ശ്രീലങ്കയില്‍ വെച്ച് നടക്കുന്ന ഇന്ത്യശ്രീലങ്ക ടെസ്റ്റ് പരമ്പരയിലെ ആദ്യ ടെസ്റ്റില്‍ ഇന്ത്യയ്ക്ക് 304 റണ്‍സിന്റെ വന്‍ വിജയം. 549 റണ്‍സ് എന്ന റണ്‍മല ലക്ഷ്യമിട്ടിറങ്ങിയ ശ്രീലങ്കന്‍ ബാറ്റസ്മാന്‍മാര്‍ ഇന്ത്യന്‍ ബൗളര്‍മാരുടെ മുന്നില്‍ 245 റണ്‍സിന് ഓള്‍ ഔട്ട് ആകുകയായിരുന്നു. ആദ്യ ഇന്നിങ്‌സില്‍ തകര്‍പ്പന്‍ പ്രകടനത്തിലൂടെ സെഞ്ച്വറി നേടിയ ശിഖര്‍ ധവാനാണ് മാന്‍ ഓഫ് ദി മാച്ച്. 

രണ്ടാമിന്നിങ്‌സില്‍ ക്യാപ്റ്റന്‍ വിരാട് കോഹ്‌ലിയുടെ സെഞ്ചുറിയുടെ ബലത്തിലാണ് ഇന്ത്യ കൂറ്റന്‍ ലീഡ് നേടിയത്. കോഹ്‌ലി 103 റണ്‍സ് നേടി പുറത്താകാതെ നിന്നു.

ശ്രീലങ്കയുടെ രണ്ടാം ഇന്നിങ്‌സില്‍ ഓപ്പണര്‍ ദിമുത് കരുണരത്‌നയും വിക്കറ്റ് കീപ്പര്‍ നിരോഷനും അര്‍ധസെഞ്ചുറി നേടിയതാണ് ആതിഥേയര്‍ക്ക് എടുത്ത് പറയാനുള്ളത്. കരുണരത്‌ന 97 റണ്‍സ് നേടി. ഇന്ത്യയ്ക്ക് വേണ്ടി അശ്വിന്‍ മൂന്നും രവീന്ദ്ര ജഡേജ മൂന്നും ഷാമി ഒരു വിക്കറ്റും ഉമേഷ് യാദവ് ഒന്നും നേടി. രണ്ടുപേര്‍ റിട്ടയേര്‍ഡ് ഹര്‍ട്ട് ആയി. ഇതോടെ മൂന്ന് മത്സരങ്ങളുള്ള ടെസ്റ്റ് പരമ്പരയില്‍ ഇന്ത്യ 1-0ന് മുന്നിലെത്തി.