കാത്തിരുപ്പിന് വിരാമമിട്ട് മല്‍സരം തുടങ്ങി... 3 വിക്കറ്റ് നഷ്ടത്തില്‍ ഇന്ത്യ പൊരുതുന്നു
കാത്തിരിപ്പിന് വിരാമമിട്ട് കളി തുടങ്ങി. മല്‍സരം മഴമൂലം വൈകിയതിനാല്‍ എട്ട് ഓവറാക്കി ചുരുക്കിയാണ് കളി തുടങ്ങിയത്. ആദ്യം ബാറ്റ് ചെയ്യാനിറങ്ങിയ ഇന്ത്യ ആദ്യ ഓവറില്‍ ഏഴ് റണ്‍സെടുത്തെങ്കിലും രണ്ടാം ഒവറില്‍ ഇന്ത്യയ്ക്ക് 3 വിക്കറ്റ് നഷ്ടമായി. ചുരുങ്ങിയ ഓവറില്‍ ആഞ്ഞടിക്കാന്‍ ശ്രമിച്ച രോഹിത് ശര്‍മയും ശിഹര്‍ ധവാനും, ക്യാപ്റ്റന്‍ വിരാട് കോഹ്ലിയും ഔട്ടായി.
ആദ്യകളിയില്‍ ഇന്ത്യയും രണ്ടാം കളിയില്‍ ന്യൂസീലന്‍ഡും ജയിച്ചതോടെ ഇന്നത്തെ പോരാട്ടം ഫൈനലായി മാറും. മികച്ച ഫോമിലുള്ള ഇന്ത്യയുടെ ബാറ്റിങ്‌നിര കഴിഞ്ഞ കളിയില്‍ തകര്‍ന്നടിഞ്ഞത് ആശങ്കയ്ക്കിടയാക്കുന്നുണ്ട്. ശ്രീലങ്കയുമായുള്ള പരമ്പരയ്ക്കു മുന്‍പ് ആത്മവിശ്വാസം വീണ്ടെടുക്കാനും കരുത്തു തെളിയിക്കാനുമുള്ള വേദികൂടിയാണ് ഇന്ത്യയ്ക്ക് ഇന്നത്തെ മല്‍സരം. തുടര്‍ച്ചയായ പരമ്പരവിജയങ്ങളുടെ നെറുകയില്‍ നില്‍ക്കുന്ന ഇന്ത്യന്‍ ടീം ഇന്നു കളത്തിലിറങ്ങുമ്പോള്‍ വിജയത്തില്‍ കുറഞ്ഞതൊന്നും ആരാധകരുടെ മനസ്സിലില്ല.
ന്യൂസീലന്‍ഡിനെപ്പോലെതന്നെ ഇന്ത്യയ്ക്കും കാര്യവട്ടം സ്‌പോര്‍ട്‌സ് ഹബ് സ്‌റ്റേഡിയത്തിലെ പിച്ച് അപരിചിതം. കോച്ച് രവി ശാസ്ത്രിയുടെയും ക്യാപ്റ്റന്‍ വിരാട് കോഹ്!ലിയുടെയും നേതൃത്വത്തില്‍ പിച്ച് പരിശോധിച്ചശേഷമേ അന്തിമ ഇലവനെ തീരുമാനിക്കൂ. കഴിഞ്ഞ കളിയില്‍ അഞ്ചു സ്‌പെഷലിസ്റ്റ് ബോളര്‍മാരുമായാണ് ഇന്ത്യ ഇറങ്ങിയത്. അതിന്റെ ഫലം കിട്ടിയില്ല. അതുകൊണ്ടുതന്നെ നാലു ബോളര്‍മാരും ഹാര്‍ദിക് പാണ്ഡ്യയും എന്ന പഴയ ഫോര്‍മാറ്റിലേക്കു തിരിയെപ്പോകാനുള്ള സാധ്യതയുണ്ട്.
കഴിഞ്ഞ കളിയില്‍ അരങ്ങേറ്റം കുറിച്ച മുഹമ്മദ് സിറാജിന് ഒരു അവസരംകൂടി ലഭിക്കുമോ എന്നു കാത്തിരുന്നു കാണേണ്ടിവരും. മലയാളിവേരുകളുള്ള ശ്രേയസ്സ് അയ്യര്‍ അന്തിമ ഇലവനില്‍ തുടരുമെന്നാണു സൂചന. സ്‌പോര്‍ട്‌സ് ഹബ് സ്‌റ്റേഡിയത്തില്‍ അഞ്ചു പിച്ചുകളാണ് ഒരുക്കിയിട്ടുള്ളത്. ഇതില്‍ ബാറ്റിങ്ങിനെ പിന്തുണയ്ക്കുന്ന പിച്ചിലായിരിക്കും ഇന്നത്തെ മല്‍സരം. ബാറ്റിങ് വെടിക്കെട്ടു കാണാനെത്തുന്നവര്‍ നിരാശപ്പെടേണ്ടിവരില്ല എന്നാണു ക്യൂറേറ്റര്‍ സംഘം നല്‍കുന്ന സൂചന.
https://www.facebook.com/Malayalivartha
