ഇന്ത്യ- അയര്‍ലന്‍ഡ് ആദ്യ ടി20 മല്‍സരത്തിന് മഴ തടസ്സം നിന്നെങ്കിലും ഇന്ത്യ അയര്‍ലന്‍ഡിനെതിരെ രണ്ട് റണ്‍സിന് ജയിച്ചു. മഴ നിയമപ്രകാരം രണ്ടു റണ്‍സിന്റെ ജയമാണ് ഇന്ത്യ കൈക്കലാക്കിയത്.

140 റണ്‍സിന്റെ വിജയലക്ഷ്യം പിന്തുടര്‍ന്ന ഇന്ത്യ 6.5 ഓവറില്‍ രണ്ടു വിക്കറ്റിനു 47 റണ്‍സില്‍ നില്‍ക്കെ മഴയെത്തുകയായിരുന്നു. പിന്നീട് മല്‍സരം പുനരാരംഭിക്കാനുമായില്ല.

ഈ ഘട്ടത്തില്‍ ഡെക്ക് വര്‍ത്ത് ലൂയിസ് നിയമപ്രകാരം 45 റണ്‍സായിരുന്നു ഇന്ത്യക്കു വേണ്ടിയിരുന്നത്.ഇതോടെ ഇന്ത്യയെ രണ്ടു റണ്‍സിനു വിജയികളായി പ്രഖ്യാപിക്കുകയും ചെയ്തു. റുതുരാജ് ഗെയ്ക്വാദും (19) സഞ്ജു സാംസണുമായിരുന്നു (1) കളി തടസ്സപ്പെടുമ്പോള്‍ ക്രീസില്‍.

യശസ്വി ജയ്‌സ്വാള്‍ (24), തിലക് വര്‍മ (0) എന്നിവരുടെ വിക്കറ്റുകളാണ് ഇന്ത്യക്കു നഷ്ടമായത്. ജയത്തോടെ മൂന്നു മല്‍സരങ്ങളുടെ പരമ്പരയില്‍ ഇന്ത്യ 1-0ന് മുന്നിലെത്തി. അടുത്ത മല്‍സരം നാളെ ഇതേ വേദിയില്‍ നടക്കും.