ഇന്ത്യ-അയര്‍ലന്‍ഡ് മൂന്ന് മത്സര ട്വന്റി20 പരമ്പരയിലെ രണ്ടാം അങ്കം ഇന്ന് ഞായറാഴ്ച നടക്കും. മഴ തടസ്സപ്പെടുത്തിയ ആദ്യ കളിയില്‍ ഡക്ക് വര്‍ത്ത് ലൂയിസ് നിയമപ്രകാരം രണ്ട് റണ്‍സ് ജയം നേടിയ ഇന്ത്യ ഇറങ്ങുന്നത് പരമ്പര സ്വന്തമാക്കാനുറച്ചാണ്.

ആതിഥേയരെ സംബന്ധിച്ച് പ്രതീക്ഷ നിലനിര്‍ത്താന്‍ ജയം അനിവാര്യമാണ്. 140 റണ്‍സ് വിജയലക്ഷ്യം പിന്തുടര്‍ന്ന് ബാറ്റിങ്ങിനിറങ്ങിയ ഇന്ത്യ 6.5 ഓവറില്‍ രണ്ട് വിക്കറ്റിന് 47 നില്‍ക്കുമ്പോള്‍ മഴമൂലം കളി നിര്‍ത്തുകയായിരുന്നു.

11 മാസത്തെ ഇടവേളക്ക് ശേഷം കളത്തില്‍ തിരിച്ചെത്തിയ ജസ്പ്രീത് ബുംറയുടെ ബൗളിങ് പ്രകടനം ഇന്ത്യയെ സംബന്ധിച്ച് ഏറെ സന്തോഷം നല്‍കുന്നതാണ്. നാല് ഓവറില്‍ 24 റണ്‍സിന് രണ്ട് വിക്കറ്റ് വീഴ്ത്തി ക്യാപ്റ്റന്‍. സീനിയര്‍ താരങ്ങളുടെ അഭാവത്തില്‍ കിട്ടുന്ന അവസരം ഉപയോഗപ്പെടുത്താനിറങ്ങിയ യുവനിരക്ക് പരമ്പര ഏറെ നിര്‍ണായകമാണ്.

ശിവം ദുബെ, ഋതുരാജ് ഗെയ്ക് വാദ്, റിങ്കു സിങ് തുടങ്ങിയവരൊക്കെ ഇന്ത്യന്‍ ടീമില്‍ സ്ഥിരാംഗത്വം തേടുന്നുണ്ട്. റിങ്കുവിന്റെയും പേസര്‍ പ്രസിദ്ധ് കൃഷ്ണയുടെയും അരങ്ങേറ്റ മത്സരമായിരുന്നു കഴിഞ്ഞ ദിവസത്തേത്.