ബാറ്റിങ് കരുത്ത് തെളിയിച്ച് ഇന്ത്യ... കോലിക്കും രാഹുലിനും സെഞ്ചറി... ഏഷ്യാകപ്പ് ക്രിക്കറ്റ് സൂപ്പര്‍ ഫോറില്‍ പാക്കിസ്ഥാനെതിരെ ഇന്ത്യയ്ക്കു വമ്പന്‍ വിജയം....ഇന്ത്യ ഉയര്‍ത്തിയ 357 റണ്‍സ് വിജയ ലക്ഷ്യം പിന്തുടര്‍ന്ന പാക്കിസ്ഥാന്‍ 32 ഓവറില്‍ 128 റണ്‍സിന് ഓള്‍ഔട്ടായി

228 റണ്‍സ് വിജയവുമായാണ് ടീം ഇന്ത്യ പാക്കിസ്ഥാനെ തോല്‍പ്പിച്ചത്. 50 പന്തില്‍ 27 റണ്‍സെടുത്ത ഓപ്പണര്‍ ഫഖര്‍ സമാനാണ് പാക്കിസ്ഥാന്റെ ടോപ് സ്‌കോറര്‍.

ഇന്ത്യയ്ക്കായി കുല്‍ദീപ് യാദവ് അഞ്ച് വിക്കറ്റ് വീഴ്ത്തി. എട്ട് ഓവറുകള്‍ പന്തെറിഞ്ഞ കുല്‍ദീപ് വഴങ്ങിയത് 25 റണ്‍സ് മാത്രം. ടോസ് നഷ്ടപ്പെട്ട് ആദ്യം ബാറ്റു ചെയ്ത ഇന്ത്യ 24.1 ഓവറില്‍ രണ്ട് വിക്കറ്റ് നഷ്ടത്തില്‍ 147 റണ്‍സെടുത്തു നില്‍ക്കെയാണ് ഇന്നലെ മഴയെത്തിയത്. രോഹിത് 49 പന്തില്‍ ആറ് ബൗണ്ടറിയും നാല് സിക്സും സഹിതമാണ് 56 റണ്‍സെടുത്തത്. ഗില്‍ 52 പന്തില്‍ 10 ബൗണ്ടറിയുടെ അകമ്പടിയോടെയാണ് 58 റണ്‍സെടുത്തത്

മറുപടി ബാറ്റിങ്ങിന്റെ ആരംഭം മുതല്‍ പാക്കിസ്ഥാന്‍ പ്രതിരോധത്തിലായിരുന്നു. വിക്കറ്റുകള്‍ തുടക്കത്തില്‍ അധികം വീണില്ലെങ്കിലും റണ്‍ നേടാന്‍ പാക്ക് ബാറ്റര്‍മാര്‍ കഷ്ടപ്പെട്ടു. ഇമാം ഉള്‍ ഹഖിനെ ശുഭ്മന്‍ ഗില്ലിന്റെ കൈകളിലെത്തിച്ച് ജസ്പ്രീത് ബുമ്രയാണ് ഇന്ത്യയുടെ വിക്കറ്റ് വേട്ടയ്ക്കു തുടക്കമിട്ടത്.

ബാബര്‍ അസം (24 പന്തില്‍ 10), മുഹമ്മദ് റിസ്‌വാന്‍ (അഞ്ച് പന്തില്‍ രണ്ട്) എന്നിവര്‍ വലിയ സ്‌കോര്‍ കണ്ടെത്താനാകാതെ പോയതും പാക്കിസ്ഥാനു തിരിച്ചടിയായി മാറി.