2022 ഫെബ്രുവരിയില്‍ കളിക്കളത്തിലേക്ക്​​ തിരിച്ചെത്തുമെന്ന സൂചന നല്‍കി മുന്‍ ഇന്ത്യന്‍ ക്രിക്കറ്റ്​ താരം യുവാരജ്​ സിങ്​. 2017ല്‍ ഇംഗ്ലണ്ടിനെതിരെ നടന്ന മത്സരത്തില്‍ 150 റണ്‍സ്​ നേടിയതിന്‍റെ വിഡിയോ പങ്കുവെച്ചാണ്​ പിച്ചിലേക്ക്​ മടങ്ങിവരുന്ന കാര്യം അറിയിച്ചത്​.

'ദൈവമാണ് നിങ്ങളുടെ വിധി തീരുമാനിക്കുന്നത്. പൊതുജനങ്ങളുടെ ആവശ്യപ്രകാരം ഞാന്‍ ഫെബ്രുവരിയില്‍ കളിക്കളത്തില്‍ തിരിച്ചെത്തുമെന്ന് പ്രതീക്ഷിക്കുന്നു. ഇതൊരു വല്ലാത്ത അനുഭവമാണ്​. നിങ്ങളുടെ സ്നേഹത്തിനും ആശംസകള്‍ക്കും നന്ദി. നമ്മുടെ ടീമിനെ പിന്തുണക്കുന്നത് തുടരുക. ഒരു യഥാര്‍ത്ഥ ആരാധകന്‍ പ്രയാസകരമായ സമയങ്ങളിലും അവരുടെ പിന്തുണ ഉറപ്പാക്കും' -വിഡിയോക്ക്​ അടിക്കുറിപ്പായി യുവരാജ്​ എഴുതി.

2000ല്‍ നെയ്‌റോബിയില്‍ നടന്ന ഐ.സി.സി നോക്കൗട്ട് ട്രോഫിയില്‍ അരങ്ങേറ്റം കുറിച്ച യുവരാജ്​ 17 വര്‍ഷത്തോളം ഇന്ത്യക്കായി കളിച്ചു. 2017 ജൂണ്‍ 30ന് വെസ്റ്റ് ഇന്‍ഡീസിനെതിരെ നോര്‍ത്ത് സൗണ്ടില്‍ നടന്ന ഏകദിനത്തിലാണ് അവസാനമായി രാജ്യത്തിന്​ വേണ്ടി കളിച്ചത്. പിന്നീട്​ 2019ല്‍ വിരമിക്കല്‍ പ്രഖ്യാപിച്ചു.

2011ലെ ലോകകപ്പില്‍ ഇന്ത്യ ചാമ്ബ്യന്‍മാരായപ്പോള്‍ മാന്‍ ഓഫ് ദ ടൂര്‍ണമെന്‍റ്​ അവാര്‍ഡ്​ യുവരാജ്​ സിങ്ങിനായിരുന്നു. കാന്‍സര്‍ ബാധിതനായിരുന്ന ഇദ്ദേഹം രോഗത്തെ ബൗണ്ടറി കടത്തിയാണ്​ ടീമിലേക്ക്​ തിരിച്ചെത്തിയത്​. 40 ടെസ്റ്റുകളിലും 304 ഏകദിനങ്ങളിലും 58 ട്വന്‍റി20കളിലുമായി 17 സെഞ്ചുറികളും 71 അര്‍ധസെഞ്ചുറികളും സഹിതം 11,000 റണ്‍സ് തികച്ചിട്ടുണ്ട്​ താരം. 39കാരനായ യുവരാജ്​ 148 വിക്കറ്റും വീഴ്ത്തി.

കളിക്കളത്തിലേക്ക്​ മടങ്ങിവരികയാണെന്ന്​ കാണിച്ചുള്ള യുവാരജിന്‍റെ പോസ്റ്റിന്​ താഴെ നിരവധി പേരാണ്​ കമന്‍റ്​ ചെയ്​തിട്ടുള്ളത്​. ഇന്ത്യന്‍ ടീമിലേക്ക്​ തിരിച്ചുവരണമെന്ന്​ പലരും ആവശ്യപ്പെട്ടു. യു.എ.ഇയില്‍ നടക്കുന്ന ട്വന്‍റി20 ലോകകപ്പില്‍ രണ്ട്​ മത്സരങ്ങളില്‍ തോറ്റ്​ ടൂര്‍ണമെന്‍റില്‍നിന്ന്​ പുറത്താകലിന്​ വക്കിലുള്ള ഇന്ത്യന്‍ ടീമിനെ രക്ഷിക്കാന്‍ യുവരാജ്​ സിങ്​ വരണമെന്ന്​ പലരും കുറിച്ചു.