ശ്രീലങ്കൻ മുൻ ക്രിക്കറ്റ് താരം ചമരസിൽവയെ ക്രിക്കറ്റുമായി ബന്ധപ്പെട്ട എല്ലാ പ്രവർത്തനങ്ങളിൽ നിന്നും രണ്ടു വർഷത്തേക്ക് വിലക്കി. വാതുവയ്പ് നടത്തിയെന്ന് കണ്ടെത്തിയതിനേത്തുടർന്നാണ് നടപടി. ജനുവരിയിൽ നടന്ന ആഭ്യന്തര ടെസ്റ്റ് ക്രിക്കറ്റിനിടെയാണ് വാതുവയ്പ് നടന്നതെന്നാണ് വിവരം.

ജനുവരി 23 മുതൽ 25 വരെ പാണ്ടുര ക്രിക്കറ്റ് ക്ലബും കലുതര ക്ലബും തമ്മിൽ നടന്ന മത്സരത്തിലാണ് വാതുവയ്പ് നടന്നത്. മത്സരത്തിൽ പാണ്ടുര ക്ലബിനെ നയിച്ചത് സിൽവയായിരുന്നു. കലുതര ക്ലബിന്‍റെ ക്യാപ്റ്റനെയും വിലക്കിയിട്ടുണ്ട്. കഴിഞ്ഞ ഏഴുമാസത്തിലേറെയായി നടത്തിയ അന്വേഷണത്തിനൊടുവിലാണ് ശിക്ഷ പ്രഖ്യാപിച്ചത്. 1999മുതൽ 2011വരെ ശ്രീലങ്കൻ അന്താരാഷ്ട്ര ക്രിക്കറ്റ് ടീമിന്‍റെ ഭാഗമായിരുന്ന സിൽവ 11 ടെസ്റ്റുകളും 75 ഏകദിനങ്ങളും കളിച്ചിട്ടുണ്ട്.