത്തിക്കുക ഇന്ത്യക്കു ശ്രമകരമായിരിക്കും.
ഓസ്ട്രേലിയക്കെതിരേ മികച്ച റെക്കോഡുള്ള രോഹിത് ശര്മയുടെ അഭാവം ഇന്ത്യക്ക് തിരിച്ചടിയാണ്. രോഹിതിന്റെ അഭാവത്തില് ശിഖര് ധവാനോടൊപ്പം ഓപ്പണറായി കെ.എല്. രാഹുലോ മായങ്ക് അഗര്വാളോ ഇറങ്ങിയേക്കും. എം.എസ്. ധോണിക്കു പകരം രാഹുല് വിക്കറ്റ് കീപ്പറായേക്കും.
ഓള്റൗണ്ടര് ഹര്ദിക് പാണ്ഡ്യ മടങ്ങിയെത്തിയത് ടീമിന് കരുത്ത് പകരും. അതിവേഗ മൈതാനത്ത് നാല് ഫാസ്റ്റ് ബൗളര്മാരെ ഇന്ത്യ പരിഗണിച്ചേക്കും. ജസ്പ്രീത് ബൂംറ, മുഹമ്മദ് ഷമി, നവദീപ് സൈനി എന്നിവര് മികച്ച ഫോമിലാണെന്നതും ഇന്ത്യക്ക് ആശ്വാസമേകുന്നു. ഓള്റൗണ്ടറായി രവീന്ദ്ര ജഡേജയും ടീമില് ഇടം പിടിച്ചേക്കും.
ഓസീസ് എത്തുന്നത് മികച്ച ഓള്റൗണ്ടര്മാരുടെ കരുത്തിലാണ്. സ്റ്റീവ് സ്മിത്ത് ഓസീസ് ടീമിലേക്ക് മടങ്ങിയെത്തിയത് കരുത്ത് പകരും. ഓപ്പണിങ്ങില് ആരോണ് ഫിഞ്ചിനൊപ്പം ഡേവിഡ് വാര്ണറും മധ്യനിരയില് ലാബുഷാനെയും അവര്ക്കു കരുത്തു പകരും. ഗ്ലെന് മാക്സ് വെല് ഭീഷണി ഉയര്ത്തുന്ന താരമാണ്. ഇംഗ്ലണ്ട് പരമ്പരയില് മാക്സ് വെല് തിളങ്ങിയിരുന്നു. മാര്ക്കസ് സ്റ്റോയിനിസ് ഓസീസ് നിരയില് നിര്ണായക സാന്നിധ്യമായേക്കും. പേസര്മാരായി പാറ്റ് കമ്മിന്സിനൊപ്പം മിച്ചല് സ്റ്റാര്ക്കും ജോഷ് ഹെയ്സല്വുഡും ഇറങ്ങിയേക്കും. സ്പിന് നിരയില് ആദം സാംപ ടീമില് ഇടം പിടിക്കാനാണ് സാധ്യത.
സാധ്യതാ ടീം.: ഇന്ത്യ: ശിഖര് ധവാന്, മായങ്ക് അഗര്വാള്, വിരാട് കോലി, ശ്രേയസ് അയ്യര്, കെഎല് രാഹുല്, ഹര്ദിക് പാണ്ഡ്യ, രവീന്ദ്ര ജഡേജ, ജസ്പ്രീത് ബൂംറ, മുഹമ്മദ് ഷമി, നവദീപ് സൈനി, യുസ്വേന്ദ്ര ചഹാല്.
ഓസ്ട്രേലിയ: ആരോണ് ഫിഞ്ച്, ഡേവിഡ് വാര്ണര്, സ്റ്റീവ് സ്മിത്ത്, ലാബുഷാനെ, ഗ്ലെന് മാക്സ്വെല്, അലക്സ് ക്യാരി, സേ്റ്റായിനിസ്, പാറ്റ് കമ്മിന്സ്, മിച്ചല് സ്റ്റാര്ക്ക്, ജോഷ് ഹെയ്സല്വുഡ്, ആദം സാംപ.
സിഡ്നി ക്രിക്കറ്റ് ഗ്രൗണ്ടില് നടക്കുന്ന മത്സരങ്ങള് സോണി ടെന് 1, സോണി ടെന് 3, സോണി സിക്സ് ചാനലുകളിലും ഓണ്ലൈനായി സോണി ലൈവിലും തത്സമയം കാണാം.
https://www.facebook.com/Malayalivartha
