ട്വന്റി20യില്‍ ഇന്ത്യയ്ക്ക് വിജയിക്കാന്‍ 171 റണ്‍സ്. ഇന്ത്യയ്‌ക്കെതിരായ ട്വന്റി20യില്‍ ആദ്യം ബാറ്റ് ചെയ്ത ശ്രീലങ്ക 7 വിക്കറ്റ് നഷ്ടത്തില്‍ 170 റണ്‍സെടുത്തു. തുടക്കത്തില്‍ വിക്കറ്റുകള്‍ നഷ്ടമായ ശ്രീലങ്കയെ മദ്ധ്യ നിരയാണ് മത്സരത്തിലേക്ക് തിരിച്ചു കൊണ്ടുവന്നത്.

തുടക്കത്തില്‍ അടിച്ചു കളിച്ച് ലങ്കയ്ക്ക് ഓപ്പണര്‍മാരെ ചെറിയ സ്‌കോറിന് നഷ്ടമായി. പിന്നീട് വന്ന ദില്‍ഷന്‍ മുനവീര ലങ്കന്‍ നിരയില്‍ തിളങ്ങി. 29 പന്തില്‍ 53 റണ്‍സെടുത്ത മുനവീരയെ ടീം സ്‌കോര്‍ 99 വച്ച് നഷ്ടമായി. പിന്നീട് അടുപ്പിച്ച് രണ്ടു വിക്കറ്റുകള്‍ നഷ്ടമായെങ്കിലും അഷന്‍ പ്രിയഞ്ജന്റെ കരുതലോടെയുള്ള ബാറ്റിംഗ് ടീമിനെ മികച്ച് സ്‌കോറിലെത്തിക്കുകയായിരുന്നു.

പ്രിയഞ്ജന്‍ പുറത്താകാതെ 44 റണ്‍സെടുത്തു. 10 പന്തില്‍ 19 റണ്‍സെടുത്ത ഉദനയുടെ ബാറ്റിംഗും അവസാന ഓവറുകളില്‍ സ്‌കോറിംഗിന് വേഗം കൂട്ടി. ഇന്ത്യയ്ക്കായി ചഹല്‍ മൂന്നും കുല്‍ദീപ് യാദവ് രണ്ടും ബൂമ്ര, ഭുവനേശ്വര്‍ എന്നിവര്‍ ഓരോ വിക്കറ്റും വിഴ്ത്തി.