ആവേശം നിറഞ്ഞ മത്സരത്തില്‍ ബംഗ്ലാദേശ് വനിതകളെ എട്ട് റണ്‍സിന് തകര്‍ത്ത് ഇന്ത്യ. 95 റണ്‍സ് വിജയലക്ഷ്യവുമായി കളത്തിലിറങ്ങിയ ബംഗ്ലാദേശിന് അവസാന ഓവറില്‍ നാല് വിക്കറ്റുകളാണ് നഷ്ടമായത്. സ്‌കോര്‍: ഇന്ത്യ 95/8, ബംഗ്ലാദേശ് 87/10. ടോസ് നേടി ബാറ്റിംഗിനെത്തിയ ഇന്ത്യക്ക് നിശ്ചിത ഓവറില്‍ എട്ട് വിക്കറ്റ് നഷ്ടത്തില്‍ 95 റണ്‍സെടുക്കാനാണ് സാധിച്ചത്.

19 റണ്‍സെടുത്ത ഷെഫാലി വര്‍മയാണ് ഇന്ത്യയുടെ ടോപ് സ്‌കോറര്‍. മൂന്ന് വിക്കറ്റുമായി സുല്‍ത്താന ഖതുന്‍ ബംഗ്ലാ നിരയില്‍ തിളങ്ങി. ബാറ്റ് ചെയ്യാന്‍ അവസരം ലഭിച്ച മലയാളി താരം മിന്നുമണി മൂന്ന് പന്തില്‍ അഞ്ച് റണ്‍സുമായി പുറത്താവാതെ നിന്നു. മത്സരത്തില്‍ നാല് ഓവറുകള്‍ പന്തെറിഞ്ഞ താരം ഒന്‍പതു റണ്‍സ് മാത്രം വഴങ്ങി രണ്ട് വിക്കറ്റുകളും വീഴ്ത്തി.

മറുപടി ബാറ്റിംഗിനെത്തിയ ബംഗ്ലാദേശും തകര്‍ച്ചയാടെയാണ് തുടങ്ങിയത്. ക്യാപ്റ്റന്‍ നിഗര്‍ സുല്‍ത്താന (55 പന്തില്‍ 38 റണ്‍സ്) മാത്രമാണ് രണ്ടക്കം കണ്ടത്. 19-ാം ഓവറില്‍ നിഗര്‍ സുല്‍ത്താനയെ ദീപ്തി ശര്‍മ വീഴ്ത്തിയതോടെയാണ് കളി ഇന്ത്യയ്ക്ക് അനുകൂലമായത്.