അഫ്​ഗാനിസ്ഥാനെതിരെ 66 റണ്‍സിന്‍റെ മിന്നും ജയവുമായി ടി20 ലോകകപ്പില്‍ തിരിച്ചുവരവിന്‍റെ സൂചന നല്‍കി ടീം ഇന്ത്യ. ടോസ്​ നഷ്​ടമായി ആദ്യം ബാറ്റിങ്ങിനിറങ്ങിയ കോഹ്​ലിയും സംഘവും 210 റണ്‍സായിരുന്നു അടിച്ചെടുത്തത്​​. മറുപടി ബാറ്റിങ്ങിനിറങ്ങിയ അഫ്​ഗാന്‍റെ ഇന്നിങ്​സ്​ 144 റണ്‍സിന്​ അവസാനിച്ചു. സ്​കോര്‍ ഇന്ത്യ: 210 (2 wkts, 20 Ov), അഫ്​ഗാന്‍: 144 (7 wkts, 20 Ov)

അഫ്​ഗാനിസ്താന്​ വേണ്ടി നായകന്‍ മുഹമ്മദ്​ നബിയും (35) കരിം ജനത്തും (35) മാത്രമാണ്​ അല്‍പ്പമെങ്കിലും പൊരുതിയത്​. ഇന്ത്യക്ക്​ വേണ്ടി മുഹമ്മദ്​ ഷമി നാല്​ ഓവറുകളില്‍ 32 റണ്‍സ്​ വഴങ്ങി മൂന്ന്​ വിക്കറ്റുകള്‍ വീഴ്​ത്തി. രവിചന്ദ്ര അശ്വിന്‍ നാല്​ ഓവറുകളില്‍ 14 റണ്‍സ്​ മാത്രം വിട്ടുനല്‍കി രണ്ട്​ വിക്കറ്റുകളും വീഴ്​ത്തി. ജസ്​പ്രീത്​ ബുംറയും രവീന്ദ്ര ജഡേജയും ഓരോ വിക്കറ്റുകളും വീഴ്​ത്തി.

നേരത്തെ ഓപണര്‍മാരായ രോഹിത്​ ശര്‍മയും (74) കെ.എല്‍ രാഹുലും (69) കൂറ്റനടികളുമായി മുന്നില്‍ നിന്ന്​ നയിച്ചതോടെയാണ് ഇന്ത്യയുടെ സ്​കോര്‍​ 20 ഓവറില്‍ രണ്ട്​ വിക്കറ്റ്​ നഷ്​ടത്തില്‍ ഇരട്ടശതകം കടന്നത്​. ടൂര്‍ണമെന്‍റിലെ ഏറ്റവും ഉയര്‍ന്ന്​ സ്​കോര്‍ കൂടിയാണ്​ ഇന്ത്യ ഇന്ന്​ നേടിയ 210 റണ്‍സ്​​. ആദ്യ രണ്ട്​ മത്സരങ്ങളിലെ പരാജയം കാരണം സെമി പ്രതീക്ഷകള്‍ക്ക്​ തിരിച്ചടിയേറ്റ ഇന്ത്യക്ക്​ ജീവന്‍ നല്‍കിയ ഇന്നിങ്​സായിരുന്നു അത്​​. ഇന്ത്യക്ക്​ വേണ്ടി അവസാന ഓവറുകളില്‍ റിഷഭ്​ പന്തും​ (13 പന്തുകളില്‍ 27 റണ്‍സ്​) ഹര്‍ദിക്​ പാണ്ഡ്യയും (13 പന്തുകളില്‍ 35) വെടിക്കെട്ട്​ പ്രകടനമാണ്​ നടത്തിയത്​. ഇരുവരും ചേര്‍ന്നാണ്​ സ്​കോര്‍ 200 കടത്തിയത്​.