ഇന്ത്യ- ന്യൂസീലൻഡ് ഏകദിന പരമ്പരയിലെ ആദ്യ ഏകദിനത്തിൽ ഇന്ത്യക്കു മികച്ച സ്കോർ. ഇന്ത്യൻ ക്യാപ്റ്റൻ വിരാട് കോലിയുടെ 31-ാം ഏകദിന സെഞ്ച്വറിയുടെ ബലത്തിലാണ് ഇന്ത്യ മികച്ച സ്കോർ നേടിയത്. തന്റെ ഇരുന്നൂറാം ഏകദിന മത്സരത്തിലാണ് കോലിയുടെ സെഞ്ച്വറി നേട്ടം. 111 പന്തില്‍ നിന്ന് ഏഴു ഫോറിന്റെയും ഒരു സിക്‌സിന്റെയും അകമ്പടിയോടെയാണ് കോലി സെഞ്ച്വറി പൂർത്തിയാക്കിയത്.

ഏകദിനത്തില്‍ ഏറ്റവും കൂടുതല്‍ സെഞ്ച്വറി നേടുന്ന രണ്ടാമത്തെ താരമായി കോലി മാറി. 49 സെഞ്ച്വറിയുള്ള സച്ചിന്റെ റെക്കോഡ് മാത്രമാണ് ഇനി കോലിക്ക് മുന്നിലുള്ളത്. ടോസ് നേടി ബാറ്റിങ് തിരഞ്ഞെടുത്ത ഇന്ത്യയുടെ തുടക്കം തകര്‍ച്ചയോടെയായിരുന്നു. 29 റണ്‍സെടുക്കുന്നതിനിടയില്‍ ശിഖര്‍ ധവാനെയും രോഹിത് ശര്‍മ്മയെയും നഷ്ടപ്പെട്ടെങ്കിലും കോലിയുടെ അവസരോചിത ഇന്നിംഗ്സ് ഇന്ത്യക്ക് തുണയായി.