ഇന്ത്യന്‍ ക്രിക്കറ്റ് ടീമിന്റെ പരിശീലക സ്ഥാനത്തു നിന്നും വിരമിക്കാനുണ്ടായ കാരണങ്ങള്‍ വിശദീരിച്ച് കോച്ച് അനില്‍ കുംബ്ലെ രംഗത്തെത്തി. ക്യാപ്റ്റന്‍ വിരാട് കോഹ്‌ലിയുമായി ഒത്തു പോകാന്‍ കഴിയാത്ത ബന്ധമായിരുന്നെന്നും ഇതാണ് വിരമിക്കലിലേക്ക് നയിച്ചതെന്നും കുംബ്ലെ പറഞ്ഞു. രാജിയുമായി ബന്ധപ്പെട്ട കാര്യങ്ങള്‍ ട്വിറ്ററിലൂടെയും ഫേസ്ബുക്കിലൂടെയുമാണ് കുംബ്ലെ അറിയിച്ചത്. തന്നോട് കോച്ചായി തുടരാന്‍ ആവശ്യപ്പെട്ട് ക്രിക്കറ്റ് ഉപദേശക സമിതി തന്നെ ആദരിച്ചതായി കുംബ്ലെ പറയുന്നു. സൗരവ് ഗാംഗുലി, സചിന്‍ ടെണ്ടുല്‍ക്കര്‍, വി.വി.എസ് ലക്ഷ്മണ്‍ എന്നിവരാണ് ക്രിക്കറ്റ് ഉപദേശക സമിതിയിലുള്ളത്.

തന്റെ പരിശീലന രീതിയോടും താന്‍ കോച്ചായി തുടരുന്നതിനോടും താല്‍പര്യമില്ലെന്ന വിരാട് കോഹ്‌ലിയുടെ അഭിപ്രായം തിങ്കളാഴ്ചാണ് ബോര്‍ഡ് അറിയിക്കുന്നതെന്നും കുംബ്ലെ പറഞ്ഞു. കോച്ചും ക്യാപറ്റനും തമ്മിലുള്ള ബന്ധം ശരിയാക്കാന്‍ ക്രിക്കറ്റ് ബോര്‍ഡ് ശ്രമം നടത്തിയിരുന്നതായും എന്നാല്‍ ഒത്തു പോകാത്ത സ്ഥിതിയാണുള്ളതെന്നും കുംബ്ലെ വ്യക്തമാക്കി. പ്രൊഫഷണലിസം, അച്ചടക്കം, പ്രതിബദ്ധത, സത്യസന്ധത എന്നിവയിലൂടെയായിരുന്നു തന്റെ രീതിയെന്നും കുംബ്ലെ വ്യക്തമാക്കുന്നു.

ഇന്നലെയാണ് ഇന്ത്യന്‍ ക്രിക്കറ്റ് ടീം പരിശീലക സ്ഥാനത്തുനിന്നും അനില്‍ കുംബ്ലെ രാജിവെച്ചത്. ചാമ്പ്യന്‍സ് ട്രോഫിക്ക് മുമ്പേ തുടങ്ങിയ ഉള്‍പോര് പൊട്ടിത്തെറിയുടെ വക്കിലെത്തിയതിനു പിന്നാലെയാണ് രാജി. ചാമ്പ്യന്‍സ് ട്രോഫി ഫൈനലില്‍ പാകിസ്താനോട് തോറ്റ ഇന്ത്യന്‍ ടീം ചൊവ്വാഴ്ച വിന്‍ഡീസ് പര്യടനത്തിനായി അനില്‍ കുംബ്ലെയില്ലാതെയാണ് പോയത്. ഐ.സി.സി വാര്‍ഷിക സമ്മേളനത്തില്‍ പങ്കെടുക്കേണ്ടതിനാല്‍ കുംബ്ലെ ടീമിനൊപ്പം വിന്‍ഡീസിലേക്ക് പോവുന്നില്ലെന്നായിരുന്നു ആദ്യം അറിയിച്ചത്. എന്നാല്‍, വൈകുന്നേരത്തോടെ ഇന്ത്യന്‍ ക്രിക്കറ്റ് ബോര്‍ഡ് സി.ഇ.ഒ രാഹുല്‍ ജൊഹ്‌റിക്ക് രാജിക്കത്ത് നല്‍കി കുംബ്ലെ പടിയിറക്കം പ്രഖ്യാപിക്കുകയായിരുന്നു.